ខេត្តប៉ៃលិន ៖ តាំងពីដើម រហូតមកដល់បច្ចុប្បន្ន នៅក្នុងខេត្តប៉ៃលិន គេមិនធ្លាប់ ឃើញមានករណី ប្រជាពលរដ្ឋធ្វើបាតុកម្ម ឬកូដកម្ម អ្វីធំដុំគួរឱ្យកត់សម្គាល់នោះឡើយ គ្រាន់តែមានបញ្ហាប្រជាពលរដ្ឋប្រហែល៣០ទៅ៤០នាក់ បាននាំគ្នាឡើងមកសាលាខេត្ត ដើម្បីតវ៉ាទាមទារ ពាក់ព័ន្ធនឹងបញ្ហាដីធ្លី និងបញ្ហាទាមទារ ឱ្យតុលាការធ្វើការដោះលែងយុវជនម្នាក់ប៉ុណ្ណោះ ពាក់ព័ន្ធនឹងអំពើហិង្សា ហើយខាងអាជ្ញាធរខេត្ត ក៏បានធ្វើការដោះស្រាយ និង អន្តរាគមន៍ជូនពួកគាត់ភ្លាមៗជូនពួកគេដោយសន្តិវិធី ។ ម្យ៉ាងវិញទៀត ក្នុងវិស័យការ ងារ ក៏ដូចជាហេដ្ឋារចនាសម្ព័ន្ធផ្លូវថ្នល់ សាលារៀន នៅក្នុងខេត្តនេះ រយៈពេលប៉ុន្មានឆ្នាំចុ ងក្រោយ មានការរីកចម្រើនគួរឱ្យកត់សម្គាល់ផងដែរ ។
នេះជាការលើកឡើងរបស់លោក កើត សុធា អភិបាលខេត្តប៉ៃលិន ក្នុងវគ្គបណ្តុះបណ្តាលស្តីពីការពង្រឹងសមត្ថភាពក្នុងការដោះស្រាយវិវាទការងារ ការទប់ស្កាត់ និងដោះស្រាយបញ្ហាកូដកម្ម បាតុកម្ម ក្រោមអធិបតីភាព លោក ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ដោយមានការចូលរួមពីកងកម្លាំងប្រដាប់អាវុធ និង មន្ត្រីរាជការមកពីជុំវិញសាលាខេត្តយ៉ាងច្រើ នកុះករ ។
ចំណែកលោក ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជា ជីវៈ បានឱ្យដឹងថា រយៈពេលប៉ុន្មានឆ្នាំកន្លងមកនេះ ការអភិវឌ្ឍន៍សេដ្ឋកិច្ចជាតិ មានការរីកចម្រើនយ៉ាងចាប់រហ័ស ដោយក្នុងនោះវិស័យកម្មន្តសាល មានការអភិវឌ្ឍន៍យ៉ាងលឿន ហើយមានគ្រឹះស្ថានផលិតកម្ម សេវាកម្មជាច្រើន ត្រូវបានបង្កើតឡើង ផ្តល់ការងារធ្វើរាប់ លាន ដល់ប្រជាពលរដ្ឋ ។
លោកបន្តទៀតថា ទន្ទឹមនឹងការអភិវឌ្ឍន៍សេដ្ឋកិច្ចការអនុវត្តសិទ្ធិសេរីភាពក្នុងការបង្កើតសហជីព អង្គការ វិជ្ជាជីវៈ សិទ្ធិកូដកម្ម បាតុកម្ម ត្រូវបានធានាដោយច្បាប់ និងបានអនុវត្តយ៉ាងទូលំទូលាយ ។ ប៉ុន្តែថ្មីៗ នេះ មានកូដកម្ម បាតុកម្មនៅតាមរោងចក្រ សហគ្រាស គ្រឹះស្ថាន បានកើតឡើងជាបន្តបន្ទាប់ ក្នុងនោះមានករណីខ្លះ ញុះញង់ បង្កភាពអនាធិបតេយ្យ បង្កើតអំពើហិង្សា បំផ្លាញទ្រព្យសម្បត្តិសាធារណៈ ទ្រព្យសម្បត្តិឯកជន និងធ្វើឱ្យប៉ះពាល់ដល់សន្តិសុខសណ្តាប់ធ្នាប់សាធារណៈ ។
លោកបញ្ជាក់ទៀតថា លើសពីនេះ កម្មករយើង ក៏ត្រូវបានក្រុមជនមួយចំនួនបង្ខិតបង្ខំធ្វើការអូសទាញ បោកបញ្ឆោត ញុះញង់ឱ្យចូលរួមធ្វើកូដកម្ម បាតុកម្មជាដើម ។ ចំណែកនិយោជកនៃគ្រឹះ ស្ថានមួយចំនួនអនុវត្តមិនបានគ្រប់គ្រាន់ទៅតាមច្បាប់ជាធរមាន ធ្វើឱ្យប៉ះពាល់ដល់ផលប្រយោជន៍របស់និយោជិត ហើយមិនព្រមសហការដោះស្រាយបញ្ហាឱ្យបានឆាប់រហ័ស ដែលជាហេតុនាំឱ្យកើតមានកូដកម្ម បាតុកម្ម ទាំងនេះឡើង ។
បាតុភាពនេះ បានធ្វើឱ្យសាធារណៈជនមានការព្រួយបារម្ភ ព្រោះធ្វើឱ្យប៉ះពាល់ដ ល់បរិយាកាសវិស័យវិនិយោគ ធ្វើឱ្យប៉ះពាល់ដល់ជីវភាពកម្មករ ។ ដូច្នេះ ត្រូវតែអន្តរាគមន៍ បង្ការ ទប់ស្កាត់ ដោះស្រាយ និងតម្រង់ទិសដៅ ក្នុងការអនុវត្តសិទ្ធិធ្វើកូដកម្ម ឱ្យស្របតាមច្បាប់ស្តីពីការងារ និងអនុវត្តសិទ្ធិធ្វើបាតុកម្មឱ្យស្របតាមច្បាប់ ស្តីពីការធ្វើបាតុកម្មដោយសន្តិវិធី ដែលរាជរដ្ឋាភិបាលបានដាក់ចេញនូវបទបញ្ជា ។ ម្យ៉ាងវិញទៀត ក្នុងករណីមានអំពើហិង្សា សមត្ថកិច្ច ត្រូវចាត់ការ ជនល្មើសដោយកសាងសំនុំរឿងបញ្ជូនទៅតុលាការ ដើ ម្បីចាត់ការតាមនីតិវិធី ៕
ដោយ ៖ នីយ៉ា
