ភ្នំពេញ ៖ ព្រឹកថ្ងៃ ច័ន្ទ ទី ២៩ ខែសីហា ឆ្នាំ២០១៦ វេលាម៉ោង ៨ៈ៣០នាទី នៅក្នុងក្លិបអ្នកកាសែតឯករាជ្យបានប្រារឰបើក កិច្ចប្រជុំជ្រើសរើសប្រធាន-អនុប្រធាន និងបញ្ចូលសមាជីកថ្មី ក្រោមអធិបតីភាពលោក ហ៊ុន សុខា ប្រធានក្លិបអ្នកកាសែត ឯករាជ្យ និងជាអគ្គនាយកទូរទស្សន៍អនឡាន C.P.N ។ ក្រោយពីការឡើងរាយការណ៍ និងស្វាគមន៍ភ្ញៀវរបស់លោក ហៀង វណ្ណារ៉ា អនុប្រធានក្លិបអ្នកកាសែតឯករាជ្យរួចមក លោក ហ៊ុន សុខា បានឡើងមានមតិសំណេះសំណាលជាមួយសមាជិក-សមាជិកាក្លិប ដែលបានចូលរួមចំនួន ៥០នាក់ សរុបចាងហ្វាងកាសែតជាង ៤០នាក់ ។
លោក ហ៊ុន សុខា មានប្រសាសន៍ថា សមាជិក-សមាជិកានៅក្នុងក្លិបទាំងអស់មិនថា និន្នាការនយោបាយរបស់គណ បក្សណាមួយក៏ដោយត្រូវតែប្រកាន់ក្រមសីលធម៌ អ្នកសារព័ត៌មាន គោរពសិទ្ធិ វិជ្ជាជីវៈ អ្នកសារព័ត៌មាន យោគយល់គ្នា ស្រឡាញ់គ្នា ។ លោកមានប្រសាសន៍បន្តទៀតថា ខ្ញុំបានបង្កើតវើកសាយជូនបងប្អូនគ្រប់ៗគ្នាហើយគ្រប់ទាំងចាងហ្វាងជាង ៤០នាក់ ដូច្នេះត្រូវតែមានអត្ថបទឡើងជារៀងរាល់ថ្ងៃ ក្នុងគេហទំព័រជាប់ជាប្រក្រតី ។
លោកបន្តទៀតថា ចាងហ្វាងកាសែតជាង ៤០នាក់ គឺត្រូវតែឈរឈ្មោះបោះឆ្នោតជ្រើសរើសប្រធាន-អនុប្រធាន នៅក្នុងក្លិបនៅខែក្រោយនេះហើយ ដូច្នេះត្រូវត្រៀមខ្លួនជាស្រេចក្នុងការបោះឆ្នោត ៕
