ខេត្តរតនគិរី ៖ សាខាកាំកុងត្រូលខេត្តរតនគិរីសហការជាមួយមន្ត្រីមន្ទីរពាណិជ្ជកម្ម និង កម្លាំងនគរបាលប្រឆាំងបទល្មើសសេដ្ឋកិច្ចនៃស្នងការនគរបាលខេត្តតនគិរីដឹកនាំដោយលោកសម សុធា អនុប្រធានសាខាកាំកុងត្រូល នាព្រឹកថ្ងៃទី១០ ខែមិថុនា ឆ្នាំ២០១៦ បានចុះពិនិត្យមុខទំនិញខូចគុណភាពក្នុងផ្សារអូរយ៉ាដាវ និងផ្សារបរកែវ។
លោកសម សុធា ប្រាប់ឲ្យថាជារៀងរាល់ខែសាខាកាំកុងត្រួលខេត្តបានសហការជាមួយអង្គភាពពាក់ព័ន្ធ តែងបានចុះពិនិត្យទំនិញនៅតាមទីផ្សារនានាក្នុងខេត្ត ជាក់ស្តែងថ្ងៃនេះសមត្ថកិច្ចជំនាញបានចុះមកផ្សារស្រុកអូរយ៉ាដាវ និងបរកែវ ក្នុងគោលបំណងលើកកំពស់សុខវត្ថិភាពចំណីអាហារ និងគ្រឿងឧបភោគបរិភោគ នានា ដែលក្រុមអាជីវករដាក់តាំងលក់។
លោកសម សុធា បន្តឲ្យដឹងទៀតថា ការចុះពិនិត្យថ្ងៃនេះគឺសមត្ថកិច្ចយើងពិនិត្យមើលតែគ្រឿងឧបភោគបរិភោគវិចខ្ចប់ និងផលិតផលជាគ្រឿងកំប៉ុង និងដបជាដើម ក្រែងបងប្អូនអាជីវករដាក់លក់ផលិតផលខាងលើខូចគុណភាពដូចជាកំពិត ឫមានច្រេះកំប៉ុងនិងហួសកាលបរិច្ឆេទឈប់អោយប្រើប្រាស់នៅគ្រប់តូបលក់ទំនិញ រួចបានចែកជូនខិតប័ណ្ណអប់រំពីចំណីអាហារដល់បងប្អូនអាជីវករ និងធ្វើការពន្យល់ណែនាំពីរបៀបមើលថ្ងៃ ខែ ឆ្នាំ ឈប់អោយប្រើប្រាស់ផលិតផលផ្សេងៗ ជាពិសេសមុននឹងកម្ម៉ងទំនិញចូលដើម្បីលក់បន្ត ត្រូវស្គាល់អោយច្បាស់ពីប្រភពទំនិញល្អ និងមានការបរិច្ឆេទត្រឹមត្រូវ ជៀសវាងការខាតបង់ពេលសមត្ថកិច្ចរឹបអូស។
ជាលទ្ធផលនៃការចុះត្រួតពិនិត្យនាពេលនេះ សមត្ថកិច្ចបានដកហូតទំនិញខូចគុណភាពមួយចំនួនពីក្រុមអាជីវករយកមករក្សាទុកដើម្បីកំទេចចោលផងដែរ៕
