ភ្នំពេញ ៖ លោក ជា ហ៊ាន ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ បានធ្វើលិខិតគោរពជូន សម្តេច ហេង សំរិន ប្រធានរដ្ឋសភា ស្នើសុំជួយអន្តរាគមន៍ទៅសម្តេចនាយករដ្ឋមន្ត្រី ហ៊ុន សែន និង ឯកឧត្តម រដ្ឋមន្ត្រីក្រសួងបរិស្ថាន ចាត់ក្រុមអធិការកិច្ច អង្កេតទៅលើឧទ្យានុរក្សបរិស្ថានតាមមាត្រា ៦៤ នៃតំបន់ការពារធម្ម ជាតិ និងបញ្ឈប់ឱ្យមានការកាប់ឈើនៅតំបន់អភិរក្សជួរភ្នំក្រវ៉ាញ ស្ថិតក្នុងភូមិសាស្ត្រខេត្តកោះកុង ពោធិ៍សាត់ កំពង់ស្ពឺ និងកំពង់ឆ្នាំង ។
លិខិតរបស់លោក ជា ហ៊ាន ប្រធានអង្គការ ប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារ សិទ្ធិពលរដ្ឋ ចុះថ្ងៃទី ០៨ ខែសីហា ឆ្នាំ២០១៦ បានបញ្ជាក់ជូន សម្តេច ហេង សំរិន ប្រធានរដ្ឋសភាថា “ចាប់ពីថ្ងៃទី ០៥ ខែមីនា ឆ្នាំ២០១៦ បន្ទាប់ពីអង្គការបានទទួលបណ្តឹងពីពលរដ្ឋថា ក្នុងតំបន់អភិរក្សជួរភ្នំក្រវាញ មានសកម្មភាពកាប់បំផ្លាញ ព្រៃឈើដឹកជញ្ជូនទៅលក់នៅប្រទេសវៀតណាម តាមច្រកព្រំដែនខេត្តតាកែវ និងខេត្តកំពត”។
លោក ជា ហ៊ាន ប្រធានអង្គការ បានបញ្ជាក់ថា “ខ្ញុំបានដាក់សំណើសុំជាច្រើនច្បាប់ទៅសម្តេចតេជោ ហ៊ុន សែន ដែរ តាមរយៈទីស្តីការគណៈរដ្ឋមន្ត្រី ប៉ុន្តែរយៈពេលកន្លងមកមិនទាន់មានការទប់ស្កាត់បទល្មើសទាំងនោះនៅឡើយទេ ហើយខ្ញុំក៏បានអង្កេតបន្តបន្ទាប់មកទៀតឃើញថា បទល្មើសនៅតែចេញ ។ អីចឹងខ្ញុំក៏បានដាក់លិខិតទៅសម្តេច ប្រធានរដ្ឋសភា មុននឹងចូលរួមចោទសួរទៅតំណាងរដ្ឋាភិបាល នៅថ្ងៃទី២២ ខែសីហា ខាងមុខនេះ បន្ទាប់ពីរដ្ឋាភិបាលគាត់ បង្កើតទិវាបរិស្ថាន នៅថ្ងៃទី ២២ ។ ខ្ញុំសង្ឃឹមថា សម្តេចប្រធានរដ្ឋសភា នឹងអន្តរាគមន៍ទៅសម្តេចប្រមុខរាជរដ្ឋាភិបាល ក្នុងការកាប់បំផ្លាញព្រៃឈើ ព្រោះបទបញ្ជារបស់រាជរដ្ឋាភិបាលតែងតែដាក់បទបញ្ជាជាបន្តបន្ទាប់ ប៉ុន្តែថ្នាក់ក្រោមមិនអនុវត្ត ទៅតាមបទបញ្ជា ។ ខ្ញុំសង្ឃឹមថា រដ្ឋសភា នឹងយកចិត្តទុកដាក់ និងជួយអន្តរាគមន៍ទប់ស្កាត់ការបំផ្លាញព្រៃឈើនេះ ឱ្យបានស្របទៅតាមគោលការណ៍ស្តីពីតំបន់ការពារធម្មជាតិ”។
