ខេត្តប៉ៃលិន ៖ មានសេចក្តីរាយការណ៍ពីមន្ត្រីយោធាប្រចាំការនៅព្រំដែនកម្ពុជាថៃម្នាក់ ដែលសម្តែងនូវការមិនពេញចិត្ត និងសោកស្តាយ បានឱ្យដឹងថា ផ្លូវលំមួយកន្លែង ដែលប្រជាពលរដ្ឋ និងទាហានខ្មែរ ឆ្លងកាត់ចេញចូលទៅមករាល់ថ្ងៃ ត្រូវបាននាយឧត្តមសេនីយ៍ត្រីខ្មែរម្នាក់ ប្រចាំការនៅច្រកទ្វារអន្តរជាតិព្រំ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ បាននាំទាហានថៃ ជាច្រើននាក់ ទៅធ្វើការបិទផ្លូវលំនោះ មិនឱ្យឆ្លងកាត់ទៅមក ខណៈទឹកដីខ្មែរមានចម្ងាយពីផ្លូវ ដែលគេបិទនោះ ឆ្លងអូរទៅទិសខាងលិច រហូតដល់ជាង២គីឡូម៉ែត្រឯណោះ ។
ហេតុការណ៍បិទផ្លូវមិនឱ្យពលរដ្ឋខ្មែរ និងទាហានខ្មែរ ឆ្លងទៅមកនេះ បានកើតឡើងកាលពីថ្ងៃទី១៩ ខែសីហា ឆ្នាំ២០១៦ កន្លងទៅនេះ ស្ថិតនៅចន្លោះអូរទុរ៉េន២ដើម ក្នុងភូមិបហ៊ុយត្បូង សង្កាត់បយ៉ាខា ក្រុងប៉ៃលិន ។
ប្រភពព័ត៌មានពីមន្ត្រីយោធាម្នាក់ មិនបញ្ចេញឈ្មោះបានឱ្យដឹងថា ដីដែលថៃនាំគ្នាជិះរថយន្តឆ្លងកាត់តាំងពីព្រំ រហូតទៅដល់កន្លែងបិទរបងមិនឱ្យប្រជាពលរដ្ឋខ្មែរ និងយោធាខ្មែរឆ្លងកាត់ទៅមកដូចសព្វមួយដងនោះ ដោយសារតែខ្មែរយើងជាអ្នកបើកដៃឱ្យទៅគេ មិនមែនថៃខ្លួនឯង ជាអ្នកចូលមកយកនោះឡើយ គឺខ្មែរយើងច្បាស់ពេក ដោយអះអាងថា ជាដីរបស់អ្នកនេះ របស់អ្នកនោះ ។ តាមពិតដីរបស់ខ្មែរយើងមានចម្ងាយហួសពីកន្លែង ដែលគេបិទរបងនោះ ទៅខាងលិចជាង២គីឡូម៉ែត្រឯណោះ ។ តែខាងលោកមិនហ៊ាននិយាយនោះឡើយ ព្រោះនៅក្រោមបង្គាប់គេដែរ ហើយក៏មិនធ្លាប់ឃើញមានគណៈកម្មាការព្រំដែនខ្មែរថៃ ណាម្នាក់ ចុះទៅធ្វើការត្រួតពិនិត្យ ឬវាស់វែងអ្វីនោះឡើយ ។
លោកបន្តទៀតថា មុនដំបូងថៃឱ្យខ្មែរយើងជីកកកាយបើកប្រឡាយទឹក ត្រង់ដីច្រមុះជ្រូក ក្បែរស្ពានដែលខ្មែរយើងទើបនឹងសាងស ង់ ដើម្បីឱ្យទឹកហូរចូលទៅក្នុងប្រឡាយនោះវិញ បើមិនធ្វើអ៊ីចឹងទេ នឹងមានរឿងកើតឡើង ដូច្នេះថ្នាក់លើមិនចង់ឱ្យមានបញ្ហា ទើបបញ្ជាឱ្យខាងលោកបិទផ្លូវតែម្តង។ ម្យ៉ាងវិញទៀត លោកជាអ្នកការពារព្រំដែន ចាប់ពីឡាក់៦៨ ទៅ៦៩ ហើយដោយខាងខ្មែរយើងអះអាងថា ដីនេះជារបស់គេ ខាងលោកដែលជាកូនចៅ មិនហ៊ានហើបមាត់នោះឡើយ ។ លោកបញ្ជាក់ទៀតថា បច្ចុប្បន្ននេះ លោកមានអាម្មណ៍ឈឺចុកចាប់ និងសោកស្តាយយ៉ាងខ្លាំង ដោយសារតែឃើញទឹកដីខ្មែរ ត្រូវគេចូលមកកាន់តែជិតទៅៗ តែមិនដឹងធ្វើយ៉ាងណានោះទេ ព្រោះតែខ្លួនតូចទាបជាងគេដែរ ។
