ខេត្តកំពង់ធំ៖ ថ្មីៗនេះគេសង្កេតឃើញថាគ្មានឧបករណ៍នេសាទណាដែលធ្វើឲ្យហិនហោចដល់មច្ឆជាតិដូចជារបាំងណរ៉ាវសាច់ ក្រហមនិងខៀវជាច្រើនរយកន្លែងបានដាក់ស្ទាក់ចាប់ត្រីលាតសន្ធឹង តាមចរន្តទឹកហូររីកដូចផ្សិតនៅលើផ្ទៃបឹងទន្លេសាបជាពិសេស ក្នុងទឹកដីខេត្តកំពង់ធំ នៅចំណុចទ្វារបឹងផ្ទះឆេះ កោះតា .ប. គន្លុកបាយក្អែក និងនៅក្នុងតំបន់ស្នូលអភិរក្សស្ទឹងសែន ស្ថិតក្នុងឃុំផាត់សណ្តាយ ស្រុកកំពង់ស្វាយ ខេត្តកំពង់ធំ ។ បទល្មើសជាច្រើន ដូចជារបាំងណរ៉ាវក្រឡាញឹករាប់រយខ្សែក្នុងមួយខ្សែៗមិនក្រោមពី ៣០០ទៅ១០០០ម៉ែត្រនោះទេដែលក្រុមឈ្មួញបានដាក់ស្ទាក់ចាប់ត្រី ពន្លិចទៅក្នុងទឹក និងនៅក្នុងព្រៃមិនដែលឃើញមន្ត្រីជំនាញចុះទៅបង្ក្រាបសោះ ។
យោងតាមសេចក្តីរាយការណ៍ ពីប្រជាពលរដ្ឋដែលកំពុងនេសាទ លក្ខណៈគ្រួសារជាច្រើននាក់ សុំមិនបញ្ចេញឈ្មោះបានឲ្យដឹងថា ចំពោះប្រជានេសាទ ដែលប្រកបរបរបន្តិចបន្តួចសព្វថ្ងៃនេះ ពុំសូវបានផលច្រើនទេ ព្រោះឆ្នាំនេះ មិនសូវសំបូរប្រភេទត្រីធំៗ ។ ដោយសារក្រុមឈ្មួញដាក់របាំងណរ៉ាវ ស្ទាក់ចាប់ត្រី នៅតាមចរន្តទឹកហូរ ដែលត្រីធ្វើចរាចរណ៍ចេញចូល ទៅរកកន្លែងពងកូន ដែលក្នុង១ថ្ងៃៗនោះ ហើយ ក្នុង១របាំងៗគេអាចចាប់ត្រីបានសំរាប់កូនត្រីល្អិតៗ ជាពិសេសកូនត្រីប្រាមាន៨០ភាគរយ ក្នុងចំណោមពូជត្រីដទៃទៀតមួយព្រឹកលើកបាន ចាប់ពី១០០ គីឡូឡើងទៅ ។
សេចក្ដីរាយការបានបន្តថាក្រុមឈ្មួញដែលទិញត្រីគ្រប់ប្រភេទបានពីការដាក់របាំងខាងលើឈ្មោះកងគាម និងកូនម្នាក់ទៀតដឹកតាម ទូកឌុកយកទៅលក់បន្តនៅឯផែផ្សារ ក្រោមខេត្តកំពង់ឆ្នាំងឯណោះ ដោយឡែក អ្នកដាក់របាំងមួយចំនួនផ្សេងទៀត គេ ដឹកយកទៅលក់ផ្ទាល់ខ្លួន បន្តអោយម៉ូយនៅជើងកំពង់ឆ្នុកទ្រូ ស្រុកបរិបូណ៌ ខេត្តកំពង់ឆ្នាំង រីឯត្រីងាប់ល្អិតៗ ដែលសុទ្ធសឹងជាកូនត្រីពូជគេយកទៅធ្វើជាត្រីនុយលក់ចែកចាយ ធ្វើជាចំណីត្រីប្រាត្រីឆ្តោរ និងត្រីរ៉ស់ចិញ្ចឹមនៅក្នុងឃុំផាត់សណ្តាយមួយថ្ងៃៗ មិនក្រោមពី៣តោន ទៅ៥តោននោះឡើយ ។
ពលរដ្ឋបន្តទៀតថាបទល្មើសខាងលើនេះ គេឃើញថ្នាក់លើចុះមកបង្ក្រាបម្តងម្កាលដែរ ប៉ុន្តែមិនបានបង្ក្រាបចំណុចពិសេសៗ នោះឡើយ ព្រោះមុននឹងលោកថ្នាក់លើចុះមកបង្ក្រាបម្តងៗ បទល្មើសបានដឹងខ្លួនពី១ថ្ងៃទៅ២ថ្ងៃទៅហើយ គេបានពន្លិចរបាំងចូលក្នុងទឹកដល់បាតដីផ្សំ នឹងមន្ត្រីជំនាញជលផលប៉េអឹម ប៉ូលីស បរិស្ថាន និងអាជ្ញាធរដែនដីឃុបឃិត និងបណ្តែតបណ្តោយផងនោះ ច្បាស់ជារកពុំឃើញឡើយ ។
ចំពោះថ្នាក់លើចុះមកបង្ក្រាបម្តងណាក៍ដូចម្តងណាដែរ ឃើញតែមកដល់កន្លែងបទល្មើសនេសាទ ជួបតែបទល្មើសតូចតាចប៉ុណ្ណោះ ដល់ពេលត្រឡប់ទៅវិញ មិនបាន ២ ម៉ោងផងបទល្មើសងើបឡើងវិញ នៅលើផ្ទៃទឹកព្រោងព្រាតដដែល ចំពោះបទល្មើសច្រើនស្អេកស្កះទាំងនេះ អាជ្ញាធរនៅក្នុងឃុំផាត់សណ្តាយមិនមែនមិនដឹងនោះទេ ព្រោះនេះជាឆ្នាំងបាយរបស់គេទៅហើយ ។
ពាក់ព័ន្ធនឹងបទល្មើសនេសាទខាងលើនេះ មានឈ្មួញដែលជាអ្នកដាក់របាំងដូចគ្នាសុំមិនបញ្ចេញឈ្មោះបានអះអាងថា ពួកគេបានប្រមូលលុយពីអ្នកដាក់របាំងលប លូរ៉ូយ៉ាល់ទាំងនោះ យកលុយទៅឲ្យសមត្ថកិច្ច ជាថ្នូរនិងការមិនបង្ក្រាបចំពោះពួកគាត់នេសាទល្មើសច្បាប់ខាងលើ ។
ទាក់ទិននិងរឿងខាងលើនេះអ្នកយកព័ត៌មានយើងមិនទាន់ទំនាក់ទំនងលោកនាយខ័ណ្ឌរដ្ឋបាលជុលផលខេត្តកំពង់ធំដើម្បីបកស្រាយរឿងនេះ នៅឡើយទេតព្រោះមិនមានលេខទូរសព្ទ័របស់លោក នាយខ័ណ្ឌ ៕
