មានការរិះគន់ចំៗថាមន្ត្រីនគរបាលទាំង៣នាក់នោះ បង្ក្រាបបានតែឈ្មួញឈើតូចតាច និងប្រជាពលរដ្ឋដែលដឹកឈើមកធ្វើផ្ទះសម្បែងប៉ុណ្ណោះ ចំណែកឈ្មួញដឹកឈើតាមរថយន្តធំៗពីខេត្តសៀមរាប និងខេត្តព្រះវិហារ ឆ្លងកាត់ខេត្តកំពង់ធំយ៉ាងពេញបន្ទុក គឺពួកគេមិនហ៊ានប៉ះពាល់ឡើយ។
មន្ត្រីនគរបាលទាំង៣នាក់នោះមានឈ្មោះ ស៊ូ សាលី ឈ្មោះ ជា សុខបាន និងឈ្មោះ ហួត តឿ ពួកគេមានអំណាចយ៉ាងធំធេងក្នុងការប្រមូលលុយតាមរបៀបពុករលួយដោយអាងលើ លិខិតបេសកកម្មដែលចេញដោយអគ្គស្នងការនគរបាលជាតិ។ ហេតុនេះហើយទើបប្រជាពលរដ្ឋ ជាពិសេសអាជីវករដឹកជញ្ជូនទំនិញអំពាវនាវឲ្យថ្នាក់ដឹកនាំក្រសួងមហាផ្ទៃ ពិនិត្យមើលទង្វើមិនប្រក្រតីរបស់មន្ត្រីនគរបាលទាំង៣នាក់ខាងលើនេះផង។
មន្ត្រីនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ៣នាក់ដែល ឈរជើងក្នុងខេត្តកំពង់ធំ កំពុងប្រើប្រាស់អំណាចនិងតួនាទីរបស់ខ្លួនក្នុងការជំរិតយកលុយពី ឈ្មួញដឹកឈើ ក៏ដូចជាពីប្រជាពលរដ្ឋដឹកកសិផលនិងដឹកទំនិញផ្សេងៗតាមអំពើចិត្តដោយ មិនខ្វល់ពីការរិះគន់អ្វីទាំងអស់។
ប្រជាពលរដ្ឋនិងមន្ត្រីរាជការក្នុងខេត្តកំពង់ធំ បានឲ្យដឹងថាការដែលមន្ត្រីនគរបាលទាំងនោះជំរិតយកលុយពីក្រុមឈ្មួញ ដឹកជញ្ជូនឈើខុសច្បាប់ឬប្រើប្រាស់រថយន្តប្រដេញតាមរថយន្តឈ្មួញដឹកឈើ ដើម្បីជំរិតយកលុយវាជារឿងធម្មតាទៅហើយ ព្រោះឈ្មួញទាំងនោះដឹកជញ្ជូនឈើខុសច្បាប់។ ក៏ប៉ុន្តែករណីឈ្មួញទាំងនោះជំរិតយកលុយពីរថយន្តដឹកទំនិញរបស់ ប្រជាពលរដ្ឋនិងក្រុមអាជីវករ គឺជារឿងមិនត្រឹមត្រូវទេ ព្រោះជាទំនិញមានច្បាប់ មានការអនុញ្ញាតត្រឹមត្រូវក្នុងការនាំចូល។ រឹតតែអាក្រក់ជាងនេះទៅទៀត គឺមន្ត្រីនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃទាំង៣នាក់ ខាងលើជំរិតយកលុយពីរថយន្តដឹកកសិផលរបស់អ្នកភូមិដោយពុំមានការយោគយល់ ឡើយ ធ្វើឲ្យប្រជាពលរដ្ឋក្ដៅក្រហាយយ៉ាងខ្លាំង។
ប្រភពពីមន្ត្រីរាជការនិងប្រជាពលរដ្ឋក្នុងខេត្តកំពង់ធំ បានលើកឡើងថាប្រហែលជាមន្ត្រីនគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃឈ្មោះ ស៊ូ សាលី ឈ្មោះ ជា សុខបាន និងឈ្មោះ ហួត តឿ ចំណាយលុយយ៉ាងច្រើនដើម្បីទទួលបានលិខិតបេសកកម្មចុះទៅឈរជើងនៅ ខេត្តកំពង់ធំ ទើបខំប្រឹងប្រើគ្រប់វិធីដើម្បីប្រមូលលុយស្រង់ដើមនិងចែកគ្នាធ្វើ មានធ្វើបាន។
មន្ត្រីទាំងនេះមិនត្រឹមតែមានរថយន្តចាំប្រដេញតាមរថយន្តឈ្មួញដឹកឈើ និងដឹកទំនិញផ្សេងៗដើម្បីជំរិតយកលុយប៉ុណ្ណោះទេ គឺជួនកាលគេបានប្រើប្រាស់ប្រជាពលរដ្ឋធម្មតាឲ្យចុះប្រមូលលុយពី រថយន្តដឹកទំនិញ ដឹកឈើ និងដឹកកសិផល ដោយគ្មានញញើតអ្វីទាំងអស់៕
