ខេត្តរតនគិរី ៖ ថ្មីៗពីប្រជាពលរដ្ឋនៅភូមិតាំងជីក ឃុំញ៉ាង ស្រុកអណ្តូងមាស ខេត្តរតនគិរី បានបង្ហើបឲ្យដឹងថា មួយរយៈចុងក្រោយនេះមានឈ្មួញជួលឲ្យប្រជាពលរដ្ឋដឹកជញ្ជូនឈើតាមម៉ូតូចេញឆ្លងទៅប្រទេសវៀតណាមតាមច្រករបៀងក្បែរប៉ុស្តិ៍នគរបាលការពារព្រំដែនពាមអូរសាថី ភូមិតាំងជីក ឃុំញ៉ាង យ៉ាងអនាធិបតេយ្យ។
ប្រជាពលរដ្ឋបានឲ្យដឹងថា ប្រសិនបើគ្មានការឃុបឃិតបើកដៃពីសំណាក់ សមត្ថកិច្ចនគរបាលប៉ុស្តិ៍ការពារព្រំដែនពាមអូរសាថី៧០៧ និងយោធាការពារព្រំដែនកងអនុសេនាតូចទី២ ទេនោះគឺគ្មានឈ្មួញណាអាចដឹកជញ្ជូនឈើចេញទៅស្រុកយួនបានឡើយ។
ហេតុនេះហើយទើបមានសេចក្តីអំពាវនាវឲ្យលោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី ចាត់វិធានការទប់ស្កាត់បទល្មើសព្រៃឈើតាមតំបន់ព្រំដែនឃុំញ៉ាង ស្រុកអណ្តូងមាស ជាបន្ទាន់។
សេចក្តីរាយការណ៍ពីប្រជាពលរដ្ឋបានឲ្យដឹងថា កាលពីយប់ថ្ងៃទី៣០ ខែសីហា ឆ្នាំ២០២០ ម៉ូតូដឹកឈើប្រមាណជា៦០គ្រឿងបានកក់ស្ទះនៅចំណុចក្រុមហ៊ុនចម្ការកៅស៊ូ៧មករា ផារី និងនៅខាងក្រោយប៉ុស្តិ៍នគរបាលការពារព្រំដែនគោកពាមអូរសាថី៧០៧ ដោយសារសមត្ថកិច្ចឃាត់ទុកដើម្បីគាបយកលុយ។
បើតាមប្រភពពីក្រុមអ្នកដឹកឈើតាមម៉ូតូបានឲ្យដឹងថា សម្រាប់ការដឹកឈើតាមម៉ូតូ១គ្រឿង ត្រូវបង់លុយអស់៤៥ម៉ឺនរៀល ហើយឈ្មួញយួនដែលចាំទិញឈើនៅតាមខ្សែព្រំដែនត្រូវបង់លុយក្នុងមួយម៉ូតូអស់១,៥លានដុង ថែមទៀត។
ដូច្នេះសមត្ថកិច្ចនគរបាលនិងកម្លាំងយោធាការពារព្រំដែននៅចំណុចពាមអូរសាថី ភូមិតាំងជីក ឃុំញ៉ាង ស្រុកអណ្តូងមាស ប្រមូលលុយបានយ៉ាងច្រើនសន្ធឹកសន្ធាប់ក្នុងមួយយប់ៗ។
ប្រភពពីមន្ត្រីអង្គការក្រៅរដ្ឋាភិបាលនិងសកម្មជនព្រៃឈើក្នុងខេត្តរតនគិរី បានឲ្យដឹងថា ប្រសិនបើគ្មានការឃុបឃិតជាប្រព័ន្ធទេនោះ គឺគ្មានឈ្មួញណាអាចធ្វើសកម្មភាពដឹកជញ្ជូនឈើចេញទៅវៀតណាមតាមតំបន់ព្រំដែនក្នុងឃុំញ៉ាង ស្រុកអណ្តូងមាស បានឡើយ។
ជាក់ស្តែងមកដល់ពេលនេះក្រុមឈ្មួញនៅតែដឹកជញ្ជូនឈើចេញទៅប្រទេសវៀតណាមតាមតំបន់ព្រំដែនក្នុងឃុំញ៉ាង ស្រុកអណ្តូងមាស យ៉ាងគគ្រឹកគគ្រេង ហើយលោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី និងលោក យ៉ឹម ចំណាន ស្នងការនគរបាលខេត្តរតនគិរី មិនទាន់ ចាត់វិធានការបង្ក្រាបប្រកបដោយប្រសិទ្ធភាពនៅឡើយទេ។
ប្រការនេះកំពុងតែធ្វើឲ្យព្រៃឈើដែលនៅសេសសល់ក្នុងស្រុកតាវែង និងស្រុកអណ្តូងមាស ខេត្តរតនគិរី ចៀសមិនផុតពីសេចក្តីវិនាសសាបសូន្យនោះឡើយ៕
