ខេត្តប៉ៃលិន ៖ ការរៀបចំបង្កើតលេខាធិការដ្ឋាន រដ្ឋបាលសាលាដំបូង មានគោលបំ ណងពង្រឹងយន្តការគ្រប់គ្រងការងាររដ្ឋបាលរបស់សាលាដំបូង និងអយ្យការអមសាលាដំ បូងខេត្ត ដើម្បីធានាគុណភាព ប្រសិទ្ធភាព តម្លាភាព និងគណនេយ្យភាព នៃការផ្តល់សេវា និងបង្កើនជំនឿទុកចិត្តពីប្រជាពលរដ្ឋ ក្នុងវិស័យយុត្តិធម៌ ។
នេះជាការលើកឡើងរបស់ឯកឧត្តម ជិន ម៉ាលីន អនុរដ្ឋលេខាធិការក្រសួងយុត្តិធម៌ នៅក្នុងពិធីប្រកាសចូលកាន់តំណែងប្រធាន អនុប្រធានលេខាធិការដ្ឋាន រដ្ឋបាលសាលាដំបូងខេត្តប៉ៃលិន កាលពីវេលាម៉ោង៣និង៣០នាទីរសៀលថ្ងៃទី១៩ ខែកក្កដា នេះ ស្ថិតនៅក្នុងសាលប្រជុំសាលាខេត្ត ដោយមានការអញ្ជើញចូលរួមពីឯកឧត្តម អៀង វុធ អភិបាលរងខេត្ត លោក លាង សួគ៌ ប្រធានសា លាដំបូងខេត្ត លោកព្រះរាជអាជ្ញា ព្រះរាជអាជ្ញារង ចៅក្រម ក្រឡាបញ្ជី ព្រមទាំងមន្ត្រីសមត្ថកិច្ច ជាច្រើននាក់ ។
ឯកឧត្តម ជិន ម៉ាលីន បានបន្តទៀតថា រហូតមកដល់ពេលនេះ បន្ទាប់ពីក្រសួងយុ ត្តិធម៌ បានប្រជុំពិភាក្សាគ្នាទាំងយប់ទាំងថ្ងៃ រហូតដល់បង្កើតបានច្បាប់ថ្មីៗ មួយចំនួនរួចមក ខាងថ្នាក់លើ បានសម្រេចធ្វើសមាហរណកម្ម គឺផ្លាស់ប្តូរទម្រង់នៅក្នុងស្ថាប័នតុលាការ ក្នុងគោលបំណងបំពេញតួនាទីឱ្យកាន់តែល្អប្រសើរឡើង សម្រាប់ឱ្យប្រជាពលរដ្ឋ ក៏ដូចជាយើ ងរាល់គ្នាអនុវត្តតាមឱ្យមានប្រសិទ្ធិភាព ។ ម្យ៉ាងវិញទៀត លេខាធិកាដ្ឋានរដ្ឋបាលសាលាដំបូង គឺជាច្រកចេញចូលតែមួយនៅក្នុងសាលាដំបូងខេត្ត ។ នៅពេល ដែលប្រជាពលរដ្ឋជួបនឹងបញ្ហា ឬមានចម្ងល់ផ្សេងៗ ពួកគាត់ត្រូវតែនាំគ្នាចូលទៅពឹងពាក់ខាងច្រកចេញចូលតែមួយនេះឯង ដោយពីមុន ខណៈពួកគាត់មានបញ្ហាផ្សេងៗ ពិបាកក្នុងការរកអ្នកឱ្យជួយដោះស្រាយ គឺពួកគាត់តែងតែទៅរកក្រឡាបញ្ជីឱ្យជួយ តែនៅពេលនេះ មិនចាំបាច់ធ្វើដូចមុននោះទេ គឺរៀបចំមានលក្ខណៈងាយស្រួលជាងមុនឆ្ងាយណាស់ ។ លើសពីនេះលេខា ធិការដ្ឋានរដ្ឋបាលសាលាដំបូង គឺជាសេនាធិការឱ្យសាលាដំបូង និងអយ្យការអមសាលាដំបូងខេត្ត លើការងាររដ្ឋបាល បុគ្គលិក និងហិរញ្ញវត្ថុ ស្របតាមច្បាប់ និងបទដ្ឋានគតិយុត្តជាធរមាន ព្រមទាំងបំពេញភារកិច្ចមួយចំនួនទៀត ។ ដូច្នេះហើយ ខាងលេខាធិការដ្ឋានរដ្ឋបាល ត្រូវតែមានអាកប្បកិរិយាល្អ ឫកពារទន់ភ្លន់ សំដីពីរោះពិសារ ដែលធ្វើឱ្យប្រជាពលរដ្ឋធ្ងន់ខ្លួន ពេលចូលទៅជួប ដើម្បីជម្រាបពីបញ្ហាលំបាកអ្វីមួយកំពុងជួបប្រទះ ។
ឯកឧត្តម ក៏បានសំណូមពរដល់លោកប្រធានសាលាដំបូងខេត្ត លោកចៅក្រម ព្រះរាជអាជ្ញា ក៏ដូចជាអយ្យការអមសាលាដំបូងទាំងមូល ត្រូវតែមានការយោគយល់គ្នា សហការគ្នាទៅវិញទៅមកឱ្យបានល្អ មិនត្រូវកាច់កុងគ្នា ឬមើលបំណាំគ្នាឡើយ ដើម្បីកុំឱ្យផ្នែកណាមួយ មានបញ្ហាជាមួយប្រជាពលរដ្ឋ នាំឱ្យពួកគាត់ចោទប្រកាន់ ដល់ស្ថាប័នតុលាការទាំងមូល ដែលជាហេតុធ្វើឱ្យប៉ះពាល់ទាំងអស់គ្នាតែម្តង ។
សូមបញ្ជាក់ថា នៅខេត្តប៉ៃលិន ក្រសួងយុត្តិធម៌ បានប្រកាសតែងតាំង លោក ប៉ូលី ឧត្តម ជាប្រធានលេខាធិការដ្ឋានរដ្ឋបាលសាលាដំបូងខេត្ត និងប្រគល់ត្រាជូនផងដែរ ៕
ដោយ ៖ នីយ៉ា
