មេឈ្មួញធំៗចំនួនបីរូប គឺចែពិដោរ, ចែដែក និងលោកផ្កាយ ៣ មួយរូបទៀត បាននាំទំនិញគេចពន្ធ ឆ្លងកាត់ច្រកតំបន់ដូនរ័ត្ន, ច្រកចាន់មូល ច្រកដារ ឬដូង៧ដើម ច្រករបៀងស្នំជាដើម…. ក្លាយទៅជាទម្លាប់ឃុបឃិតគ្នាជាប្រព័ន្ធ រវាងមេឈ្មួញនិងមេ គយគ្រប់គ្រងនៅទីនោះ បំផ្លាញថវិកាពន្ធនាំចូលរបស់រដ្ឋ ផ្ទុយពីគោលការណ៍ ឬការរឹតបន្តឹងរបស់ថ្នាក់លើ ។
ជាទូទៅចែពិដោរ និងចែដែត ក្រៅពីនាំទំនិញចាប់ហួយ និងប្រេងឆាគាត់ក៏មាននាំចូលប្រភេទជាត្រាក់ទ័រ រថយន្តដឹកដី តាមច្រករបៀបស្នំ ។ ករណីខ្លះគយចល័តចាប់ស្ងាត់បានមួយដង្ហើមចង្រឹតក៏លួចនាំចូលបន្តទៀត ។
លោក ចាន់ សូផាត ប្រធានស្នាក់ការគយ និងរដ្ឋាករមេមត់គ្រប់គ្រងច្រកតំបន់ដូនរ័ត្ន និងច្រកទ្វេភាគីចាន់មូល ក៏ដូច លោក យឹម វណ្ណៈ ប្រធានស្នាក់ការគយ និងរដ្ឋាករច្រកដារ ឬដូង ៧ដើម ជាមួយនឹងការគ្រប់គ្រងច្រករបៀង ៤ ទៅ ៥កន្លែងទៀត បានត្រូវដងត្រូវផ្លែអនុញ្ញាតឱ្យឈ្មួញនាំទំនិញគេចពន្ធហូរចូលយ៉ាងអនាធិបតេយ្យក្នុងនោះមាន ឈ្មួញ ៣រូបជា អាជីពនាំទំនិញគេចពន្ធចូលអាចផ្តើមពីអំពើពុករលួយជាប្រព័ន្ធដូចជា ចែពិដោរ ចែដែត និងលោកផ្កាយ៣ ដោយគ្រាន់តែបង់ ពន្ធនាំចូលត្រឹមតែ ៣០ ទៅ ៤០ភាគរយប៉ុណ្ណោះ ។ ដោយឡែកឈ្មួញផ្សេងៗទៀតក៏មានរូបភាពប្រហាក់ប្រហែលគ្នាដែរ ។
ករណីចែពិដោរ ចែដែត និងលោកផ្កាយ ៣ ទំនិញគាត់ធ្លាប់មានក្រុមគយចល័តរបស់លោក គាត គារ៉ាត់ បង្ក្រាប ចាប់ ញឹកញាប់ក៏ដូចជា បទល្មើសឈើជាដើម ប៉ុន្តែលោក ចាន់ សូផាត និងលោក យឹម វណ្ណៈ មេគយគ្រប់គ្រងនៅទីនោះនៅតែ បង្ហាញពីភាពគឃ្លើនដដែល ។
ក្រុមឈ្មួញបានរៀបរាប់ឱ្យដឹងថា ច្រកដូនរ័ត្ន ច្រកចាន់មូល ច្រកដារ ឬដូង ៧ដើម ទំនិញគេចពន្ធឆ្លងកាត់ពីវៀតណាមចូលមក តែចំពោះច្រករបៀងដែលគ្រប់គ្រងដោយច្រកខាងលើនេះ មានលួចចេញបទល្មើសឈើ និងហូរចូលវិញត្រាក់ទ័រ រថយន្តដឹកដីគេចពន្ធ ហើយជួនកាលធ្វើជារូបភាពមកភ្ជួរស្រែរួចក៏នាំចូលបំបាត់ពន្ធរបស់រដ្ឋទាំងបំពាន ។
ករណីនេះ សារព័ត៌មានយើងពុំអាចសុំការបំភ្លឺពីលោក ចាន់ សូផាត និងលោក យឹម វណ្ណៈ បានទេ ដោយទូរស័ព្ទចូល គ្មានអ្នកទទួល ៕
