បច្ចុប្បន្ននេះ កម្ពុជានៅមិនទាន់មានវប្បធម៌បើកចំហ ព័ត៌មានទូលំទូលាយ នៅឡើយ ដើម្បីជំរុញឲ្យស្តីពីសិទ្ធិទទួលបានព័ត៌មាន មានខ្លឹមសារ តាមស្មារតីនៃរដ្ឋធម្មនុញ្ញ និងកតិកាសញ្ញាអន្តរជាតិ ស្តីពីសិទ្ធិមនុស្ស។ម្យ៉ាងទៀត ទាំងបក្សប្រឆាំងនិងបក្សកាន់អំណាចនៅស្ទាក់ស្ទើរ ក្នុងការបើកចំហព័ត៌មានសាធារណៈ និងកង្វះធនធាន រួមទាំងភាពមិនច្បាស់លាស់ ពីព័ត៌មានសម្ងាត់នៅឡើយទេ។
ដើម្បីធ្វើឲ្យបានល្អ ធានានូវគុណភាព ការពារដល់ផលប្រយោជន៍ដល់អ្នកកាសែតស្របតាមស្មារតីរដ្ឋធម្មនុញ្ញកម្ពុជា និងកតិកាសញ្ញាអន្តរជាតិផ្សេងៗស្តីពីសិទ្ធិមនុស្ស ។ ត្រូវធានាការបើកចំហព័ត៌មានសាធារណៈ ។ លោក ហ៊ុន សុខា ប្រធានក្លឹបអ្នកកាសែតឯករាជ្យក៏បានអំពាវនាវដល់អ្នកនយោបាយឲ្យ ចូលរួមរក្សាសុវត្ថិភាពរបស់អ្នកកាសែត។ក្លឹបអ្នកកាសែតឯករាជ្យសម្ដែងការ ព្រួយបារម្ភ និងលើកពីបញ្ហាប្រឈមនានា ជុំវិញការរាយការណ៍ព័ត៌មាននយោបាយ នៅពេលបក្សប្រជាជន និងបក្សសង្គ្រោះជាតិចូលធ្វើការក្នុងសភារួមគ្នានោះ។
លោក ហ៊ុន សុខា ប្រធានក្លឹបអ្នកកាសែតឯករាជ្យក៏អះអាងថាការបិទបាំងព័ត៌មាននៅ ពេលប្រជុំសភាម្ដងៗ ឬជំនួបកំពូលក្រៅផ្លូវការ រវាងថ្នាក់ដឹកនាំបក្សទាំងពីរ ថែមទាំងមានការរើសអើងដល់ស្ថាប័នអ្នកសារព័ត៌មានមួយចំនួន។ ការរើសអើង អ្នកកាសែតឯករាជ្យនោះ ត្រូវបានរើសអើងពីមន្ត្រីគណបក្សប្រជាជនកម្ពុជា ចំណែកឯអ្នកកាសែតដែលកាន់ជើងរដ្ឋាភិបាល ក៏ត្រូវរើសអើងដោយមន្ត្រីបក្សសង្គ្រោះជាតិ ដោយមិនចង់ផ្ដល់បទសម្ភាសន៍ ឬសហការដល់អ្នកកាសែតនោះឡើយនេះជាការរើសអើងពីអ្នកនយោបាយ។
យោងតាមរបាយការណ៏អង្គការអ្នកសារព័ត៌មានគ្មានព្រំដែន (Reporters sans frontières) បានចាត់ចំណាត់ថ្នាក់នៃសេរីភាពសារព័ត៌មានកម្ពុជានៅលេខរៀងទី ១៤៤ ក្នុងចំណោម ១៨០ ប្រទេសនៅលើពិភពលោក។ ចំណាត់ថ្នាក់នេះបានធ្លាក់ចុះមួយខ្ទង់បើធៀបនឹងឆ្នាំមុន។ យ៉ាងណាក៏ដោយ ស្ថានភាពសេរីភាពសារព័ត៌មាននៅកម្ពុជាមានលក្ខណៈល្អប្រសើរជាងប្រទេសមួយចំនួនក្នុងតំបន់អាស៊ាន។
