(ខេត្តកំពត)៖ ឧបករណ៍វាស់កំដៅ និងបាញ់ទឹកអាកុលស្វ័យប្រវត្តិ ត្រូវបានប្រគល់ជូនទៅសាលាបឋមសិក្សា និងមតេយ្យសិក្សាចំនួន៩៩កន្លែងនៅក្នុងខេត្តកំពត សម្រាប់ប្រើប្រាស់ ដើម្បីចូលរួមទប់ស្កាត់ហានិភ័យ នៃការឆ្លងជំងឺកូវីដ១៩នៅតាមសាលារៀន ពិសេសដើម្បីថែរក្សាអនាម័យកុមារតូចៗពេលចូលរៀនវិញ។
នៅព្រឹកថ្ងៃទី៨ ខែមករាឆ្នាំ ២០២១ ឯកឧត្តម ជាវ តាយអភិបាលនៃគណៈអភិបាលខេត្ត បាននាំប្រគល់ជូន និងបែងចែកឧបករណ៍វាស់កំដៅ និងបាញ់ទឹកអាកុលស្វ័យប្រវត្តិចំនួន ៩៩គ្រឿងដល់លោកគ្រូ អ្នកគ្រូ មកពីសាលាបឋមសិក្សា និងមតេយ្យសិក្សាចំនួន ៩៩កន្លែង ក្នុងស្រុកក្រុងទាំង៨ ក្នុងខេត្តកំពត ដើម្បីយកទៅប្រើប្រាស់។
បើតាមប្រធានមន្ទីរអប់រំយុវជន និងកីឡាខេត្តកំពត លោក តាក់ ហាប់ បានឲ្យដឹងថា អំណោយឧបករណ៍វាស់កំដៅ និងបាញ់អាកុលស្វ័យប្រវត្តិទាំងអស់នេះ បែងចែកជូនដល់សាលាបឋមសិក្សា និងមតេយ្យសិក្សានៅតាមបណ្ដាក្រុងស្រុកចំនួន៩៩សាលា ក្នុងនោះ ក្រុងកំពតចំនួន ១៣សាលា ស្រុកទឹកឈូ ១៣សាលា ស្រុកកំពង់ត្រាច១២សាលា ស្រុកបន្ទាយមាសចំនួន១២សាលា ស្រុកអង្គរជ័យ១២សាលា ស្រុកដងទង់១២សាលា ស្រុកឈូក១៣ស្រលា និងស្រុកជុំគិរីចំនួន១២សាលា ហើយឧបករណ៍ទាំងនេះ គឺចែកទៅសម្រាប់តែសាលាគោលដៅប្រើប្រាស់ ដូចជាសម្រាប់ក្រុងកំពត ជូនដល់គ្រប់សាលាមតេយ្យសិក្សា និងស្រុកទាំង៧ ជូនទៅតែសាលានៅទីប្រជុំជនប៉ុណ្ណោះ ដោយសារចំនួនមានកំណត់។
ឯកឧត្តម ជាវ តាយ អភិបាលខេត្តកំពត បានមានប្រសាសន៍ថា បញ្ហាជំងឺកូវីត១៩ គឺបានរាតត្បាតជាសកលក្នុងពិភពលោក ហើយក្នុងនោះ កម្ពុជាយើងក៏បានរងនូវសម្ពាធដ៏អាក្រក់នៃជំងឺនេះផងដែរ ។ ហើយ ប្រមុខរាជរដ្ឋាភិបាល តែងបានយកចិត្តទុកដាក់យ៉ាងខ្លាំងលើបញ្ហានេះ។
សូមជម្រាបថា កន្លងមកការបើក ឬបិទសាលា គឺដោយសារ រាជរដ្ឋាភិបាល ក៏ដូចជាក្រសួងសុខាភិបាល ព្រួយបារម្ភចំពោះសុវត្ថិភាពសិស្ស ពិសេសសិស្សតូចៗនៅមិនទាន់មានការយល់ដឹង ចំពោះបញ្ហាការបង្ការទប់ស្កាត់ជំងឺកូវីដ១៩នេះ ។ ដូច្នេះអំឡុងពេលបើកសាលាឲ្យសិស្សរៀនវិញនេះ សូមលោកគ្រូអ្នកគ្រូ យកឧបករណ៍ទាំងនេះទៅប្រើប្រាស់ ឲ្យបានចំគោលដៅ ដើម្បីរួមគ្នាបង្ការទប់ស្កាត់ជំងឺកូវីដ១៩ មិនឲ្យឆ្លងរាលដាលចូលដល់ក្នុងសហគមន៍នៃខេត្តកំពត ជាដាច់ខាត៕ សេង ណារិទ្ធ
