ខេត្តរតនគិរី៖ នៅខេត្តរតនគិរីសព្វថ្ងៃនេះ កំពុងតែមានល្បែងស៊ីសងគ្រប់ប្រភេទរីកដុសដាលដូចផ្សិត គ្មានសមត្ថកិច្ចណាមួយបង្ក្រាបនោះទេ ជាក់ស្តែងដូចជាភ្នាល់បាល់ ភ្នាល់ប្រដាល់ អាប៉ោង បៀរ ជល់ មាន់ ពិសេសនោះគឺល្បែងកន្ទុយលេខ ដោយមានមេធំៗប្រចាំខេត្តចាក់ភ្លាមត្រូវផ្លិប បើកលុយអោយផ្លេត។
ប្រភពពីប្រជាពលរដ្ឋបានអោយដឹងថា មេកន្ទុយលេខធំៗនោះមានឈ្មោះ លី សុខងីម ម្ចាស់ភោជនីដ្ឋាន និងសណ្ឋាគារSN ស្ថិតភូមិថ្មដា សង្កាត់បឹងកន្សែង ក្រុងបានលុង ខេត្តរតនគិរី និងឈ្មោះម៉ាប់ ប្រកមុខរបរលក់ដូរនៅក្នុងផ្សារបានលុង មេកន្ទុយលេខទាំង២នាក់ខាងលើនេះបានបញ្ចុះបញ្ចូលអោយគេដើរកត់កន្ទុយលេខតាមផ្ទះគ្រប់ច្រកល្ហកនៅក្នុងក្រុងបានលុង បើនិយាយពីកន្ទុយលេខនៅខេត្តរតនគិរីមានរីកដុះដាលពីខេត្តរហូតដល់ស្រុក ហើយមិនដែលឃើញសមត្ថកិច្ចមូលដ្ឋានណាមួយចុះចាប់យកមកផ្តន្ទាទោសតាមច្បាប់ទេ។
ប្រជាពលរដ្ឋបានរិះគន់ដល់សមត្ថកិច្ចមូលដ្ឋានថាបើចាប់មេកន្ទុយលេខណាមួយគឺត្រឹមចាប់ច្របាច់កយកលុយ១លានទៅ២លាន ហើយប្រលែងផ្លេតកុំអោយអ្នកសារពត៌មានក្នុងខេត្តដឹងទាន់ ដូច្នេះពលរដ្ឋដែលមិនចូលចិត្តល្បែងស៊ីសង សុំណូមពរដល់អភិបាលខេត្ត សមត្ថកិច្ចមូលដ្ឋានពាក់ព័ន្ធទាំងអស់មេត្តាបង្ក្រាបល្បែងស៊ីសងគ្រប់ប្រភេទទាំងអស់នៅក្នុងខេត្ត ព្រោះនាពេលកន្លងមកនេះមានអំពើចោរកម្ម លួច ឆក់ ប្លន់ ជាច្រើនលើកច្រើនសារ ដោយលំបាកទាំងសមត្ថកិច្ច និងប្រជាពលរដ្ឋដេកមិនលក់ បក់មិនល្ហើយនោះផងដែរ។
សម្តេចបានលើកឡើងនាពេលកន្លងមកថា អោយសមត្ថកិច្ចមូលដ្ឋានធ្វើយ៉ាងណាឲ្យប្រជាពលរដ្ឋមានសេចក្តីសុខភូមិ ឃុំ មានសុវត្តិភាព៩ចំណុចរបស់ប្រមុខរាជរដ្ឋាភិបាល៕
សន ចាន់ឌី
