កំពត ៖ បុរសម្នាក់បានសំរេចចិត្តដាក់ពាក្យបណ្តឹង ចូលតុលាការ អោយជួយរកយុត្តិធម៌ ដោយចោទថា ពេលគាត់លេងចាញ់ម៉ាស៊ីនដើរធម្មតា តែពេលលេងឈ្នះម៉ាស៊ីន បែរជារអាក់រអួល ហើយម្ចាស់មានចេតនាមិនចង់ស៊ីសង ខណៈគាត់ចាញ់ល្បែងបៀនេះអស់ ១៦០០ ដុល្លារ។
ករណីនេះ កើតឡើង កាលពីព្រឹកថ្ងៃទី២៤ សីហា ២០១៦ នៅក្នុងហាងអ៊ិនធើណិតមួយកន្លែង ស្ថិតក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត ។
ម្ចាស់ទីតាំងនេះ ត្រូវបានស្គាល់មានឈ្មោះ ជិន យ៉ាន្នី ហៅ ពេជ្រ ភេទប្រុសអាយុ៣៨ឆ្នាំ ។
បុរសដែលអះអាងថា ម្ចាស់បនល្បែង ប្រើល្បិចកៀបស៊ីនេះ បានអោយដឹង កាលពីរសៀលថ្ងៃទី២៥ ខែសីហា ឆ្នាំ២០១៦ ថា រូបគាត់បានដាក់ពាក្យបណ្ដឹង ទៅសាលាដំបូងខេត្តកំពត ដោយចោទប្រកាន់អ្នកបើកអ៊ីនធើណេតមួយកន្លែងថា បើកល្បែងស៊ីសង ដោយប្រើល្បិចកៀបស៊ីតាមកុំព្យូទ័រ និងប្រព័ន្ធអ៊ីនធើរណេត បន្ទាប់ពីគាត់បានលេងបៀបាការ៉ាត់ចាញ់អស់ប្រាក់ ១ ម៉ឺន ៦ ពាន់ដុល្លារ ដោយការកៀបស៊ី ធ្វើអោយគាំងម៉ាស៊ីន ។
យោងតាមពាក្យបណ្ដឹង បានឲ្យដឹងថា លោក លឹម ទ្រី អាយុ៥៣ឆ្នាំ មុខរបរលក់ដូរ មានទីលំនៅភូមិត្រពាំងធំ ឃុំជុំគ្រៀល ស្រុកទឹកឈូ ខេត្តកំពត បានប្តឹងចោទប្រកាន់ឈ្មោះ ជិន យ៉ាន្នី ហៅ ពេជ្រ មុខរបរបើកបើកអ៊ីនធើរណេតនៅភូមិកំពង់បាយខាងត្បូង សង្កាត់កំពង់បាយ ក្រុងកំពត ។
យោងតាមពាក្យបណ្ដឹងបានឲ្យដឹងទៀតថា រយៈពេល៤-៥ថ្ងៃជនរងគ្រោះបានលេងល្បែងចាញ់អស់១ម៉ឺន៦ពាន់ដុល្លារព្រោះស្មានថាលេងដោយយុត្តិធម៌ តែតាមពិតគឺមានល្បិច ដោយពេលគាត់លេងកំពុងឈ្នះ ស្រាប់តែបិទអ៊ីនធើរណេតទូររបស់គាត់ដើម្បីឲ្យពិបាកឈ្នះ ។
នៅក្នុងពាក្យបណ្ដឹងបានចោទប្រកាន់ទៀតថា បន្ទាប់ពីជនរងគ្រោះដឹងថាជាល្បិច កន្លែងអ៊ីនធើរណេតនោះក៏បានបិទទ្វារដើម្បីកុំឲ្យអាជ្ញាធរដឹងឮ ហើយជនរងគ្រោះក៏បានដឹងដែរថា កន្លែងនោះគ្មានច្បាប់ដែរ តែម្ចាស់ទីតាំងនោះអះអាងប្រាប់គាត់ថា “ប្តឹងដល់ណាប្តឹងទៅ ព្រោះសុទ្ធតែបក្សពួកវា វាបានបង់ឲ្យអាជ្ញាធរអស់រាប់ពាន់ដុល្លារជារៀងរាល់ខែអស់ហើយ” ។
