ខេត្តឧត្តរមានជ័យ ៖ នៅព្រឹកថ្ងៃទី២៣ ខែសីហា ឆ្នាំ២០១៦ មន្ត្រីសាខាកាំកុងត្រូលខេត្តឧត្តរមានជ័យ បានចុះទៅអង្កេតផ្សារស្រុកត្រពាំងប្រាសាទ ក្នុងសកម្មភាពចុះអង្កេតនោះដែរ មន្ត្រីកាំកុងត្រូលខាងលើ បានណែនាំក្រុមអាជីវករដែលលក់ទំនិញគ្រប់ប្រភេទទាក់ទងនឹងនំចំណី ទំនិញខូចគុណភាព គ្មានស្លាកសញ្ញាត្រឹមត្រូវ កាលបរិច្ឆេទហួសកំណត់ សំបកវេចខ្ចប់មិនត្រឹមត្រូវគ្មានអនាម័យ ផលិតផលនាំអោយប៉ះពាល់សុខភាពមានជាតិគីមី និងនំចំណី និងគ្រឿងបរិភោគដាក់លក់ក្នុងបរិយាកាសមិនត្រឹមត្រូវ។
មន្ត្រីកាំកុងត្រូលក៏បានបិទស្លាកសញ្ញា ដែលរៀបចំដោយអគ្គនាយកដ្ឋានកាំកុងត្រូលនៃក្រសួងពាណិជ្ជកម្ម ព្រមទាំងពន្យល់ក្រុមអាជីវករទាំងអស់អោយយល់ពីអត្ថន័យក្នុងស្លាកសញ្ញាដូចការរៀបរាប់ខាងលើ។ ជាលទ្ធផលក្នុងសកម្មភាពចុះអង្កេតនិងណែនាំនោះ មន្ត្រីកាំកុងត្រូលក៏បានដកហូតនំចំណីក្មេង និងគ្រឿងកំប៉ុងគ្មានស្លាកសញ្ញា ខូចគុណភាព ទឹកអាស៊ីដដែលកន្លងមកប្រជាពលរដ្ឋតែងតែយកទៅប្រើជាទឹកខ្មេះ។ គួរបញ្ជាក់ដែរថា កន្លងមកប្រជាពលរដ្ឋក៏ដូចជាក្មេងៗក្នុងខេត្តឧត្តរមានជ័យ តែងធ្លាប់បានពុលនូវនំចំណី និងទំនិញខូចគុណភាពផងដែរ។
គេតែងបានសន្និដ្ឋានជាទូទៅថា បច្ចុប្បន្ននេះបញ្ហាសុខភាពរបស់មនុស្ស តែងមានការទន់ខ្សោយ ព្រោះមានការប៉ះពាល់ដោយការបរិភោគអាហារដែលមានជាតិគីមី។ ជាមួយនេះដែរក៏បណ្តាលមកពីចំណីអាហារខូចគុណភាព។ ដូចនេះហើយទើបមន្ត្រីកាំកុងត្រូលធ្វើការពិនិត្យអង្កេតយ៉ាងដិតដល់ពីបញ្ហាគុណភាព ទំនិញហូបចុកដែលដាក់លក់នៅតាមទីផ្សារនោះ៕
