ខេត្តប៉ៃលិន៖ នៅក្នុងហាងសម្រស់ជាយក្រុងមានកាុរភ្ញាក់ផ្អើលមួយ បានកើតឡើងកាលពីវេលាម៉ោង១២និង៣០នាទីរំលងអាធាត្រ ឈានចូលថ្ងៃទី២ ខែមីនា ឆ្នាំ២០១៦ ខណៈពេលប្រជាពលរដ្ឋបានឮសំឡេងផ្ទុះអាវុធជាច្រើនគ្រាប់ ក្នុងហាងផឹកស៊ីមួយកន្លែងយីហោ សម្រស់ជាយក្រុង ស្ថិតក្នុងភូមិដីក្រហម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពព័ត៌មាននៅវិញកន្លែងកើតហេតុ បានឲ្យដឹងថា៖ មុនពេលកើតហេតុគេឃើញមនុស្សប្រហែលជាង១០នាក់ ដែលគេស្គាល់ថាជាប៉ូលីសនៃស្នងការដ្ឋាននគរបាលខេត្តប៉ៃលិន បានចូលផឹកស៊ីក្នុងហាងមួយកន្លែង ដែលមានទីតាំងខាងលើ កាលពីវេលាម៉ោង៩និង០០នាទីយប់ថ្ងៃទី១ ខែមីនា ឆ្នាំ២០១៦ ។ ប្រភពព័ត៌មានបន្តថា៖ មួយសន្ទុះក្រោយមក ស្រាប់តែឮសូរសំឡេងផ្ទុះអាវុធជាច្រើនគ្រាប់ក្នុងហាងនោះ ដោយឮសំឡេងស្រែកឡូរឡារ និងមានមនុស្សរត់ចេញមកខាងក្រៅហាងជាច្រើននាក់ មានអ្នកខ្លះរត់ពួនក្នុងព្រៃ ហើយខ្លះទៀតមើលទៅដូចជាស្លឹកបាស់ត្រួវខ្លាញ(សំដីពលរដ្ឋ) ព្រោះខ្លាចត្រួវគ្រាប់កាំភ្លើង ។
ប្រភពព័ត៌មានពីបុគ្គលិកបំរើការក្នុងផឹកស៊ី បានប្រាប់បណ្ដាញព័ត៍មានថា៖ មុនពេលកើតហេតុ មានមនុស្សមួយក្រុមជិៈរថយន្តមួយគ្រឿង ចូលមកក្នុងហាងយីហោខាងលើ ដោយស្ថានភាពស្រវឹងស្រាប់ ព្រមទាំងមានអាវុធ ដែលគេស្គាល់ថាជាមន្ត្រីប៉ូលីសស្នងការខេត្តប៉ៃលិន ដោយចូលហូបក្នុងកញ្ចុះលេខ៩ ។ ប្រភពព័ត៌មានបន្តថា៖ បន្ទាប់ពីចូលក្នុងកញ្ចុះរួច ក្រុមប៉ូលីសទាំងនោះ បានហៅនារីក្នុងហាងឲ្យមកទទូលពួកគេ តែដោយមានភ្ញៀវនៅកញ្ចុះផ្សេងហៅ នារីទាំងនោះក៏ដើរទៅទទូលគេ ឃើញដូច្នោះមានប៉ូលីស ៤ទៅ៥នាក់ បានដើរទៅមើលកញ្ចុះដែលភ្ញៀវផ្សេងចូល ហើយក្រុមប៉ូលីសបាននិយាយទៅកាន់ភ្ញៀវទាំងនោះថា ពួកហែងមានជក់គ្រឿងញៀនអត់ ពេលនោះភ្ញៀវនិយាយថា មិនបានជក់ទេ តែត្រួវបានពួកប៉ូលីសនិយាយថា បើមិនជក់ប្រយ័ត្នអញពិនិត្យទឹកនោម ហើយភ្ញៀវនិយាយថា ពិនិត្យៗទៅបើខ្ញុំអត់ជក់ផង ពេលនោះស្រាប់តែឮសូផ្ទុះអាវុធមួយគ្រាប់ នៅខាងមុខកញ្ចុះភ្ញៀវនោះ ហើយក៏ឃើញភ្ញៀវទាំងនោះរត់ចេញមកក្រៅ ។