លោក ជា ហ៊ាន បានបន្តឱ្យដឹងទៀតថា ឈើដែលក្រុមឈ្មួញដឹកទៅលក់នៅប្រទេសវៀតណាម តាមច្រកព្រំដែនខេត្តតាកែវ កំពតនោះ គឹឈើកាប់មកពី ស្រុកភ្នំក្រវាញ ស្រុកវាលវែង ខេត្តពោធិ៍សាត់ និងស្រុកស្រែអំបិល ស្រុកថ្មបាំង ខេត្តកោះកុង ។ មួយផ្នែកទៀត ស្រុកឱរ៉ាល់ ខេត្តកំពង់ស្ពឺ តំបន់ដែនជម្រកសត្វព្រៃភ្នំឱរ៉ាល់ និងស្រុកទឹកផុស ខេត្តកំពង់ឆ្នាំង និងតំបន់ឧទ្យានជាតិគីរីរម្យ ដោយដឹកឆ្លង កាត់ទៅផ្លូវជាតិលេខ ៤៤ លេខ ៥២ លេខ ៤ ឆ្ពោះទៅផ្លូវ ៣១៧ ដើម្បីទៅចំណុចច្រកតន់ហន់ ស្រុកកំពង់ត្រាច ខេត្តកំពត និងច្រកភ្នំឌិន ខេត្តតាកែវ តាមផ្លូវឆ្លងកាត់មួយៗ ។ ក្នុងនោះក៏មានផ្នែករដ្ឋបាលព្រៃឈើផងដែរ តែពុំមានការទប់ស្កាត់ និងបង្ក្រាបបទល្មើសព្រៃឈើទាំងនោះ ឱ្យមានប្រសិទ្ធភាពឡើយ ។
បច្ចុប្បន្ននេះ បើទោះបី សម្តេចនាយករដ្ឋមន្ត្រី បានមានប្រសាសន៍កាលពីថ្ងៃទី ០១ ខែកក្កដា ឆ្នាំ២០១៦ នៅភូមិអន្លង់ជ្រៃ ឃុំប្រាំបីមុំ ស្រុកថ្ពង ខេត្តកំពង់ស្ពឺ ឱ្យមន្ត្រីឧទ្យានុរក្សបរិស្ថាន សហការគ្នាឱ្យបានល្អជាមួយប្រជាពលរដ្ឋ និងអង្គការសង្គមស៊ីវិល ដើម្បីជួយទប់ស្កាត់បទល្មើសព្រៃឈើ ដែលកើតមានឡើងក្នុងតំបន់អភិរក្សក៏ដោយ ក៏មន្ត្រីឧទ្យានុរក្សបរិស្ថាន មិនព្រមសហការជាមួយអង្គការ ប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារ សិទ្ធិពលរដ្ឋ ដើម្បីទប់ស្កាត់បទល្មើសព្រៃឈើក្នុងតំបន់អភិរក្សនោះទេ ។
លោក ជា ហ៊ាន បានសំណូមពរថា សូមសម្តេចអគ្គមហាពញាចក្រី ហេង សំរិន ប្រធានរដ្ឋសភា មេត្តាជួយធ្វើការអន្តរាគមន៍ទៅ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជា ដើម្បីឱ្យសម្តេច ធ្វើការអន្តរាគមន៍ទៅ ឯកឧត្តម រដ្ឋមន្ត្រីក្រសួងបរិស្ថាន ចាត់ក្រុមអធិការកិច្ច អង្កេតទៅលើឧទ្យានុរក្សបរិស្ថានតាមមាត្រា ៦៤ នៃតំបន់ការពារធម្ម ជាតិ និងបញ្ឈប់ឱ្យមានការកាប់បំផ្លាញព្រៃឈើក្នុងតំបន់អភិរក្សជួរភ្នំក្រវាញ និងដាក់ពិន័យចំពោះមន្ត្រីឧទ្យានុរក្សបរិស្ថាន តាមមាត្រា ៦៤ នៃតំបន់ការពារធម្មជាតិដោយក្តីអនុគ្រោះ ។
លោក ជា ហ៊ាន បានមានប្រសាសន៍ថា ក្រោយការដាក់លិខិត នេះ ហើយនឹងមានការឆ្លើយតបជាវិជ្ជមានពី សម្តេច ហេង សំរិន ប្រធានរដ្ឋសភា ក្នុងការស្នើទៅសម្តេចតេជោ ហ៊ុន សែន នាយករដ្ឋមន្ត្រី និងឯកឧត្តម រដ្ឋមន្ត្រីក្រសួងបរិស្ថាន ឱ្យពិនិត្យឡើងវិញ ពីបញ្ហាបទល្មើសព្រៃឈើ ៕