ជនរងគ្រោះ ក្នុងល្បែងបៀបាការរ៉ាត់នេះ បានសំណូមពរ ដល់រដ្ឋមន្ត្រីក្រសួងមហាផ្ទៃ សម្តេចក្រឡាហោម ស ខេង និងនាយឩត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ចាការ កងរាជអាវុធហត្ថលើផ្ទៃប្រទេស សូមចាត់មន្ត្រីពីលើមកបង្ក្រាបផង ព្រោះបើទុកអោយមន្ត្រីនៅខេត្តបង្ក្រាបហាក់ទៅមិនរួចឡើយ ។
ជនរងគ្រោះបន្តថា “លោកមិនចង់អោយមានអ្នករងគ្រោះដូចលោកទៀតទេ” ហើយការដែលលោក ហា៑នចូលមកលេង ក៏ព្រោះតែម្ចាស់ទីតាំងនេះអះអាងថា មិនបាច់ភ័យព្រួយរឿងសមត្ថកិច្ចចាប់នោះទេ ព្រោះគេបង់លុយអស់រាប់ពាន់ដុល្លារទៅអោយអស់លោកសមត្ថកិច្ចធំៗអស់ហើយ” ។
ទាក់ទងនឹងការលើកឡើងថា ម្ចាស់ទីតាំងខាងលើ បានបង់លុយអោយអាជ្ញាធរជាន់ខ្ពស់ គ្រប់លំដាប់ថ្នាក់ រួមទាំងស្ថាប័នតុលាការផងដែរ ។
ទាក់ទងនឹងបញ្ហានេះដែរ លោកឩត្តមសេនីយ៍ត្រី ម៉ៅ ច័ន្ទមធុរឹទ្ធ ស្នងការនគរបាល ខេត្តកំពតបានអោយដឹង តាមទូរស័ព្ទកាលពីរសៀលថ្ងៃទី២៥ សីហា ២០១៦ ថា លោកមិនបានដឹងរឿងនេះទេ លោកនឹងចាត់អោយមន្ត្រីចុះទៅពិនិត្យមើលទីតាំងខាងលើនេះ ដោយលោកប្រាប់ថា ពេលនេះលោកកំពុងនៅប្រទេសថៃ ។
ចំណែកលោក ឯក ឆេងហួត ព្រះរាជអាជ្ញាខេត្តកំពត បានអោយដឹងតាមទូរស័ព្ទដែរថា “ខាងលោកបានទទួលពាក្យបណ្តឹង ហើយនៅសប្តាហ៍ក្រោយលោកនឹងចាត់អោយព្រះរាជអាជ្ញារងចាត់ការរឿងនេះ” ។
ពាក់ព័ន្ធនឹងការលើកឡើងថា ម្ចាស់ទីតាំងខាងលើបង់លុយខែ អោយស្ថាប័នមានសមត្ថកិច្ចគ្រប់លំដាប់ថ្នាក់នោះ លោកព្រះរាជអាជ្ញាបានបដិសេធថា “លោកមិនដែលស្គាល់ម្ចាស់ទីតាំងនោះ ហើយក៏គ្មានពាក់ព័ន្ធលុយកាក់អ្វីដែរ” ។
រហូតមកដល់រសៀលថ្ងៃទី២៥ ខែសីហា ឆ្នាំ២០១៦នេះ «កោះសន្តិភាព» ព្យាយាមទាក់ទងទៅលោក ជិន យ៉ាន្នី ហៅ ពេជ្រ ជាម្ចាស់ទីតាំងអ៊ីនធើណេតដែរ តែទំនាក់ទំនងមិនអាចធ្វើទៅបានសោះ ។
គួរបញ្ជាក់ថា ទីតាំងមួយនេះ តាមសេចក្តីរាយការណ៍ គឺបានបើកដំណើរការច្រើនឆ្នាំមកហើយ មិនដែលឃើញមានអស់លោកសមត្ថកិច្ចណាមូយចុះបង្ក្រាបសោះឡើយ ។ មិនដឹងថាម្វាស់ទីតាំងមួយនេះ មានខ្នងបង្អែកប៉ុណ្ណានោះទេ ទើបបានជាសមត្ថកិច្ចនគរបាលក៏ដូចជាអាវុធហត្ថមិនហា៑នបង្ក្រាប។
បើតាមមន្ត្រីតុលាការមួយរូបលួចបង្ហើបថា មិនមែនតុលាការមិនចង់ធ្វើនោះទេ កាលពីមុនមានព្រះរាជអាជ្ញារងធ្លាប់បានបង្ក្រាបម្តងដែរ តែហាក់មិនមានប្រសិទ្ធភាពឡើយ ខណៈមានអ្នកអន្តរាគមន៍សុទ្ឋតែមន្ត្រីនគរបាលជាន់ខ្ពស់ ៕
