ខេត្តប៉ៃលិន ៖ សត្វព្រៃជាច្រើនក្បាល ក្នុងនោះមាន សត្វអណ្តើកចំនួន៥០ក្បាលទម្ងន់៤៩គីឡូក្រាម និងសត្វត្រកួតចំនួន១៣ក្បាលទម្ងន់៤៣.៩គីឡូក្រាម រួមទាំងសាច់កាប់ចំរុះចំនួន៥គីឡូក្រាមទៀត ត្រូវបានកម្លាំងចំរុះ រួមមាន មន្ត្រីរដ្ឋបាលព្រៃឈើខេត្តប៉ៃលិន មន្ត្រីអភិរក្សសត្វព្រៃ(MJP) នគរបាលប៉ុស្តិ៍អូរតាវ៉ៅ និងកងរាជអាវុធហត្ថខេត្ត ដែលដឹកនាំដោយលោក សេង គឹមឡាក់ ព្រះរាជអាជ្ញារងអមសាលាដំបូងខេត្តប៉ៃលិន បានឆ្មក់ចូលក្នុ ងអាហារដ្ឋានមួយកន្លែង និងឃាត់ខ្លួនម្ចាស់ផ្ទះបានម្នាក់យកទៅសួរនាំនៅខណ្ឌរដ្ឋបាលព្រៃឈើខេត្តប៉ៃលិន ។
ហេតុការណ៍ ចុះបង្ក្រាបខាងលើនេះ បានកើតឡើងកាលពីវេលាម៉ោង៩ និង៣០នាទីព្រឹកថ្ងៃទី១៣ ខែមិថុនា ឆ្នាំ២០១៦ ស្ថិតនៅជាប់ព្រំប្រទល់រវាងខេត្តប៉ៃលិន និងខេត្តបា ត់ដំបង ក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ។
ប្រភពព័ត៌មានពីសមត្ថកិច្ចរដ្ឋបាលព្រៃឈើ បានឱ្យដឹងថា ក្រោយពីមានការបញ្ជារ ពីលោក ព្រះរាជអាជ្ញារង ទើបឈានដល់ធ្វើការឃាត់ខ្លួនជនសង្ស័យដែលជាម្ចាស់ ហាងជួញដូរសត្វព្រៃខាងលើនេះ មានឈ្មោះ ទៀង សែន ភេទប្រុស អាយុ៦១ឆ្នាំ ជាជនពិការជើងឆ្វេង រស់នៅភូមិខាងលើ ដោយរឹបអូសបានសត្វព្រៃដូចជាសត្វអណ្តើកចំនួន៥០ក្បាល ទម្ងន់៤៩គីឡូក្រាម សត្វត្រកួតចំនួន១៣ក្បាលទម្ងន់៤៣.៩គីឡូក្រាម រួមទាំងសាច់កាប់ចំរុះចំនួន៥គីឡូក្រាម ។
ប្រភពបន្តទៀតថា សត្វព្រៃទាំងនេះខាងរដ្ឋបាលព្រៃឈើ នឹងសុំគោលការណ៍ពីព្រះរាជអាជ្ញាអមសាលាដំបូងខេត្តប៉ៃលិន ដើម្បីយកទៅព្រលែងនៅក្នុងព្រៃ ដែលមានសុវត្ថិភាព។ ចំណែកឯជនសង្ស័យខាងលើ ត្រូវបានកសាងសំនុំរឿង បញ្ជូនទៅអយ្យការអមសាលាដំបូងខេត្ត ដើម្បីចាត់ការតាមផ្លូវច្បាប់។
តាមចម្លើយសារភាពរបស់ជនសង្ស័យ ឈ្មោះ ទៀង សែន ខាងលើ បានឱ្យដឹងថា កន្លងមកគាត់ធ្លាប់ទិញសត្វទាំងនោះដែរ ដោយគ្រាន់តែទិញធ្វើម្ហូប ដើម្បីលក់ទទួលភ្ញៀវដែលមកលេងកំសា ន្តនៅខ្ចុះរបស់គាត់ តិចតួចប៉ុណ្ណោះ ដោយគាត់មិនមែនជាអ្នកជួញដូរសត្វព្រៃអ្វីនោះទេ ។
លោកបន្តទៀតថា តែនៅថ្ងៃកើតហេតុ ស្រាប់តែមានប្រជាពលរដ្ឋជា ច្រើននាក់សម្រុកយកមកលក់ឱ្យគាត់ ទើបទិញទុកធ្វើម្ហូបក៏ត្រូវសមត្ថកិច្ចធ្វើការចាប់ឃាត់ខ្លួនតែម្តង ។
សូមបញ្ជាក់ផងដែរថា បច្ចុប្បន្នសត្វព្រៃជាច្រើននៅតាមហាងមួយចំនួនក្នុងខេត្តប៉ៃលិន ត្រូវគេលក់ដូរយ៉ាងគគ្រឹកគគ្រេង កម្រឃើញសមត្ថកិច្ចចុះបង្ក្រាបណាស់ ហើយគេ ឃើញអ្នកខ្លះចូលក្នុងហាងទិញកម្មង់យកតែសត្វព្រៃមកហូបប៉ុណ្ណោះ៕
ដោយ ៖ នីយ៉ា