ប្រភព័ត៌មានបន្តទៀតថា៖ បន្ទាប់ពីបាញ់មួយគ្រាប់ ក្រុមប៉ូលីសទាំងនោះ បានដើរចូលក្នុងកញ្ចុះខ្លូនវិញ រួចក៏បានបាញ់ជាច្រើនគ្រាប់ក្នុងកញ្ចុះខ្លួន ធ្វើឲ្យធ្លុះធ្លាយដំបូលកញ្ចុះ ព្រមទាំងមានគ្រាប់បៀមជាប់និងធ្នឹមកញ្ចុះផងដែរ ។ ប្រភពព័ត៌មានពីម្ចាស់ហាងឈ្មោះ ណូ ភេទស្រី បានឲ្យកម្ពុជាថ្មីដឹងថា៖ មុនពេលកើតហេតុ រូបគាត់មិនបាននៅក្នុងហាងនោះទេ ព្រោះជាប់កម្មវិធីខាងក្រៅ តែក្រោយពីផ្ទុះអាវុធមួយគ្រាប់ទើបគាត់មកដល់ ហើយរូបគាត់បានស្នើសុំឲ្យពួកប៉ូលីសទាំងនោះឈប់បាញ់ តែគេ(ពួកប៉ូលីស)នៅតែបាញ់ដដែល រួចពួកគេក៏ចេញមកខាងមុនហាង ហើយបាញ់ជាច្រើនគ្រាប់ទៀត រួចបើកឡានទៅបាត់តែម្តង ។ តាមប្រភពព័ត៌មានពីអាជ្ញាធរមូលដ្ឋាន បានបង្ហើបឲ្យដឹងថា៖ ករណីខាងលើ ម្ចាស់ហាងមិនបានរាយការណ៏ប្រាប់សមត្ថកិច្ច ឬអាជា្ញធរឲ្យដឹងទេ ហើយការបាញ់នេះគឺ មានសំបកគ្រាប់រួសប្រហែលជាង១៣សំបក និងគ្រាប់បៀមមួយ ចំណែកកាំភ្លើងដែលបាញ់ជាកាំភ្លើងខ្លីម៉ាកឡុក និងK54 ។
ប្រភពព័ត៌មានបង្ហើបឲ្យដឹងទៀតថា៖ អ្នកដែលគេសង្ស័យបាញ់បោះដោយសេរីឈ្មោះចាន់វាសនានិងឈ្មោះគូរ៉ូដែលជាមន្ត្រីប៉ូលីសសេដ្ឋកិច្ច នៃស្នងការនគរបាលខេត្តប៉ៃលិន ។ពាក់ព័ន្ធករណីខាងលើនេះភ្នាក់ងារកម្ពុជាថ្មី ប្រចាំខេត្តប៉ៃលិន បានទាក់ទងទៅលោក ជា ចាន់ឌិន ស្នងការនគរបាលខេត្តប៉ៃលិន កាលពីវេលាម៉ោង២និង៤០នាទីរសៀលថ្ងៃនេះ តាមទូរស័ព្ឌ ប៉ុន្តែលោកជាប់រវល់ប្រជុំ រួចក៏បិទទូរស័ព្ឌ ។
សូមបញ្ជាក់ថា ៖ ករណីខាងលើនេះត្រួវបានមន្ត្រីកងរាជអាវុធហត្ថខេត្តចុះទៅពិនិត្យកន្លែងកើតហេតុកាលពីវេលាម៉ោង១០និង៣០នាទីព្រឹកថ្ងៃនេះ ព្រមទាំងប្រមូលវត្ថុតាង មកធ្វើកោសល្យវិច្ឆ័យ និងស្រាវជ្រាវរកមុខសញ្ញាជនបាញ់បោះដោយសេរីនេះផងដែរ ៕
ស សារឿន
