កណ្តាល ៖ កាលពីរសៀលថ្ងៃទី ២ ខែកក្កដា ឆ្នាំ ២០១៦នេះ នៅទីស្នាក់ការគណបក្សប្រជាជនកម្ពុជា ស្រុកស្អាង បានប្រារព្ធពិធីរំលឹកខួបអនុស្សាវរីយ៍ លើកទី ៦៥ ថ្ងៃកំណើតទី(២៨ ខែមិថុនា ១៩៥១មកដល់ថ្ងៃទី២ ខែកក្កដា២០១៦) ថ្ងៃបង្កើតគណបក្សប្រជាជនកម្ពុជា ។
នៅក្នុងពិធីនេះ មានការអញ្ជើញចូលរួមជាអធិបតីរបស់ ឯកឧត្តម ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេសនិង ជាប្រធានគណៈពង្រឹងមូលដ្ឋានស្រុកស្អាងក្រុមការងារ ថ្នាក់កណ្តាលចុះជួយខេត្តកណ្តាល ។
ជាកិច្ចចាប់ផ្តើម លោក ព្រំ ឈឺន អនុប្រធានប្រចាំការគណបក្សស្រុកស្អាង ប្រធានគណៈពង្រឹកស្រុកស្អាងបានអានសុន្ទរកថារបស់សម្តេច អគ្គមហាសេនាបតីតេជោ ហ៊ុន សែន ក្នុងអង្គពិធីនេះ ក្នុងខ្លឹមសារ រំលឹកឡើងវិញ នូវសាវតារបស់គណបក្ស ដែលមានវ័យចំណាស់ជាងគេ នៅក្នុងទំព័រប្រវត្តិ សាស្ត្រថ្មីរបស់កម្ពុជា ដែលបានក្រោកឡើងតស៊ូ រំដោះប្រទេស ជាតិ ឲ្យរួចផុតពីនឹមអាណា និគមនិយម ចក្រពត្ត័បរទេសឈ្លានពាន និង របបទាសករ ជាច្រើនដំណាក់កាល ហើយបាននិងកំពុង កសាងអភិវឌ្ឍន៍ប្រទេស ឆ្ពោះទៅរកការរីកចម្រើនលើគ្រប់វិស័យ។
ឯកឧត្តម ប្រាក់ សុខុន បានគូសបញ្ជាក់ថា ជោគជ័យទាំងឡាយ ដែលគណបក្សប្រជាជនសំរេចបាន នាពេលកន្លងមក នេះ ធ្វើឲ្យយើងមានមោទនភាពជ្រាលជ្រៅ ដោយយើងបាននាំប្រទេសជាតិ ឲ្យចាកផុតពីមហាវិនាសកម្ម រហូត ដល់អាចពង្រឹងជំហររបស់ជាតិយើង បានដូចសព្វថ្ងៃនេះ ។
ឯកឧត្តម បានបន្តថា ៖ ទន្ទឹមនឹងក្តីមោទនភាពនេះ យើងក៏ត្រូវមើលឃើញច្បាស់ នូវសំណូមពរនៃ ការងារជាច្រើនទៀត ដែលត្រូវរួមគ្នាបន្តដោះស្រាយ ដោយភាពអំណត់ព្យាយាម ដើម្បីសំរេចបាន ជោគជ័យ ថ្មីៗថែមទៀតក្នុងដំណាក់កាលថ្មី មានការពង្រឹងពង្រីករចនាសម្ព័ន្ធចាត់តាំងបក្ស ឃុំ សង្កាត់ ស្រុកនីមួយៗ ការកសាងពង្រឹងសមាជិកបក្ស ការបង្កើនសមត្ថភាពគ្រប់គ្រង និងដឹកនាំការងារ ការអប់រំផ្សព្វផ្សាយនូវ គោលនយោបាយ របស់គណបក្ស រាជរដ្ឋាភិបាល ឲ្យបានជ្រួតជ្រាបទូលំទូលាយ និង ការប្រមូលផ្តុំកម្លាំងគ្រប់ ស្រទាប់ ដើម្បីអនុវត្តន៏គោល នយោបាយទាំងនេះឲ្យទទួលបានជោគជ័យ។
ឯកឧត្តមបានថ្លែងនូវការ កោត សរសើរនិងវាយតំលៃខ្ពស់ ចំពោះស្នាដៃនិងសមិទ្ធិផលជាច្រើន ដែល គណបក្សខេត្តសម្រេចបាន ក្នុងការរួមចំណែកចំពោះជោគជ័យរួម ដែលទទួលបានក្នុងក្របខ័ណ្ឌ ទូទាំង ប្រទេស។ លទ្ធផលទាំងនេះ មិនអាចកាត់ផ្តាច់បាន ពីការជួយឧបត្ថម្ភគាំទ្រ របស់ក្រុមការងារ ដែលជានិច្ចកាល តែងយកចិត្តទុកដាក់ ចុះជាប់ដល់មូលដ្ឋាន ដើម្បីស្វែងយល់អំពីសុខទុក្ខ និងការដោះស្រាយសំណូមពរ នានា ជូនប្រជាពលរដ្ឋ។ ហើយតាមរយៈកិច្ចខិតខំប្រឹងប្រែង និងប្រកបដោយស្មារតីទទួលខុសត្រូវនេះ ទើបធ្វើឱ្យប្រជាពលរដ្ឋ ក្នុង មូលដ្ឋានស្រុកខេត្ត នៃខេត្តកណ្តាលគាំទ្រ និង បោះឆ្នោតជូនគណបក្សប្រជាជនកម្ពុជា ទទួលជ័យជម្នះជារាងរហូតមក ៕
ដោយ ហុក វិបុល
