(ខេត្តកំពត)៖ នៅព្រឹកថ្ងៃទី០៨ ខែឧសភា ឆ្នាំ២០២១ ឯកឧត្តម ជាវ តាយ ប្រធានគណៈកម្មាធិការសាខាកាកបាទក្រហមកម្ពុជាខេត្តកំពត ព្រមទាំងលោក លោកស្រីសមាជិក សមាជិកាគណៈកម្មាធិការសាខា បានអញ្ជើញទទួលថវិកា គ្រឿងឧបភោគ បរិភោគ និងសម្ភារប្រើប្រាស់ ដែលជាអំណោយសប្បុរសធម៌ ពី ឯកឧត្តម ស៊ាង ប៊ុនលាង រដ្ឋលេខាធិការក្រសួងមហាផ្ទៃ និងលោកជំទាវហ៊ុន ប៊ុនធឿន ក្នុងឱកាសអបអរសាទរខួបទី១៥៨ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០២១ ក្រោមប្រធានបទ ” ទាំងអស់គ្នារួមជាមួយកាកបាទក្រហមកម្ពុជា ប្រយុទ្ធនឹងជំងឺកូវីដ-១៩ និងកសាងភាពធន់របស់សង្គមជាតិ ” ពិធីនេះប្រារព្ធធ្វើឡើងនៅក្នុងបរិវេណសាលាខេត្តកំពត ។
ក្នុងឱកាសនោះដែរ ឯកឧត្តម ជាវ តាយ ប្រធានគណៈកម្មាធិការសាខា បានថ្លែងអំណរអរគុណយ៉ាងជ្រាលជ្រៅចំពោះទឹកចិត្តសប្បុរសធម៌របស់ឯកឧត្តម និងលោកជំទាវ បាននាំយកមកនូវគ្រឿងឧបភោគ បរិភោគ និងសម្ភារប្រើប្រាស់ ទាំងនេះប្រគល់ជូនដល់សាខា ហើយសាខានឹងយកគ្រឿងឧបភោគ បរិភោគ សម្ភារ ទាំងនេះទៅចាត់ចែងតាមតម្រូវការ ដើម្បីជួយដល់ជនងាយរងគ្រោះទាំងឡាយ ឲ្យស្របតាមគោលការណ៍គ្រឹះទាំង៧ប្រការរបស់ចលនាកាកបាទក្រហម និងសូមជូនពរឯកឧត្តម និងលោកជំទាវ ព្រមទាំងក្រុមការងារមានសុខភាពល្អ និងទទួលបានជ័យជំនះគ្រប់ភារកិច្ច។
សូមជម្រាបថា ថវិកា និងសម្ភារដែលប្រគល់ជូនសាខារួមមាន៖ អង្ករ១០តោន ទឹកសុទ្ធ១០០កេស ម៉ាស៥កេសធំ អាល់កុល១២០លីត្រ ជែលលាងដៃ១៥កេស និងថវិកា៤,០០០,០០០រៀល (បួនលានរៀល)ផងដែរ៕ សេង ណារិទ្ធ
