មណ្ឌលគិរី៖ កិច្ចប្រជុំសំណេះសំណាល សមាជិកសមាគមអតីតយុទ្ធជនកម្ពុជាខេត្តមណ្ឌលគិរី ក្នុងគោលបំណងរឹតបន្ដឹងសម្ព័ន្ធភាពរវាងសមាជិកអតីតយុទ្ធជនកម្ពុជាដែលចូលនិវត្ដន៍ពីការងារ ដែលប្រព្រឹត្តិទៅនៅរសៀលថ្ងៃទី១៩ មីនា ២០១៦ ក្រោមអធិបតីភាពរបស់ឯកឧត្តមនាយឧត្តមសេនីយ៍ មាស សាវ៉ន អគ្គនាយក អគ្គនាយកដ្ឋានយោធិនសេវាក្រសួងការពារជាតិ អគ្គលេខាធិការរង នៃគណៈកម្មាធិការកណ្ដាលសមាគមអតីតយុទ្ធជនកម្ពុជា ឯកឧត្តម ចឹង សុចន្ថា អភិបាលរងខេត្ត ឯកឧត្តម ឃិន ម៉េងស្រេង មេបញ្ជាការយោធាខេត្ត និងមានការចូលរួមពីសំណាក់ប្រធាន អនុប្រធាន សមាជិកសមាគមអតីតយុទ្ធជនកម្ពុជា ព្រមទាំងក្រុមការងារជំនាញ។
ឯកឧត្តម សុចន្ថា អភិបាលរងខេត្តបានមានប្រសាសន៍ឲ្យដឹងថា ឯកឧត្ដមពិតជាមានកក្ដីរីករាយយ៉ាងខ្លាំងដែលមានគណៈកម្មាធិការជាអតីតយុទ្ធជនកម្ពុជាបានយកចិត្តទុកដាក់ចំពោះបងប្អូនដែលបានចូលនិវត្តន៍ពីការងារ និងបងប្អូនអតីតយោធិនពិការដែលបានបម្រើការងារក្នុងជួរកងទ័ពពេលកន្លងមក និងបានជួយលើកទឹកចិត្តដោះស្រាយបញ្ហាជូនបងប្អូនដែលកំពុងជួបការលំបាកខ្វះខាតដូចជា ដីសម្រាប់បង្កបង្កើនផល ផ្ទះសម្រាប់ស្នាក់នៅរបស់គ្រួសារយោធិនដែលបានទទួលមរណៈភាពទៅហើយនោះ ។
ឯកឧត្តមក៍មានប្រសាសន៍បន្ដន្ដទៀតថា យ៉ាងណាក៏ដោយគ្រប់អង្គភាពដែលពាក់ព័ន្ធនៃសមាជិកសមាគមអតីតយុទ្ធជនទាំងអស់ត្រូវធ្វើរបាយការណ៍បែបបទដែលទាក់ទងនៅពេលណាដែលមានបងប្អូនជួបនិងបញ្ហាអ្វីមួយដូចជា ការបាត់បង់អាយុជីវិតរបស់អតីតជនយុទ្ធ ឬមានបញ្ហាកង្វះស្បៀងអាហារ និងមានបញ្ហាផ្សេងៗទៀត។
នាឱកាសនេះដែរ ឯកឧត្តម នាយឧត្តមសេនីយ៍ មាស សាវ៉ន បានមានប្រសាសន៍ថ្លែងឲ្យដឹងថា ក្រោយពីបានធ្វើមហាសន្និបាតតំណាងឲ្យសមាគមអតីតយុទ្ធជនកម្ពុជានេះមក មានការអនុវត្តន៍តាមផែនការទិសដៅរបស់គណៈអចិន្រៃ្ដយ៍ និងបានចាត់តាំងពីមានការរៀបចំថ្នាក់កណ្ដាលរហូតដល់ខេត្ត ក្រុង ស្រុកដើម្បីមើលការខុសត្រូវចំពោះគ្រប់បញ្ហាដែលកើតមានឡើងលើបងប្អូនអតីតយុទ្ធជនយើង។ឯកឧត្តមបានមានប្រសាសន៍បន្ដថា គ្រប់មន្ដ្រីរាជការ កងរាជអាវុធហត្ថដែលបានកាន់ដំណែងជាតួនាទីនេះ ត្រួវជួយដល់បងប្អូនអតីតយុទ្ធយើងបានចូលនិវត្តន៍ និងជាយោធិនពិការ ដែលកន្លងមកមិនបានជួយផ្ដល់ឲ្យបានដិតដល់នៃការកង្វះខាតរបស់ពួកគាត់ ។
ទន្ទឹមនិងនេះឯកឧត្តមបានបន្ដទៀតថា ធ្វើយ៉ាងណាឲ្យមានការចុះសួរសុខទុក្ខ និងយកចិត្តទុកដាក់ឲ្យកាន់តែខ្លាំងលើអតីតយុទ្ធជន ក្នុងនោះត្រូវជម្រុញយ៉ាងណាឲ្យបន្ដយកសកម្មភាព លើស្ទួយរាល់នៃការជួបលំបាក និងលើស្ទួយជីវភាពរបស់បងប្អូនអតីតយុទ្ធជនឲ្យមានភាពល្អប្រសើរបន្ថែមទៀត។ជាចុងក្រោយនៃកិច្ចប្រជុំសំណេះសំណាលនារសៀលនេះ ក៍មានកម្មពិធីចែកអំណោយជូនដល់អតីតយុទ្ធជន ដែលបានចូលរួមប្រមាណជាង២០រូបផងដែរ ក្នុងនោះអំណោយរួមមាន អង្ករចំនួន១បេ មីចំនួន១កេស សារុងចំនួន១ និងថវិកាចំនួន១០មឺនរៀល៕
ដោយ៖គឹម ចំរើន
