បាត់ដំបង ៖ ឯកឧត្តម ណុប ដារ៉ា អភិបាលរងនៃគណៈអភិបាលខេត្តបាត់ដំបង និងជាប្រធានគណៈកម្មការស្រាវជ្រាវបង្ក្រាបបទល្មើសឆ្លងដែនគ្រប់ប្រភេទក្នុងភូមិសាស្ត្រខេត្តបាត់ដំបង នាព្រឹកថ្ងៃទី១៣ ខែឧសភា ឆ្នាំ២០២១ បានអញ្ជើញក្នុងពិធីប្រជុំពង្រឹងក្រុមការងារដែលឈរជើងត្រួតពិនិត្យការចេញ-ចូលរបស់ប្រជាពលរដ្ឋនៅច្រកទ្វារព្រំដែនអន្តរជាតិដូង ស្ថិតនៅក្នុងស្រុកកំរៀងខេត្តបាត់ដំបង ។
នៅក្នុងកិច្ចប្រជុំនាព្រឹកនេះឯកឧត្តម ណុប ដារ៉ាបានសង្កត់ធ្ងន់ទៅលើបញ្ហាតួនាទីភារកិច្ចរបស់កម្លាំងដែលកំពុងឈរជើងត្រួតពិនិត្យការចេញ-ចូលរបស់ប្រជាពលរដ្ឋដើម្បីចូលរួមទប់ស្កាត់ការឆ្លងដែនខុសច្បាប់ក៏ដូចជាការចូលរួមទប់ស្កាត់ការឆ្លងជំងឺកូវីដ-១៩ពីប្រទេសជិតខាងមកប្រទេសកម្ពុជា ។
ឯកឧត្តម បានបន្តទៀតថាបើសិនជាស្រាវជ្រាវរកឃើញមន្ត្រីណាម្នាក់ដែលឈរជើងនៅទីនេះមានការឃុបឃិតគ្នាជាមួយមេខ្យល់នាំពលករឆ្លងដែនខុសច្បាប់លោកនឹងធ្វើរបាយការណ៍ជូនថ្នាក់ដឹកនាំដើម្បីសុំការដកមន្ត្រីនោះយកទៅអនុវត្តតាមច្បាប់ដោយគ្មានការលើកលែងឡើយ។
បន្ទាប់ពីប្រជុំចប់ឯកឧត្តម ណុប ដារ៉ា បានអញ្ជើញចុះត្រួតពិនិត្យតាមច្រករបៀងក្នុងភូមិសាស្ត្រស្រុកកំរៀងខេត្តបាត់ដំបង ។១៣/០៥/២០២១
