ខេត្តសៀមរាប ៖ ឯកឧត្តមរដ្ឋមន្ត្រីក្រសួងសុខាភិបាលកម្ពុជា( ម៉ម ប៊ុន ហេង) បានធ្វើការក្រើនរំលឹកបន្ថែម ជាថ្មី ទៀត ដល់មន្ត្រីសុខាភិបាល និងគ្រូពេទ្យទាំងអស់ ដែលកំពុងបំពេញតួនាទីផ្ដល់សេវាពិនិត្យ ថែទាំ សុខភាព និងព្យាបាលជម្ងឺជូនប្រជាពលរដ្ឋថា ៖ ត្រូវប្រើប្រាស់ឲ្យអស់លទ្ធភាពនូវចំណេះដឹង ចំណេះធ្វើ និងអនុវត្តឲ្យបានខ្ជាប់ខ្ជួន ត្រឹមត្រូវ តាមក្រមសីលធម៌វិជ្ជាជីវៈរបស់ខ្លួន ។ ឯកឧត្តមបានសង្កត់ធ្ងន់ថា ៖ ការជួយសង្គ្រោះអាយុជីវិតអ្នកជម្ងឺ ឬ ជនរងគ្រោះ គឺមានតម្លៃជាគុណធម៌ ខ្ពង់ខ្ពស់បំផុត ។
ឯកឧត្តមរដ្ឋមន្ត្រី មានប្រសាសន៍យ៉ាងដូច្នេះ នៅមន្ទីរពេទ្យបង្អែកខេត្តសៀមរាប នាព្រឹកថ្ងៃទី០៣ ខែមិនា ឆ្នាំ២០១៦ ក្នុងឱកាសបើកសម្ភោធដាក់ឲ្យប្រើប្រាស់ជាផ្លូវការ អគារមជ្ឈមណ្ឌលផ្ដល់ឈាម ដែលជាអំណោយរបស់ រដ្ឋាភិបាល និងប្រជាពលរដ្ឋអាមេរិក តាមរយៈបញ្ញាការដ្ឋានកងទ័ពជើងទឹក សហរដ្ឋអាមេរិកប្រចាំតំបន់អាស៊ីប៉ាស៊ីហ្វិក ដែលបានចំណាយថវិការសាងសង់ និងបំពាក់ឧបករណ៍វេជ្ជសាស្ត្រអស់ជិត ៧៥ម៉ឺនដុល្លាអាមេរិក ។
ពិធីសម្ពោធនេះ គេក៏សង្កេតឃើញមានវត្តមាន លោកជំទាវ Julie Chung អគ្គរដ្ឋទូតរងសហរដ្ឋ អាមេរិកប្រចាំកម្ពុជា និង លោកវរៈសេនីយទោ Joel Buenatlor នាយការិយាល័យកិច្ចសហប្រតិ បត្តិការយោធាអាមេរិកប្រចាំស្ថានទូត នៅកម្ពុជាផងដែរ ។
លោក ក្រុស សារ៉ាត់ ប្រធានមន្ត្រីសុខាភិបាលខេត្តសៀមរាប បានរាយការណ៍ឲ្យដឹងថា ៖ ខេត្តសៀមរាប បច្ចុប្បន្នមានមន្ទីរពេទ្យបង្អែកខេត្តចំនួន១, ស្រុកប្រតិបត្តិ៤, មន្ទីរពេទ្យបង្អែកស្រុក៤, មណ្ឌលសុខភាព ៨៩ លើ១០០ឃុំសង្កាត់ , និងប៉ុស្តិ៍សុខភាពចំនួន៣ សារុបគ្រែអ្នកជម្ងឺមានចំនួន ៥៨១គ្រែ និងមានបុគ្គលិកពេទ្យសរុប ៨៩៦នាក់ (ស្ដ្រី ៤៩៣នាក់) ។ ដោយឡែកក្នុងឆ្នាំ២០១៥កន្លងមកនេះ មន្ទីរពេទ្យបង្អែកខេ្តសៀមរាប បានទទួលអ្នកជម្ងឺកើន ឡើង ដល់ ១៨.៦២៥នាក់ ក្នុងនោះ ១០ ទៅ ១៥ភាគរយ គឺមកពីបណ្ដាខេត្តផ្សេងៗ ផងដែរ ។
លោកបន្ថែមថា៖ មន្ទីរពេទ្យបង្អែកខេត្ត ជាមន្ទីរពេទ្យសាធារណៈដែលផ្ដល់សេវា សំណុំ សកម្មភាពបង្គ្រប់កម្រិត៣ ដែលមានគ្រែអ្នកជម្ងឺសម្រាកព្យាបាលចំនួន៣០០គ្រែ មានបុគ្គលិក ១៩៤នាក់ ។ មន្ទីរពេទ្យបានពង្រីកហេដ្ឋារចនាសម្ព័ន្ធជាបន្តបន្ទាប់ និងសេវាបន្ថែមជាច្រើនទៀត ផងដែរ។ ក្នុងនោះលោកក៏បានទទួលស្គាល់ថា ៖ ទោះជាយ៉ាងណា មន្ទីរពេទ្យពិតជានៅមាន ចំណុច សំខាន់ៗជាច្រើនទៀត ដែលត្រូវធ្វើការពង្រឹង កែលម្អរ និងត្រូវស្វែងរកការគាំទ្រ ដើម្បីដំណើរការឲ្យកាន់តែល្អប្រសើរឡើង ដូចជា គុណភាព ការគ្រប់គ្រង ក្រមសីលធម៌វិជ្ជាជីវៈបុគ្គលិក មន្ត្រីរាជការ ការបំពាក់ឧបករណ៍វេជ្ជសាស្ត្រ ការស្ដារ និងពង្រីកហេដ្ឋារចនាសម្ព័ន្ធ ជាដើម។
លោកស្រី Julie Chung បានមានប្រសាសន៍នៅក្នុងពិធីសម្ភោធអាគារមជ្ឈមណ្ឌល ផ្តល់ឈាម នោះថា ៖ នេះគឺជាការយកចិត្តទុកដាក់ និង កិច្ចសហការថ្មីមួយទៀតរបស់រដ្ឋាភិបាល និងប្រជាជន អាមេរិក ក្នុងការជួយលើកស្ទួយសុខភាពប្រជាជនកម្ពុជា តាមរយៈវិស័យសុខាភិបាល ។
លោកជំទាវ បានថ្លែងនូវក្តីមោទនភាពចំពោះកងទ័ពជើងទឹកអាមេរិកប្រចាំនៅប៉ាស៊ីហ្វិក ដែល បានយកកម្ពុជាជាដៃគូ និងមិនត្រឹមតែបានជួយសាងសង់អាគារមជ្ឈមណ្ឌលផ្តល់ឈាមនេះប៉ុណ្ណោះ ទេ ប៉ុន្តែនៅបានជួយផ្តល់ការបណ្តុះបណ្តាលដល់បុគ្គលិក និងរៀប ចំឲ្យមានដំណើរការនៅក្នុងអាគារនេះផងដែរ ។
ឯកឧត្តមរដ្ឋមន្ត្រី ម៉ម ប៊ុនហេង បានមានប្រសាសន៍ថា ៖ ដោយមានការយកចិត្តទុកដាក់ លើ បញ្ហាសុខភាព និងសុខមាលភាពរបស់ប្រជាពលរដ្ឋកម្ពុជាគ្រប់ស្រទាប់វណ្ណៈ ដោយមិនប្រកាន់និន្នា ការនយោបាយ ពណ៌សម្បុរ និងដើម្បីបង្កើនគុណភាពនៃការផ្ដល់សេវា ពិនិត្យ និងព្យាបាលជម្ងឺ ជូនប្រជាពលរដ្ឋប្រកបដោយប្រសិទ្ធិភាពខ្ពស់ ! រាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជានាយករដ្ឋមន្ត្រី បានគាំទ្រយ៉ាងពេញទំហឹង និងផ្ដល់អាទិភាពដល់វិស័យសុខាភិបាល ដែលធ្វើឲ្យហេដ្ឋារចនាសម្ព័ន្ធ និងសេវាកម្មនៃវិស័យអទិភាពមួយនេះ បានរីកដុះដាលដល់ជនបទ ។
ទន្ទឹមនឹងសេចក្តីថ្លែងអំណរគុណចំពោះម្ចាស់ជំនួយ ដៃគូរអភិវឌ្ឍន៍ និងអ្នកពាក់ព័ន្ធនានា ដែល បានជួយឧបត្ថម្ភ គាំទ្រសម្រាប់ឲ្យមានការរីកចម្រើនលើវិស័យសុខាភិបាល ឯកឧត្តមបានថ្លែងនូវ សេចក្តីអំពាវនាវ ជូនដល់ប្រជាពលរដ្ឋ ជនអ្នកសប្បុរសទាំងអស់ ចូលរួមបរិច្ឆាគឈាម ដើម្បីសង្គ្រោះ ជីវិតមនុស្ស ។ សូមបញ្ជាក់ថា នៅព្រឹកនៃថ្ងៃបើកសម្ពោធអាគារមជ្ឈមណ្ឌលផ្តល់ឈាមនេះ មន្ទីរពេទ្យបង្អែកខេត្តសៀមរាប បានទទួលនិស្សិតមកពីសាកលវិទ្យាល័យអង្គរ និងកម្មសិក្សាការី ពេទ្យសរុបចំនួន ៥៤នាក់ ជាអ្នកស្ម័គ្រចិត្ត ផ្តល់ឈាមជូនដល់មជ្ឈមណ្ឌលមួយនេះ ផងដែរ ៕
ដោយ ៖ លុច ណាម សៀមរាប
