ខេត្តរតនគិរី៖ នាព្រឹកថ្ងៃទី២០ ខែមិនា ឆ្នាំ២០១៦នេះដែរ លោក ថង សាវុន អភិបាលនៃគណ:អភិបាលខេត្តរតនគិរីក៏បានអញ្ជើញបន្តចុះពិនិត្យសកម្មភាពស្តាឡើងវិញនូវប្រព័ន្ធធារាសាស្ត្រស្ថិតនៅឃុំល្បាំង១និងឃុំល្បាំង២ ស្រុកលំផាត់ ខេត្តរតនគិរី ដែលជាជំនួយរបស់ប្រទេសជប៉ុន រួមមានប្រឡាយមេចំនួន១ខ្សែប្រវែង១២០០ម៉ែត្រ ប្រឡាយរងចំនួន៤ ខ្សែប្រវែង៣.៣៧៥ម៉ែត្រប្រឡាយនាំទឹកចូលប្រវែង៩០០ម៉ែត្រទំនប់១ខ្សែប្រវែង៧៧៥ម៉ែត្រនិងសំណង់សិល្បៈការចំនួន៤កន្លែង ។ នៅឆ្នាំ២០១៥មន្ទីរធនធានទឹកបានធ្វើការស្តាឡើងវិញដោយប្រើប្រាស់ថវិការាជរដ្ឋាភិបាលកម្ពុជានូវទំនប់ប្រវែង៧៧៥ម៉ែត្រប្រឡាយនាំទឹកចូលប្រវែង៦០០ម៉ែត្រផ្លូវចូលប្រព័ន្ធ៣០០ម៉ែត្រ និងជួសជុលទ្វាទឹក៣កន្លែង បច្ចុប្បន្ននេះសម្រេចបានប្រមាណ៨០%ហើយ ។
ក្នុងឱកាសនៃការចុះពិនិត្យនេះដែរ ឯកឧត្តមអភិបាលខេត្តមានប្រសាសន៏ឲ្យដឹងថា សមិទ្ធផលទាំងនេះគឺជាការយកចិត្តទុកដាក់របស់រាជរដ្ឋាភិបាលកម្ពុជាឆ្លើយតបតម្រូវការចាំបាច់របស់ប្រជាពលរដ្ឋក្នុងការស្រោចស្រពដាំណាំកសិកម្មនិងកសិឧស្សាហកម្មនិងបំពេញតម្រូវការប្រើប្រាស់ជាក់ស្តែងរបស់ប្រជាពលរដ្ឋនៅមូលដ្ឋានដើម្បីលើកកម្ពស់សេដ្ឋកិច្ចគ្រួសារកាត់បន្ថយភាពក្រីក្រស្របតាមយុទ្ធសាស្ត្រចតុកោណដំណាក់កាលទី៣នៃរាជរដ្ឋាភិបាលកម្ពុជាប្រឡាយនេះមានលទ្ធភាពផ្គត់ផ្គងលើផ្ទៃដីស្រែចំការប្រជាពលរដ្ឋចំនួន២៣០ហិកតានិងមានប្រជាពលរដ្ឋប្រមាណ២៣៥គ្រួសារនៅក្នុងឃុំល្បាំង១និងល្បាំង២ទទួលបានប្រយោជន៏ពីប្រព័ន្ធស្រោចស្រពនេះទាំងរដូវប្រាំង និងវស្សា ។
ឯកឧត្តមអភិបាលខេត្តក៏បានជំរុញណែនាំដល់មន្ទីរធនធានទឹកអាជ្ញាធរស្រុកនិងប្រជាពលរដ្ឋធ្វើយ៉ាងណារួមគ្នាថែរក្សានិងប្រើប្រាស់ឲ្យបានយូអង្វែងដើម្បីជាប្រយោជន៏សម្រាប់ប្រជាលរដ្ឋគ្រប់គ្នាដោយឡែកមន្ទីរពាក់ព័ន្ធបន្តកសាងនិងស្វែងរកប្រភពទឹកស្តុកត្រៀមបំពេញតំរូវការទៅថ្ងៃខាងមុខក្នុងន័យការពារភាពរាំងស្ងួតនារដូវប្រាំងនេះពិសេសស្របពេលដែលបរិយាកាសពិភពលោកកំពុងតែកើនឡើងនូវរលកកំដៅជាបន្តបន្ទាប់ ៕
សន ចានឌី