បណ្តាប្រទេសប្រជាធិបតេយ្យធំៗដូចជាបារាំង និងសហរដ្ឋអាមេរិកជាដើមក៏មានសេរីភាពសារព័ត៌មានធ្លាក់ចុះដែរ ។ ប្រទេសកម្ពុជាឈរនៅលេខរៀងទី ១៤៤ ក្នុងចំណោម ១៨០ ប្រទេស នៅលើពិភពលោក។ នេះបើយោងតាមរបាយការណ៍ដែលទើបតែចេញផ្សាយនៅដើមឆ្នាំ ២០១៤ នេះដោយអង្គការអ្នកសារព័ត៌មានគ្មានព្រំដែន (Reporters sans frontières)ដែលមានមូលដ្ឋាននៅទីក្រុងប៉ារីស ប្រទេសបារាំង។ ចំណាត់ថ្នាក់នេះបានធ្លាក់ចុះមួយខ្ទង់បើធៀបនឹងរបាយការណ៍ឆ្នាំ ២០១៣ ដែលកម្ពុជាឈរនៅលំដាប់ថ្នាក់លេខរៀងទី១៤។
យ៉ាងណាក៏ដោយ កម្ពុជាមានចំណាត់ថ្នាក់ល្អជាងបណ្តាប្រទេសមួយចំនួនក្នុងតំបន់ដូចជា ម៉ាឡេស៊ី ហ្វីលីពីន សាំងហ្គាពួរ ភូមា វៀតណាម និងឡាវជាដើម។ ប៉ុន្តែ កម្ពុជាស្ថិតនៅក្រោមប្រទេសថៃដែលឈរនៅលេខរៀងទី ១៣០ ។ កាលពីឆ្នាំ ២០១២ សេរីភាពសារព័ត៌មានកម្ពុជាមានលក្ខណៈល្អប្រសើរជាងនេះដោយស្ថិតនៅក្នុងចំណាត់ថ្នាក់ទី ១១៧ ។
របាយការណ៍បង្ហាញថា ប្រទេសចំនួន ១០ ចុងក្រោយគេបង្អស់ដែលអង្គការនេះបានចាត់ទុកជាប្រទេសដែលរំលោភសិទ្ធិអ្នកកាសែតខ្លាំងជាងគេក្នុងអំឡុងឆ្នាំ ២០១៣កន្លងទៅនោះគឺមាន ប្រទេសវៀតណាម ចិន កូរ៉េខាងជើង ឡាវ ស៊ូដង់ អ៊ីរ៉ង់ សូម៉ាលី ស៊ីរី និងចុងក្រោយគេ គឺប្រទេសអេរីត្រេ។ រីឯប្រទេសចំនួន ១០ ដែលមានចំណាត់ថ្នាក់ល្អក្នុងការគោរពសិទ្ធិសេរីភាពសារព័ត៌មាននាំមុខគេជានិច្ចដោយប្រទេសហ្វាំងឡង់ និងបន្តដោយហូឡង់ ន័រវែស លុចសំបួ ដាណឺម៉ាក នូវែលសេឡង់ និងប្រទេសស៊ុយអែត ជាដើម។នៅកម្ពុជា ចំណាត់ថ្នាក់សេរីភាពសារព័ត៌មានរយៈពេលពីរឆ្នាំចុងក្រោយនេះគ្មានអ្វី ប្រែប្រួលខ្លាំងទេ។
ប្រទេសប្រទេសប្រជាធិបតេយ្យធំៗមួយចំនួនក៏ត្រូវបានអង្គការនេះទម្លាក់ចំណាត់ថ្នាក់ខាងសេរីភាពសារព័ត៌មានដែរ។ ជាក់ស្តែង សហរដ្ឋអាមេរិកធ្លាក់ពីលេខរៀងទី១៣ ដល់ ៤៣ ប្រទេសអង់គ្លេសធ្លាក់ពីលេខរៀងទី ៣០ ដល់ ៣៣ បារាំងធ្លាក់ពីលេខរៀងទី៣៨ ដល់ ៣៩ ។ សេរីភាពសារព័ត៌មានបានធ្លាក់ចុះខ្លាំងនៅក្នុងបណ្តាប្រទេសដែលមានជម្លោះប្រដាប់អាវុធ ៕
