មណ្ឌលគិរី ៖ សិប្បកម្មផ្គត់ផ្គង់ទឹកស្អាតស្រុកកែវសីមា បានចេញសេចក្តីអំពាវនាវ អោយអតិថិជនអោយ កាត់បន្ថយការប្រើប្រាស់ ទឹកខណៈ ប្រភពទឹកកំពុងតែរងនូវភាពខ្វះខាត។ ការអំពាវនាវបានធ្វើឡើងបន្ទាប់ពីក្នុងខេត្តមណ្ឌលគិរី ពិសេសស្រុកកែវសីមា កំពុងជូបនូវបញ្ហាប្រភពទឹកហួតរីង បង្ករអោយ មានការស្វះស្វែងរកប្រភពទឹកបន្ថែម ដើម្បីផ្គត់ផ្គង់តំរូវការ។
ម្ចាស់សិប្បកម្មទឹកស្អាត ប្រចាំស្រុកកែវសីមា លោកប៉ោ ពួជ បានធ្វើសេចក្តីជូនដំណឹង ដោយនៅក្នុងឆ្នាំនេះ ភាពរាំងស្ងួតយូរអង្វែង ធ្វើអោយប្រភពទឹកដែលយកមកចំរោះជាទឹកស្អាត ចែកចាយអោយអតិថិជន ទូទាំង ស្រុកត្រូវបានដាច់ប្រភពទឹកទៅហើយ។ដូចច្នេះសិប្បកម្មទឹកស្អាត សូមអំពាវនាវអោយអ្នកប្រើប្រាស់ ទឹកស្អាត ទាំងអស់ជួយសន្សំសំចៃ ហើយសិប្បកម្មនិងព្យាយាមរកប្រភពទឹកថ្មី ដើម្បីធ្វើការផ្គត់ផ្គង់បន្ត។
ជាមួយគ្នានេះអភិបាលស្រុកកែវសីមា លោកស៊ិន វណ្ណវុឌ្ឍ បានថ្លែងក្នុងសារថា មិនត្រឹមតែខេត្តមណ្ឌលគិរីឬ ស្រុកកែវសីមាតែប៉ុណ្ណោះនោះទេ ដែលរងនូវកង្វះទឹក ក៏ប៉ុន្តែតំបន់ខ្លះស្ទើរតែទូទាំងប្រទេសក៏មាន បញ្ហាកង្វះ ទឹកនេះដែរ ។ លោកថា បច្ចុប្បន្នអ្នកដែលរងគ្រោះខ្លាំងជាងគេ គឺកសិករដែលដាំដំណាំម្រេចតែម្តង ។ លោកបាន អំពាវ នាវអោយប្រជាពលរដ្ឋមេត្តា ប្រើប្រាស់ទឹកដោយសន្សំសំចៃ ចំពោះមុខនេះសូមបងប្អូនផ្អាកនៅការ ដាំម្រេចមួយ រយះពេលសិន កំឡុងពេលដែលធម្មជាតិមិនអនុគ្រោះ ហួតហែងបែបនេះ។ម្យ៉ាងវិញទៀតត្រូវ មានការប្រុងប្រយ័ត្នខ្ពស់ ជាមួយនិងបញ្ហាអគ្គីភ័យ ដែលបង្ករឡើងដោយ ភ្លើងឆេះព្រៃនោះថែមទៀត។
គ្រោះរាំងស្ងួតនេះ ត្រូវគេរាយការណ៍ថា កំពុងតែបង្ករភាពខ្វះទឹកនៅខេត្តប៊ិញហ្វឿកនៃប្រទេសវៀតណាម ដែល ជាខេត្តមួយមានព្រំប្រទល់ជាប់និងខេត្តមណ្ឌលគិរី ។ ហើយប្រភពទឹកដែលគេកំពុងតែប្រើនោះ គឺបានមកពី ការបូម ចេញពីអូរព្រំដែន កម្ពុជាវៀតណាម ប៉ុន្តែទោះជាយ៉ាងណា ប្រជាពលរដ្ឋវៀតណាម អះអាងថា ប្រភពទឹកនៅអូរព្រំដែននោះ មិនគ្រប់តំរូវការនោះទេ ត្បិតដំណាំម្រេច ជាច្រើនតាមបណ្តោយព្រំដែនបានងាប់ បណ្តើរៗព្រោះតែអូរព្រំដែនកន្លែងខ្លះ បានរីងស្ងួតទៅហើយនោះ។
សូមជម្រាបដែរថា អភិបាលរងខេត្ត កន្លងទៅស្រុកកែវសីមា មានភ្លៀងកក់ខែ១មេ តែមិនបានច្រើននោះទេ ៕
ដោយ៖គឹម ចំរើន
