កាលពីវេលាម៉ោង១នឹង៣០នាទីរសៀល ថ្ងៃទី២៩ សីហា ២០១៦ ខណៈអ្នកកាសែតទាំងពីរនាក់នោះ បានចុះទៅផ្តិតរូបភាពស្ពានឈើមួយកន្លែង ដែលបានបាក់កាលពីថ្ងៃទី១៨ សីហា ។
លោក សាយ ករុណា អ្នកយកព័ត៌មានបានឲ្យដឹងថា បន្ទាប់ពីមានការសំនូមពរ ពីប្រជាពលរដ្ឋរស់នៅចំនុចប៉ោដើមស្វាយ ក្នុងភូមិខ្ទង់ ឃុំស្រែព្រះ ស្រុកកែវសីមា ថា មានករណីមន្ត្រីអាវុធហត្ថបានយកលុយពីប្រជាពលរដ្ឋ ដែលបានឆ្លងកាត់ តាមស្ពានឈើដែលបានធ្វើប៉ុណ្តោះអាសន្ន ក្នុងរថយន្តមួយគ្រឿងតម្លៃចាប់ពី៥ ០០០៛ទៅ១៥ ០០០៛ ចំណែកម៉ូតូតម្លៃ២០០០៛។
លោកបន្តថា ក្រោយទទួលបានព័ត៌មាននេះរួច លោកបានចុះទៅកាន់ទីតាំងខាងលើផ្ទាល់ ដែលមានចម្ងាយពីទីរួមខេត្តប្រមាណជាង៨០គីឡូម៉ែត្រ រួមដំណើរជាមួយលោក វ៉ាន់ ភារម្យ ភ្នាក់ងារកាសែតអរិយធម៏ ដើម្បីយកព័ត៌មានចុះផ្សាយ ឲ្យបានដឹងឮ ដល់អភិបាលខេត្តឬប្រមុខរាជរដ្ឋាភិបាល បានជួយសម្រួល ការលំបាក ជូនពលរដ្ឋដែលកំពុងមានខ្វះខាត។
នៅពេលដែលក្រុមអ្នកយកព័ត៌មានកំពុងតែទាញទូរសព្ទថតរូបភាពស្ពានឈើដែលមានបណ្តោយប្រមាណ១០ម៉ែត្រ ទទឹង៦ម៉ែត្រ ស្រាប់តែមានមនុស្សប្រុសពីរនាក់ បានដើរចេញពីតូប មួយ ក្រោមស្វាយ(តូបពួកគេដេកយាមស្ពានចាំយកលុយ)មកសួរនាំក្រុមអ្នកយកព័ត៌មានថា នៅខាងណា?មកថតមានការអី?
ក្រោយពីសួរនាំក្រុមអ្នកយកព័ត៌មានហើយពួកគេថែមទាំងបានសម្លុតឲ្យអ្នកកាសែតលុបរូបភាពដែលបានថតចោល ប្រសិនបើមិនចង់មានរឿង(sic) ។បុរសទាំងពីរនាក់ដែលបានអះអាងថា ខ្លួនគឺជាអាវុធហត្ថខេត្តមណ្ឌលគិរីនោះ ត្រូវបានគេស្គាល់ឈ្មោះថា គាំ សាគុណ (ដំបូងថា ខ្លួនឈ្មោះ សាក់ សាគុណ) នឹងម្នាក់ទៀតឈ្មោះ ខេន ។
ពលរដ្ឋដែលបានឃើញហេតុការណ៏ខាងលើបានរិះគន់ចំពោះសកម្មភាពបុគ្គលទាំងពីរខាងលើយ៉ាងខ្លាំង ព្រោះក្រុមអ្នកកាសែតដែលបានចុះទៅយកព័ត៌មាននោះ គឺគ្រាន់ចង់បានព័ត៌មានច្បាស់ការណ៏ដើម្បី ផ្សព្វផ្សាយជូនថ្នាក់ដឹកនាំខេត្តក៏ដូចមន្ត្រីពាក់ព័ន្ឋ យកចិត្តទុកដាក់ជួយសាងសង់ស្ពានជូន ពលរដ្ឋបានប្រើប្រាស់វិញ។ពលរដ្ឋបានលើកឡើងថា អាចមកពីពួកគេខ្លាចខាតបង់ប្រយោជន៏ផ្ទាល់ខ្លួនទើបមានប្រតិកម្មដល់ក្រុមអ្នកការសែតយ៉ាងដូច្នេះ។
លោក សាក់ សារុន មេបញ្ជាការកងរាជអាវុធហត្ថស្រុកកែវសីមា បានឲ្យដឹងថា ឈ្មោះ គាំ សាគុណ នឹងឈ្មោះខេន មិនមែនជាមន្ត្រីប៉េអឹមរបស់លោកឡើយ។ពួកគេគ្រាន់ជាប្រជាជនសាមញ្ញាប៉ុណ្ណោះ។
លោក ស៊ិន វណ្ណវុឌ្ឍ អភិបាលស្រុកកែវសីមាបានឲ្យដឹងថា ស្ពានដែលបានបាក់ខាងលើកន្លងមកគឺក្រុមហ៊ុនអភិវឌ្ឍន៏ដំនាំកៅស៊ូជាអ្នកធ្វើ(សង់ពីឈើធំៗជាច្រើនដើមតម្រៀបគ្នា)។ចំណែកឈ្មោះទាំងពីរខាងលើ លោកនឹងបន្តសួរទៅខាងអាវុធហត្ថបន្ថែមទៀត ព្រោះពួកគេបានយកឈ្មោះអាវុធហត្ថទៅប្រើ ដើម្បីបានលុយពីពលរដ្ឋឆ្លងស្ពាន។
សហគមន៏ឃុំស្រែ ព្រះបានទទូច ដល់អាជ្ញាធរខេត្តមណ្ឌលគិរី មេត្តាចុះត្រួតពិនិត្យករណីនេះផង កុំឲ្យមានជនឆ្លៀតឱកាសកេងចំនេញលើកម្លាំងញើញឈាមរាស្ត្រដូច្នេះ៕
