បាត់ដំបង ៖ នាយនគរបាលប៉ុស្តិ៍គីឡូ ៩ នៃវរៈការពារព្រំដែនគោក ៨១៧ ស្លាប់ក្នុងផ្ទះសំណាក់ យីហោតាយហេង ១ បន្ទាប់ពីនាំស្រីកំណាន់ឡើងឋានសួគ៌ ពេលម្ចាស់ផ្ទះគាស់ទ្វារ បន្ទប់ប្រទះឃើញសពកាលម៉ោង ៧ យប់ថ្ងៃទី១០ ខែមករា ឆ្នាំ២០១៥ ដោយករណីកើតពេលយប់សមត្ថកិច្ចបានហុំព័ទ្ធកន្លែងកើតហេតុ រហូតដល់ព្រឹកថ្ងៃទី ១១ ឆ្នាំដដែល បន្តធ្វើកោសសល្យវិច័យ ។
លោក ពេជ្រ សារ៉ែន អធិការស្រុកសំពៅលូន បានអោយដឹងថា បុរសរងគ្រោះស្លាប់មានឈ្មោះ ខេង ស្រ៊ុន អាយុ៤៧ឆ្នាំជានាយនគរបាលប៉ុស្តិ៍គីឡូ ៩ នៃ វរៈការពារព្រំដែនគោគ ៨១៧ មានទីលំនៅខេត្តក្រចេះ ។
តាមសម្តីម្ចាស់ផ្ទះសំណាក់ប្រាប់សមត្ថកិច្ចថា កាលពីយប់ថ្ងៃទី ៩ ខែមករា ឆ្នាំ២០១៥ លោក ខេង ស្រ៊ុន បានផឹកស៊ីស្រវឹងជោគជាំពីក្រៅ រួចនាំស្រីម្នាក់មកជួលបន្ទប់ផ្ទះសំណាក់ដេក ។ លុះព្រឹកឡើងថ្ងៃទី១០ ខែមករា ឆ្នាំ២០១៥ ស្ត្រីដៃគូលោក ខេង ស្រ៊ុន បានចាកចេញពីបន្ទប់ទៅមុនបាត់ នៅសល់តែលោក ខេង ស្រ៊ុន បានបិតបន្ទប់ដេកបន្ត ។ នៅម៉ោង១២ថ្ងៃត្រង់ ថ្ងៃដដែលកម្មករផ្ទះសំណាក់បានទៅគោះទ្វារដាស់លោក ខេង ស្រ៊ុន ប៉ុន្តែលោកនាយប៉ុស្តិ៍រូបនេះមិនបានបើកទ្វារទេ ដោយយល់ឃើញថា លោក ខេង ស្រ៊ុន ដេកមិនទាន់ឆ្អែតកម្មករក៏ឈប់ដាស់គាត់ទៀត ។ រហូតដល់ម៉ោង៧យប់ មានភ្ញៀវរកបន្ទប់ដេក និងមានការងឿងឆ្ងល់ម្ចាស់ផ្ទះសំណាក់បាននាំគ្នាទៅគោះទ្វារបន្ទប់លោក ខេង ស្រ៊ុន មិនឭមាត់ទៀត ក៏សម្រេចចិត្តគាស់ទ្វាបន្ទប់ ហើយក៏ឃើញជនរងគ្រោះដេកស្លាប់លើគ្រែតែម្តង ។
សមត្ថកិច្ចពិនិត្យកោសលវិច័យស្រាវជ្រាវកន្លែងកើតហេតុ ឃើញសពជនរងគ្រោះងូតទឹកស្អាតដេកលើគ្រែ ឃើញស្រោមអនាម័យចំនួន ៣ ដែលប្រើរួចមានទឹករំអិល ក្រៅពីនេះមិនមានស្លាកស្នាមអ្វីទេ ។ ប្រភពសាច់ញាតិជនរងគ្រោះមានជំងឺប្រចាំកាយផង ។ សមត្ថកិច្ចសន្និដ្ឋានថា ការស្លាប់របស់លោក ខេង ស្រ៊ុន គឺបណ្តាលមកពី ទី១មានជំងឺប្រចាំកាយ ទី២ មានជាតិពុលនៅក្នុងខ្លួន (គ្រឿងស្រវឹង) ទី៣ប្រើថ្នាំប៉ូវកម្លាំងជំនួយហួសហេតុ ពេលរួមភេទជាមួយដៃគូ ដូច្នេះករណីនេះ មិនមែនជារឿងឃាតកម្មឡើយ ។ ក្រោយពីធ្វើកោសលវិច័យ ហើយសពបានប្រគល់អោយសាច់ញាតិយកទៅធ្វើបុណ្យនៅខេត្តក្រចេះតាមប្រពៃណី ៕
