(ខេត្តកំពត)៖ នៅរសៀលថ្ងៃសៅរ៍ ទី០៨ ខែឧសភា ឆ្នាំ២០២១ លោក អ៉ឹម ច័ន្ទសោធន អភិបាលរងស្រុកទឹកឈូ និងជាប្រធានសហភាពសហព័ន្ធយុវជនកម្ពុជាស្រុកទឹកឈូ លោក នាក់ យិតថូ ប្រធានមន្ទីរធម្មការ និងសាសនាខេត្តកំពត ព្រមទាំងសប្បុរសជនមួយចំនួនបានចូលរួមនាំយកទេយ្យទាន និងបច្ច័យ ដើម្បីប្រគេនព្រះសង្ឃចំនួន ៩វត្តដែលកំពុងមានការខ្វះខាត ក្នុងស្រុកទឹកឈូ ខេត្តកំពត។
មានមតិសំណេះសំណាលក្នុងឱកាសនោះលោក អ៊ឹម ច័ន្ទសោធន បានថ្លែងអំណរគុណចំពោះសប្បុរសជន និងជម្រាបជូនពីសមិទ្ធិផលនានា ជាពិសេសការខិតខំរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រីក្នុងការប្រយុទ្ឋប្រឆាំងនឹងជំងឺកូវីដ១៩។
ជាមួយគ្នានេះលោកអភិបាលរងស្រុក ក៏បានអំពាវនាវបន្ថែមទៀតឲ្យបងប្អូនប្រជាពលរដ្ឋចូលរួមអនុវត្តនូវវិធានការសុខាភិបាល និងវិធានការ ៣ការពារ ៣កុំ របស់រាជរដ្ឋាភិបាល និងក្រសួងសុខាភិបាលឲ្យបានភ្ជាប់ខ្ជួន។
ក្នុងឱកាសនោះលោកអភិបាលរងស្រុកទឹកឈូក៏បាននាំយកអង្ករចំនួន ១២៥០គីឡូក្រាម ជូនសាលាឃុំថ្មី ដើម្បីយកទៅចែកជូនគ្រួសារខ្វះខាត ស្ថិតនៅក្នុងឃុំថ្មី ក្នុងកំឡុងពេលកូវីដ១៩នេះ។
សូមបញ្ជាក់ថា សប្បុរសជនដែលបានចូលរួមឧបត្ថម្ភមានៈ
១-លោក អ៉ឹម ច័ន្ទសោធន អភិបាលរងស្រុកទឹកឈូ និងភរិយា ព្រមទាំងក្រុមគ្រួសារ មានអង្ករចំនួន៥០០គីឡូក្រាម
២-លោក នាក់ សម្បត្តិ ប្រធាន ស.ស.យ.ក ឃុំថ្មី និងក្រុមគ្រួសារ អង្ករ ៥០០គីឡូក្រាម និងថវិកា ២០០ដុល្លា សម្រាប់ដាក់បង្គោលភ្លើងក្នុងបរិវេណវត្តពោធិ៍
៣-លោក ង៉ែត ប៊ុនធឿន សមាជិក ស.ស.យ.ក ឃុំថ្មី ឧបត្ថម្ភអង្ករ ២៥០គីឡូក្រាម។
ទេយ្យទានដែលប្រគេនវត្តទាំង ០៩ក្នុងស្រុកទឹកឈូនាពេលនេះរួមមាន វត្តពោធិវង្ស វត្តអង្គសិរីសោភា វត្តសេដ្ឋារាម វត្តសំពៅប្រាំ វត្តគិរីឧិសថទឹកជប់ វត្តពោធិព្រឹក្សសាខារាម វត្តភ្នំក្តីបារមីតេជះ វត្តវត្តស្ទឹងកែវ និងវត្តពោធិ៍ ក្នុងមួយវត្តៗទទួលបាន៖ អង្ករ ៥បាវស្មើនឹង ២៥០គីឡូក្រាម ទឹកសុទ្ធ ៥កេស ទឹកដោះគោខាប់ ១កេសធំ ទឹកត្រី ២ យួរ ទឹកស៊ីអ៊ីវ ៣យួរ ត្រីងៀត ៥គីឡូក្រាម ត្រីខ ៥យូរ ប៊ីចេង ៤គីឡូ ស្ករស ៤គីឡូ សាប៊ូ ៣ថង់ អាកុល ៥លីត្រ ប្រេងឆា ៥លីត្រ មី ៥កេស ទឹកផ្លែឈើ ២កេស តែ ១ថង់ស្មើ ១គីឡូក្រាម ម៉ាស ១កេសធំស្មើ១៨០ម៉ាស់ និងបច្ច័យចំនួន ៦០ម៉ឺនរៀល។
ចំពោះទេយ្យទាន និងបច្ច័យ សរុបជាថវិកាទាំងអស់ ៤.៥០០ដុល្លារអាមេរិក តាមរយៈលោក ជា មឿន និងលោកស្រី សេង សុជាតា លោក សេង សុខ និងលោកស្រី ស្មាន ស្រីពេជ្រ ព្រមទាំងក្រុមគ្រួសារ, លោក គង់ សុផុន និងភរិយាផងដែរ៕ សេង ណារិទ្ធ
