កំពត ៖ កាលពីពេលថ្មីៗនេះ ដោយមានការរៀបចំផែនការ និងទទួលបានសេចក្តីរាយការណ៍ពីប្រជាពលរដ្ឋដែលស្រលាញ់ធនធានធម្មជាតិ និងដោយសារការស្អប់ខ្ពើមចំពោះជនដែលបំផ្លិចបំផ្លាញធនធានធម្មជាតិរបស់រដ្ឋនោះ ទើបលោក ពេជ្រ គឿន ប្រធានស្នាក់ការស្តីទីអង្គការអភិរក្សព្រៃឈើ និងអភិវឌ្ឍធនធានធម្មជាតិប្រចាំខេត្តកំពតបាននាំកម្លាំងរបស់អង្គការចុះឃ្លាំមើលការកាប់រុករានទន្ទ្រានព្រៃ យកដីធ្វើជាកម្មសិទ្ធិ ក្នុងចំនុចឃុំត្រពាំងភ្លាំង និងដែនឧទ្យានជាតិព្រះមុនីវង្ស ក៏ប្រទះឃើញការដឹកជញ្ជូនឈើ ចុះពីលើភ្នំ។
ខណៈពេលនោះផងដែរ លោក ពេជ្រ គឿន ក៏បានរាយការណ៍ជូនលោក ហ៊ុន សុខា ប្រធានអង្គការអភិរក្សព្រៃឈើ និងធនធានធម្មជាតិ។ ក្រោយពីបានទទួលការបញ្ជាពីថ្នាក់លើ លោកពេជ្រ គឿន ក៏បានឃាត់ទុក និងរាយការណ៍ទៅមន្ត្រីជំនាញបរិស្ថានដើម្បីប្រមូលយកវត្ថុតាង ។
បន្ទាប់ពី មន្ត្រីជំនាញព្រៃឈើ ចុះទៅដល់ទីតាំងនោះលោក ពេជ្រ គឿន ក៏បានប្រគល់វត្ថុតាង និងឈ្មោះរបស់មេឈ្មួញឈើដុះស្លែ ជូនទៅមន្ត្រីជំនាញ ដែលមេឈ្មួញរូបនោះត្រូវបានគេស្គាល់ឈ្មោះថា ក្អាត់ ហៅប្រុស មាននាទីជាមន្ត្រីនគរបាលខេត្តកំពត (នេះបើតាមសម្តីរបស់អ្នកអូសឈើម្នាក់បានប្រាប់ឲ្យដឹង)។
បច្ចុប្បន្ននេះមន្ត្រីរបស់អង្គការអភិរក្សព្រៃឈើ និងអភិវឌ្ឍធនធានធម្មជាតិ កំពុងបន្តសកម្មភាពឃ្លាំមើលថាតើ ឈ្មោះក្អាត់នេះបំរើនៅអង្គភាពណា ដើម្បីរាយការណ៍ជូនព្រះរាជអាជ្ញាអមសាលាដំបូងខេត្តកំពត និងលោកឧត្តមសេនីយ៍ស្នងការនគរបាលខេត្តកំពតដើម្បីជ្រាបជាព័ត៌មាន និងចាត់វិធានការទៅលើឈ្មោះក្អាត់ ហៅប្រុស នេះរួមទាំងមេឈ្មួញ៦ទៅ៧នាក់ទៀតដែលកំពុងធ្វើសកម្មភាព ទៅតាមផ្លូវច្បាប់។
លោក ហ៊ុន សុខា ប្រធានអង្គការអភិរក្សព្រៃឈើ និងអភិវឌ្ឍធនធានធម្មជាតិ ក៏បានថ្លែងអំណរគុណចំពោះមន្ត្រីបរិស្ថាន និងនាយកឧទ្យានជាតិព្រះមុនីវង្ស ដែលបានចាត់វិធានការទាន់ពេលវេលា ចំពោះបទល្មើសធនធានធម្មជាតិក្នុងដែនដីរបស់លោក។
ចំពោះលោក អ៊ុក ឡាយ អភិបាលស្រុកទឹកឈូ គឺសម្ងំស្ងៀម មិនដែលឃើញយកចិត្តទុកដាក់ចំពោះធនធានធម្មជាតិក្នុងដែនដីគ្រប់គ្រងរបស់លោកឡើយ គឺរវល់តែកាងដីព្រៃធ្វើជាកម្មសិទ្ធិរបស់ខ្លួនទៅវិញ៕
