(ខេត្តកំពត)៖ ថ្លែងនៅក្នុងឱកាសដឹកនាំកិច្ចប្រជុំស្ដីពី ដំណោះស្រាយលើបញ្ហាដីធ្លី ដែលស្ថិតក្នុងតំបន់ការពារធម្មជាតិ ក្នុងភូមិសាស្ត្រនៃខេត្តកំពត ដែលនៅសេសសល់មិនទាន់ដោះស្រាយរួច កាលពីពេលថ្មីៗ ដែលមានការចូលរួមពី អភិបាលរងខេត្ត អាជ្ញាធរ ក្រុង ស្រុក មន្ទីរ អង្គភាព ពាក់ព័ន្ធ លោក ជាវ តាយ អភិបាលនៃគណៈអភិបាលខេត្ត បានគូសបញ្ជាក់ថា ការរកដំណោះស្រាយបញ្ហាប្រឈម ពាក់ព័ន្ធនឹងការវាស់វែង ការផ្ដល់ប័ណ្ណកម្មសិទ្ធិ រួមនឹងការងារដោះស្រាយការវិវាទទំនាស់ដីធ្លីជាដើម ជាពិសេស នៅចំពោះមុខដែលត្រូវអនុវត្តន៍លើការងារកាត់ឆ្វៀលដីពាក់ព័ន្ធក្នុងតំបន់ការពារធម្មជាតិជូនប្រជាពលរដ្ឋ គឺជាអនុសាសន៍ដ៏ខ្ពង់ខ្ពស់របស់សម្ដេចតេជោហ៊ុន សែនប្រមុខរាជរដ្ឋាភិបាល ដែលតែងបានជំរុញ និងក្រើនរំលឹកដល់អាជ្ញាធរមូលដ្ឋានថ្នាក់ក្រោមជាតិ ក្នុងគោលបំណងពន្លឿនការផ្ដល់កម្មសិទ្ធិដីធ្លីជូនប្រជាពលរដ្ឋឲ្យបានកាន់កាប់ស្របច្បាប់សម្រាប់បង្កបង្កើផល សំដៅធ្វើឲ្យកំណើនសេដ្ឋកិច្ចគ្រួសារនិងការកាត់បន្ថយភាពក្រីក្ររបស់ប្រជាពលរដ្ឋ។
លោកអភិបាលខេត្តបានបញ្ជាក់ទៀតថា ដើម្បីឆ្លើយតបទៅនឹងអនុសាសន៍ដ៏ខ្ពង់ខ្ពស់របស់សម្ដេចតេជោហ៊ុន សែន ក្នុងការជំរុញធ្វើឱ្យប្រសើរឡើងភាពកាន់កាប់ដីស្របច្បាប់របស់ប្រជាពលរដ្ឋ ក៏ដូចជាការ រួមគ្នា ទប់ស្កាត់ បញ្ហាទំនាស់វិវាទដីធ្លី បញ្ហាការចូលទន្ទ្រានកាន់កាប់ ដីសាធារណៈរបស់រដ្ឋ ដីសហគមន៍និងដីឯកជន តាមគ្រប់រូបភាពឱ្យមានប្រសិទ្ធភាពខ្ពស់។
លោកអភិបាលខេត្តក៏បានសំណូមពរ ដល់អាជ្ញាធរក្រុង ស្រុក និងមន្ត្រីនៃមន្ទីរ អង្គភាពពាក់ព័ន្ធ សូមយកចិត្តទុកដាក់ ជំរុញល្បឿន នៃដំណើរការចុះអនុវត្តសកម្មភាពវាស់វែងឆ្វៀលដីជូនប្រជាពលរដ្ឋ ដែលបាននឹងកំពុងកាន់កាប់និងអាស្រ័យផលជាក់ស្តែងយូរឆ្នាំ នៅលើទីតាំងដីដែលស្ថិតក្នុងផែនទីតំបន់ការពារធម្មជាតិឬគម្របព្រៃឈើក្នុងខេត្តកំពត ដោយមានការប្រុងប្រយ័ត្ន និងធ្វើឱ្យបានលឿនឆាប់រហ័ស ក្នុងការប្រមូលទិន្នន័យនិងកសាងឯកសារ ដោយមានកិច្ចសហការពីអាជ្ញាធរមូលដ្ឋាន និងមន្ទីរអង្គភាពពាក់ព័ន្ធ ពិសេសមន្ទីរបរិស្ថានខេត្តនិងខណ្ឌរដ្ឋបាលព្រៃឈើខេត្ត ដោយកំណត់ឲ្យហើយនៅក្នុងចុងខែសីហាឆ្នាំ ២០២០នេះ ដើម្បីដាក់ជូនទៅថ្នាក់ជាតិឬប្រមុខរាជរដ្ឋាភិបាលផ្ដល់ជូនកម្មសិទ្ធិស្របច្បាប់ដល់ប្រជាពលរដ្ឋ។
ជាមួយនឹងការអនុវត្តសកម្មភាពការងារនេះ ទៀតសោត លោកអភិបាលខេត្ត ក៏បានណែនាំដល់អាជ្ញាធរនិងមន្ត្រីអង្គភាពពាក់ព័ន្ធ ត្រូវមានការយកចិត្តទុកដាក់ខ្ពស់ក្នុងភារកិច្ចបំពេញការងារ ឲ្យបានល្អ ប្រកបដោយ តម្លាភាព ប្រសិទ្ធភាព នឹងទទួលលទ្ធផលបានល្អប្រសើរ។
សូមបញ្ជាក់ថា យោងតាមទិន្នន័យរបស់មន្ទីរបរិស្ថានខេត្ត នៅក្នុងខេត្តកំពត មានតំបន់ការពារធម្មជាតិចំនួន២
គឺទី១-តំបន់ការពារទេសភាពអន្លង់ព្រីងស្ថិតនៅក្នុងស្រុកកំពង់ត្រាច នៅតំបន់នោះមិនមានជាប់ពាក់ព័ន្ធ បញ្ហាសេសសល់ដីប្រជាពលរដ្ឋអាស្រ័យផលទេ ដោយសារតំបន់នោះជាតំបន់បឹង និងមានបង្គោលព្រំ ច្បាស់លាស់។ទី២-ឧទ្យានជាតិព្រះមុនីវង្សបូកគោ ស្ថិតនៅក្នុងភូមិសាស្ត្រ ក្រុងនិងស្រុកចំនួន៣ គឺក្រុងកំពត ស្រុកទឹកឈូនិងស្រុកឈូក ។ ក្នុងស្រុកទាំងបីនៃតំបន់ការពារធម្មជាតិនេះ គឺនៅក្នុងស្រុកទឹកឈូ ដែលមានបញ្ហាដីធ្លីនៅសេសសល់ មិនទាន់បានដោះស្រាយរួចដើម្បីចេញប័ណ្ណកម្មសិទ្ធិជូនប្រជាពលរដ្ឋនៅឡើយ៕ សេង ណារិទ្ធ