ចំណែកប្រជាពលរដ្ឋជាច្រើននាក់រស់នៅក្រុងប៉ៃលិន បានបង្ហើបឱ្យដឹងថា ពួកគាត់ពិតជាមានការសោកស្តាយចំពោះទឹកដីយ៉ាងខ្លាំង ខណៈកន្លែងខ្លះ ដែលពីមុនជាទឹកដីរបស់ខ្មែរ តែបច្ចុប្បន្ន ស្រាប់តែក្លាយទៅជាដីរបស់ថៃទៅវីញ ដោយកាលពីដើមផ្លូវដែលថៃបិទនោះ គឺខ្មែរយើងធ្លាប់ឆ្លងកាត់ចេញចូលទៅមក ជាយូរយារណាស់មកហើយ តែក្រោយមក កាលពីប៉ុន្មានឆ្នាំក្រោយនេះ ថៃអះអាងថា ជាដីរបស់គេ ទើបខ្មែរយើងធ្វើផ្លូវវាងទៅលើភ្នំវិញ ដោយគ្មាននរណាម្នាក់ហ៊ានតវ៉ាឡើយ ។ ប្រភពបន្តទៀតថា កាលពីមុននៅម្ខាងអូរទៅខាងលិច ខ្មែរយើងអាចនាំគ្នាកាប់ឆ្ការព្រៃ ដើម្បីដាំដុះចិញ្ចឹមជីវិត តែក្រោយមកថៃបានហាមមិនឱ្យបន្តទៀតនោះឡើយ ព្រោះអះអាងថា ជាទឹកដីរបស់គេ ។ ចំណែកឯបង្គោលព្រំដែនអត់ឃើញមាននៅត្រង់កន្លែងណាមួយឱ្យច្បាស់លាស់នោះឡើយ សង្ស័យតែថៃនាំគ្នាវាយបំបែកខ្ទេចខ្ទីរ អស់ហើ យមើលទៅ ។
ពាក់ព័ន្ធទៅនឹងបញ្ហានេះ លោក កើត សុធា អភិបាលខេត្តប៉ៃលិន បានឱ្យដឹងថា កាល ពីថ្ងៃទី២២ ខែសីហា កន្លងទៅនេះ ខណៈលោកចុះទៅត្បួតពិនិត្យ អត់ឃើញមានអ្វីខុសប្រក្រ តីនោះទេ ក៏អត់មានព័ត៌មានអ្វីប្លែកនោះដែរ ដោយពីមុនមក ឮតែពាក្យចចាមអារាមដែរ លុះប ន្ទាប់ពីជួបខាងទាហានខ្មែរសួរនាំ អត់មានរឿងរ៉ាវអ្វីកើតឡើងនោះឡើយ ។ ម្យ៉ាងវិញទៀត បើមានការឯកភាពគ្នាយ៉ាងម៉េចក៏ឱ្យទៅអ៊ីចឹងចុះ ព្រោះអត់មានរឿងខុស និងរឿងត្រូវនោះឡើយ ។ អត់មានខាងណាចូលមកខាងណានោះដែរ ព្រោះមានយោធាយាមប្រចាំការរាល់ថ្ងៃ ។
ចំណែកលោកឧត្តមសេនីយ៍ត្រី ទី សុខា នាយរងសេនាធិការប្រចាំភូមិភាគ៥ បានឱ្យដឹង ថា ខាងលោកអត់បាននាំភាគីថៃទៅបិទផ្លូវនោះទេ ប៉ុន្តែខាងលោកបានទៅបើកព្រំដែននោះវិ ញ ព្រោះអីនៅខាងមុខបន្តិចទៀតមានដីបាក់គ្របពីលើផ្លូវ ទើបហាមមិនទាន់ឱ្យពលរដ្ឋឆ្លងកា ត់ទៅមក ក្រែងមានគ្រោះថ្នាក់ ។ ម្យ៉ាងវិញទៀត ខាងទាហានមិនឱ្យឆ្លងកាត់នៅមុខបន្ទាយទើបនឹងបិទផ្លូវនោះឡើយ ដើម្បីការពារដល់ពលរដ្ឋកុំឱ្យឆ្លងទៅកាប់ឈើថៃ ដែលនាំឱ្យមានបញ្ហាគ្រោះថ្នាក់ដល់អាយុជីវិត ។ លោកបន្តទៀតថា ខាងលោកបាននាំទាហានថៃ និងទាហា នខ្មែរ ចូលទៅពិនិត្យព្រំដែន ជាង១០រថយន្តឯណោះ ដោយមានទាំងយោធាខាងស៊ុបប៉ៃលិនចូលរួមផងដែរ ហើយសហការជាមួយកងទ័ពថៃ និងខ្មែរចុះត្រួតពិនិត្យព្រំដែន ។
លោកបញ្ជាក់ថា ខាងលោកជាអ្នកសម្របសម្រួលតាំងពីឡាក់លេខ៦៧ ៦៨ និង៦៩ រហូតទៅដល់ខាងមុខទៀត ឆ្ពោះទៅស្រុកសំឡូតខេត្តបាត់ដំបង ហើយមានដីបាក់នៅផ្នែកខាងមុខនៅហួសពីកន្លែងរនាំងឈើខាងមុខបន្តិចទៀតនោះ ទើបបិទផ្លូវតែម្តង ៕
ដោយ ៖ នីយ៉ា
