តាមសេចក្តីរាយការណ៍បានឲ្យដឹងថា មានល្បែងហ្គេមក្មេងមួយកន្លែង ដែលទីតាំង ស្ថិតនៅម្តុំផ្សារដើមក្រឡាញ់ សង្កាត់គោកចក ក្រុងសៀមរាប ខេត្តសៀមរាប បានបើកដំណើរការលេងយ៉ាងអនាធិបតេយ្យ មិនឃើញមានអាជ្ញាធរ ឬសមត្ថកិច្ចណាមួយចុះទប់ស្កាត់ឡើយ ។
សេចក្តីរាយការណ៍ដដែលបានបន្តថា ពួកគាត់ដែលជាអាណាព្យាបាលក្មេងៗ ដែលមកលេងហ្គេមបានសម្តែងការព្រួយបារម្ភអំពីអនាគត់កូនរបស់គាត់ខ្លាំងណាស់ ព្រោះកូនរបស់គាត់តែងតែគេចសាលារៀន ស្ទើរតែរៀងរាល់ថ្ងៃ ធ្វើឳ្យខាតបង់ពេលវេលានិងថវិកាគ្រួសារផងដែរ ។
ឆ្លើយតបនឹងប្រតិកម្មជុំវិញការចោទប្រកាន់ទាំងនេះ លោកនាយប៉ុស្តិ៍សង្កាត់គោកចក បានថ្លែងប្រាប់អ្នកសារព័ត៌មានថា សព្វថ្ងៃ កម្លាំងមន្ត្រីនគរបាលរបស់គាត់កំពុងមមាញឹក ធ្វើអត្តសញ្ញាណបណ្ណ័ជូនប្រជាពលរដ្ឋ ហើយម្យ៉ាងទៀតកម្លាំងរបស់លោកកំពុងខ្វះខាតផង ។
លោកនាយប៉ុស្តិ៍បន្តទៀតថា ហ្គេមដែលក្មេងលេងនៅផ្សារដើមក្រឡាញ់ គឺជាប្រភេទហ្គេមតូចតាច គឺលេងអស់តែ៥០០ឬ ១០០០រៀលឈប់ហើយ ។ ចាំលោកសួរទៅគោលការណ៍ថ្នាក់លើសិន ពីព្រោះវាមិនមែនជាប្រភេទហ្គេមបាញ់ត្រីទេ ។
ចំណែកឳពុក ម្តាយក្មេងៗដែលមកលេងហ្គេមទីនេះ បានធ្វើការសំណូមពរដល់អាជ្ញាធរដែនដី គឺមានលោកអភិបាលនៃគណះអភិបាលខេត្តបណ្ឌិត ឃឹម ប៊ុន សុង និងស្នងការដ្ឋាននគរបាលខេត្ត លោក ស៑ត ណា ឌី មេត្តាចុះត្រួតពិនិត្យ និងធ្វើការទប់ស្កាត់ឳ្យមានប្រសិទ្ធភាពខ្ពស់ ដើម្បីឳ្យក្មេងជំនាន់ក្រោយមានអនាគត់ល្អ ពាក្យចាឋ់លោកថាទំពាំងស្នងឬស្សីនោះ ចុះបើហ្គេមជ្រកក្រោមស្លាកអ៊ីធើណេតស្ទើរពាសពេញក្រុងសៀមរាម ឲ្យទំពាំងស្នងឬស្សីម្តេចហ្នឹងកើតទាន ៕
