បាត់ដំបង ៖ លោកអភិបាលក្រុងបាត់ដំបង អង្គភាពរដ្ឋាករទឹក បាត់ដំបង និងមន្ទីរសាធារណការ និងដឹកជញ្ជូនខេត្ត នាំគ្នាចុះពិនិត្យ និងបើកការដ្ឋានសម្លុះលូ ផ្លាស់ទុយោទឹកស្អាតថ្មីធំជាងមុន ជាជំនួយឥតសំណង របស់ប្រជាជន និងរាជរដ្ឋាភិបាលប្រទេសជប៉ុន ក្នុងតម្លៃទឹកប្រាក់ជាង ២០លានដុល្លារ ដើម្បី បំរើតម្រូវការរបស់ប្រជាជនក្នុងខេត្តបាត់ដំបងកាលព្រឹកថ្ងៃទី១២ ខែមករា ឆ្នាំ២០១៥ នៅភូមិកម្មករសង្កាត់ស្វាយប៉ោក្រុងបាត់ដំបង។
លោក អ៊ុត ខ្លឹង អនុប្រធាន អង្គភាពរដ្ឋាករទឹកបាត់ដំបង បានឲ្យដឹងថា អង្គភាពយើង បានទទួលជំនួយឥតសំណង របស់ ប្រជាជន និងរាជរដ្ឋាភិបាលជប៉ុន ក្នុងតម្លៃទឹកប្រាក់ជាង ២០លានដុល្លារ ដើម្បីកសាងស្ថានីយធំៗ២កន្លែង គឺស្ថានីយបូមទឹកឆៅ និងស្ថានីយចម្រោះផលិតទឹកស្អាត ព្រមទាំងជីកកប់ទុយោប្រភេទធំ ដើម្បីពង្រីកបណ្តាញទឹកស្អាត មានលក្ខណៈទ្រង់ទ្រាយធំ ក្នុងនោះការសាងសង់ ស្ថានីយបូមទឹកឆៅ នៅចំណុចជិតស្ពានរថភ្លើង ត្រើយខាងលិច ស្ថិតក្នុងភូមិ.សង្កាត់វត្តគរ ក្រុងបាត់ដំបង និងចាប់ផ្តើម ជីកដីតាមចិញ្ចើមថ្នល់សម្លុះទុយោទឹក ទំហំ៦តឹក ពីការដ្ឋានស្ថានីយ បូមទឹកឆៅ ដល់ស្ថានីយចម្រោះទឹក នៅចំណុចរោងចក្រទឹកកកចាស់ ស្ថិតក្នុងភូមិវត្តរំដួល ក្រុងបាត់ដំបង ដែលមានចម្ងាយជាង ៤៣០០ម៉ែត្រ ដោយចាប់ផ្តើមសាងសង់ កាលពីក្នុងឆ្នាំ២០១៤ រហូតដល់ខែមិថុនា ឆ្នាំ២០១៦ ទើបចប់សព្វគ្រប់។
លោក អ៊ុត ខ្លឹង បានបន្តទៀតថាដើម្បីបញ្ចេញទឹកអោយបាន២២០ម៉ែត្រគីបក្នុង១ថ្ងៃត្រូវតភ្ជាប់បណ្តាញបំពង់ទឹក នៅក្នុងគម្រោងទី១ ក្នុងក្រុងបាត់ដំបងនោះ មានប្រវែង ៧១គីឡូម៉ែត្រ កន្លងមកហើយ។ ចំណែកគម្រោងទី២ មានប្រវែង៦៥គីឡូម៉ែត្រ ដោយតភ្ជាប់កប់ទុយោ ចំនួន៦ គោលដៅមាន៖ ទី១. ពីស្ថានីយបូមទឹក ទៅដល់ផ្សារជ្រៃស្រុកថ្មគោល ទី២.ទៅដល់ចំណុចស្ពានដូនទាវ ទី៣.ទៅផ្តល់ចំណុចពុកឆ្មា ឃុំអន្លង់វិល ស្រុកសង្កែ ទី៤.ទៅដល់ចំណុចសង្កាត់អូរម៉ាល់ ក្រុងបាត់ដំបង ទី៥.ទៅដល់ចំណុច ម្តុំពន្ធនាគារ ម្តុំសង្កាត់វត្តគរ ក្រុងបាត់ដំបង និងទី៦.ទៅដល់ចំណុចភូមិកំពង់សីមា ឃុំឈើទាល ស្រុកបាណន់។
លោក អ៊ុត ខ្លឹង បានបញ្ជាក់ទៀតថា បណ្តាញទឹកស្អាតបាត់ដំបងយើងកន្លងមក បានផលិតទឹកស្អាត បានចំនួនជាង១ម៉ឺនម៉ែត្រគូបទេ លុះដល់គម្រោងថ្មីនេះ សាងសង់ចប់សព្វគ្រប់ គឺអាចផលិតទឹកស្អាត បានជាង២ម៉ឺនម៉ែត្រគូប ថែមទៀត ដូច្នេះប្រជាពលរដ្ឋនៅបាត់ដំបង និងបានទទួលសេវាទឹកស្អាត ពីអង្គភាពរដ្ឋាករទឹកយើង បានច្រើនជាងមុន ដែលមានលក្ខណៈស្តង់ដារអន្តរជាតិផងដែរ។
លោក សៀងឯម វូនស្ហី អភិបាលក្រុងបាត់ដំបងបានអោយដឹងថា នៅខេត្តបាត់ដំបងកន្លងមក ដែលបានប្រើប្រាស់ប្រព័ន្ធទឹកស្អាតចាស់ តាំងពីជំនាន់បារាំង បានកសាងឡើងតាំងពីឆ្នាំ១៩២២ មក គឺកប់ទុយោមានទំហំតូច១តឹកប៉ុណ្ណោះ តែពេលនេះ ខេត្តយើងបានទទួល ប្រព័ន្ធទឹកស្អាតថ្មី សូម្បីតែទុយោកប់ដីមាន ទំហំដល់ទៅ៦តឹក គឺធំជាងមុន ហើយអាចផ្គត់ផ្គង់ទឹកស្អាត ជូនប្រជាពលរដ្ឋ ក៏បានច្រើនជាមុនដែរ។ លោកក៏បានថ្លែងអំណរគុណ ដល់ប្រជាជនជប៉ុន ដែលបានផ្តល់ជំនួយទាំងនេះ តាមរយៈរាជរដ្ឋាភិបាលកម្ពុជា សម្រាប់កសាង និងអភិវឌ្ឍន៍ប្រទេសកម្ពុជារហូតមក ៕
