កោះកុង ៖ យោងតាមប្រភពព័ត៌មានជាក់លាក់មួយបានថ្លែងអោយដឹងថា កាលពីយប់ថ្ងៃទី២២ ខែកញ្ញា ឆ្នាំ២០១៦ មានករណីសមត្ថកិច្ចប៉ូលីសវរព្រំដែនគោកបានលួចគាស់ឃ្លាំងអាវុធ នៅចំនុចទីបញ្ជការវរះសេនាតូចនគរបាលការពារព្រំដែនគោកលេខ ៨២៧ ដែលមានទីតាំងស្ថិតក្នុងភូមិថ្មី ឃុំប៉ាក់ខ្លង ស្រុកមណ្ឌលសីមា ខេត្តកោះកុង ។
យោងតាមប្រភពពីសមត្ថកិច្ចដែលថ្លែងក្នុងលក្ខខណ្ឌសុំមិនបញ្ចេញឈ្មោះបានអោយដឹងថា កាលពីយប់ថ្ងៃទី២២ ខែកញ្ញា ឆ្នាំ២០១៦ វេលាម៉ោង១១អាធ្រាត មានសមត្ថកិច្ចម្នាក់ដែលគេស្គាល់ថាឈ្មោះ សុខ បញ្ញា ជាប៉ូលីសព្រំដែនគោកលេខ៨២៧ ដែលកន្លងមកគេតែងតែបានឃើញវត្តមានជនសង្ស័យនេះនៅកន្លែងល្បែងប្រជល់មាន់ និង យូគី របស់ក្រុមហ៊ុន.អិល.វ៉ាយ.ភី.គ្រុប.ជានិច្ច បានលូចចូលគាស់ឃ្លាំងអាវុធ នៅទីបញ្ជាការវរះសេនាតូចនគរបាលការពារព្រំដែនគោកលេខ ៨២៧ ដើម្បីលួចយកអាវុធ និងគ្រាប់មួយចំនួនតែត្រូវបានសមត្ថកិច្ចប្រចាំនៅទីនោះឃាត់ខ្លួនបានភ្លាមៗ ។
ប្រភពដដែលបានបន្តថា ក្រោយការឃាត់ខ្លួនជនសង្ស័យខាងលើបានរកឃើញ កាំភ្លើងច្នៃ គ្រាប់កាំភ្លើងមួយចំនួន និង គ្រាប់បែកមួយចំនួនថែមទៀតនៅកន្លែងដែលជនសង្ស័យស្នាក់នៅ ក្រោយមកសមត្ថកិច្ចបាននាំខ្លួនជនសង្ស័យទៅកាន់ការិយាល័យព្រហ្មទណ្ឌស្រាលនៃស្នងការដ្ឋាននគរបាលខេត្តកោះកុង តែរឿងរ៉ាវនេះត្រូវបានសមត្ថកិច្ចលាក់បាំងពីបណ្តាញសារព័ត៌មាន ដោយមិនបង្ហើបនូវអ្វីបន្តិចទាល់តែសោះ ។
ប្រភពបានបន្តថា ជនសង្ស័យខាងលើលួចចូលគាស់ឃ្លាំងអាវុធនេះ ប្រហែលជាបណ្តាលមកពីចាញ់ល្បែងជល់មាន់ និង យូគីច្រើនពេកហើយបានជាហ៊ានថ្លើមធំលួចចូលគាស់ឃ្លាំងអាវុធបែបនេះ ហើយក៏មានពាក្យចចាមអារ៉ាមជាច្រើនថាជនសង្ស័យខាងលើជាសាច់ញ្ញាតិខាងប្រពន្ធរបស់លោកឩត្តមសេនីយ៏ត្រី សំឃិត វៀន ស្នងការនគរបាលខេត្តកោះកុងថែមទៀតផង ទើបមិនមានការញញើតនិងច្បាប់បែបនេះ ដោយគិតថាបើមានរឿងអ្វីក៏មានបងថ្លៃជាស្នងការនៅកាងពីក្រោយខ្នងនោះដែរ រឿងលួចគាស់ឃ្លាំងអាវុធមិនមែនជារឿងធម្មតានោះទេ តែបែជាត្រូវបានសមត្ថកិច្ចធ្វើការលាក់បាំងយ៉ាងខ្លាំងពីបណ្តាញសារព័ត៌មាននិងមហាជនទៅវិញ ។
ជុំវិញបញ្ហាចោទប្រកាន់ខាងលើ លោក ឩត្តមសេនីយ៏ត្រី សំឃិត វៀន ស្នងការនគរបាលខេត្តកោះកុងបានថ្លែងបដិសេធថា ជនសង្ស័យខាងលើមិនមានជាប់សាច់សារលោហិតជាមួយលោកដូចការលើកឡើងរបស់គេនោះទេ ហើយក៏បានបិទទូរស័ព្ទទៅ ។
ចំណែកឯ លោក ឡាយ ម៉េង ឡាំង ប្រធានការិយាល័យព្រហ្មទណ្ឌកំរិតស្រាលបានថ្លែងរឿងរ៉ាវទាំងនេះ លោកមិនអាចប្រាប់បានទេ ព្រោះលោកស្នងការថាជារឿងរបស់អង្គភាព បើចង់បានរបាយការណ៏ ឬរូបភាពសូមទាក់ទងទៅលោកស្នងការទៅ បើលោកស្នងការអនុញ្ញាតលោកក៏មិនលាក់បាំងអ្វីនោះដែរ ?៕
