មណ្ឌលគិរី ៖ ចាប់តាំងពីម៉ោង៥ល្ងាច ថ្ងៃទី២ មិនា រហូតមកដល់ល្ងាចថ្ងៃទី៣ មិនា ២០១៦ នៅមិនទាន់រលត់អស់នៅឡើយ។ ការឆេះនោះ ត្រូវគេឃើញថា ស្របពេលដែល ក្រុមហ៊ុនមួយនេះ កំពុងត្រូវបានគណៈកម្មការចម្រុះថ្នាក់ជាតិទប់ស្តាត់ នឹងបង្ក្រាបបទល្មើសព្រៃឈើ ដាក់ពាក្យបណ្តឹងទៅតុលាការខេត្តមណ្ឌលគិរី ក្នុងសំនុំរឿងរក្សាទុកឈើខុសច្បាប់។
ករណីមានភ្លើងឆេះឈើ ក្នុងក្រុមហ៊ុនដែលកំពុងជួបរឿងអាស្រូវមានពាក្យបណ្តឹងនៅតុលាការនេះ ត្រូវបានមជ្ឈដ្ឋានានានិយាយថា វាអាចជាចេតនាពីម្ចាស់ក្រុមហ៊ុនឬជនណាម្នាក់ដែលជាប់ពាក់ព័ន្ឋ នៅក្នុងបទឧក្រិដ្ឋកម្មព្រៃឈើខាងលើ ព្រោះការដុតបំផ្លាញនេះ ប្រហែលជាអ្នកប្រព្រឹត្តយល់ឃើញថា អាចជួយកាត់បន្ថយនូវទោសទណ្ឌនានា ដែលមានចែងក្នុងច្បាប់ព្រៃឈើ មិនសូវធ្ងន់ ពេក។
សេចក្តីរាយការណ៏បានឲ្យដឹងថា គេមិនបានដឹងភ្លើងបានចាប់ផ្តើមឆេះពីពេលណានោះទេ លុះវេលាម៉ោងប្រហែលជា៥ល្ងាច ស្រាប់តែគេប្រទះឃើញមានផ្សែងហ៊ុយពេញផ្ទៃមេឃ នឹងមានអណ្តាតភ្លើងយ៉ាងសន្ឋោសន្ឋៅចេញពី គំនរឈើហុបនឹងឈើអារដែលមាន ចំនួនរាប់ពាន់កំណាត់។ ប្រភពបន្តថា បើទោះជានៅទីតាំងស្តុកឈើក្នុងក្រុមហ៊ុនខាងលើ មានសមត្ថកិច្ចចម្រុះនៅយាមល្បាតពិតមែន តែភ្លើងបានឆេះគំនរឈើទាំងនោះ ពេញបន្ទុករហូតមិនអាចរកវិធី សង្គ្រោះឈើដែលមានមុខកាត់ធំៗទាំងនោះវិញបានទេ គឺបានត្រឹមឈរមើលនឹងរត់គេចចេញពី អណ្តាលភ្លើងដែលកំពុងឆេះពេញបន្ទុក នោះប៉ុណ្ណោះ។
ក្រោយពីមានហេតុការណ៍ភ្លើងឆេះគំនរឈើរាប់ពាន់ម៉ែត្រគូបរួចមក នៅព្រឹកថ្ងៃទី៣ មិនា ២០១៦ គេឃើញលោកនាយខណ្ឌរដ្ឋបាលព្រៃឈើមណ្ឌលគិរី បានដឹកនាំមន្ត្រីជំនាញចុះទៅទីតាំងកើតហេតុ។
ប្រភពពីមន្ត្រីរដ្ឋបាលព្រៃឈើបានឲ្យដឹងថា តាមការប៉ាន់ស្មានជំហ៊ានដំបូង ឈើដែលឆេះក្នុង ក្រុមហ៊ុនយូនីហ្គ្រីននោះ មានអត្រាពី៦០ទៅ៧០% ចំណែកឈើដែលឆេះនោះជា ឈើប្រភេទចម្រុះ ដូចជា ឈើទាល សុក្រំ ផ្ចឹក គគីរ…។ល។ ប្រភពបន្តថា ឈើដែលឆេះនោះគឺជា ឈើដែល គណៈកម្មការចម្រុះថ្នាក់ជាតិទប់ស្តាត់ នឹងបង្ក្រាបបទល្មើសព្រៃឈើ បានធ្វើការវាស់វែងរួចអស់ហើយ ដែលមានចំនួនប្រមាណជិត២ពាន់ម៉ែត្រគូប នឹងកំពុងមានចំណាត់ការនៅតុលាការខេត្ត ត្បិតឈើទាំងនោះ គឺមិនមានច្បាប់ទេ។
អភិបាលខេត្តមណ្ឌលគិរី លោក ស្វាយ សំអ៊ាង បានមានប្រសាសន៏ល្ងាចនៅថ្ងៃទី៣ មិនា ថា បើតាមការរាយការណ៏ភ្លើងនោះ អាចបណ្តាលមកពី ភ្លើងឆេះព្រៃ រាលដាលចំ…ព្រោះរដូវនេះ ប្រជាពលរដ្ឋបានកាប់ឆ្ការព្រៃនឹងដុត ដើម្បីទុកធ្វើស្រែ ចម្ការនារដូវវស្សា។ ចំណែកចំនួនឈើ ដែលគណៈកម្មការជាតិ វាស់វែងនោះ គឺមានចំនួនពិត ប្រាដកហើយ តែហើយសារភ្លើងនៅមានកម្តៅខ្លាំង ទើបមន្ត្រីជំនាញមិនទាន់អាចចូលទៅធ្វើការវាស់ ថាវាបានឆេះអស់ប៉ុន្មានទេ… ចាំនៅពេលដែលមន្ត្រីពន្លត់ភ្លើងអស់ មន្ត្រីជំនាញនឹងចូលទៅ ធ្វើការវាស់វែងបន្ត។
ចំណែកលោក វង្ស សុកសេរី នាយខណ្ឌរដ្ឋបាលព្រៃឈើមណ្ឌលគិរី មិនអាចសុំការបំភ្លឺបានទេ ព្រោះលោកចូលទៅពិនិត្យនៅទីតាំងភ្លើងឆេះឈើក្នុងក្រុមហ៊ុនយូនីហ្គ្រីន ដែលតំបន់នោះមិនមានសេវាទូរស័ព្ទទេ។
ប្រភពដែលទទួលបានចុងក្រោយនៅ វេលាម៉ោង ៤ល្ងាច ថ្ងៃទី៣ មិនា ថា ឈើដែលឆេះក្នុងក្រុមហ៊ុនយូនីហ្គ្រីន អាចនឹងឆេះទាំងស្រុង ព្រោះមានកត្តាពីដែល មន្ត្រី ជំនាញមិនអាច ស្រោចស្រង់ឈើទាំងនោះវិញបាន ព្រោះបញ្ហាទីមួយផ្លូវធ្វើដំណើរចម្ងាយ ១៣០គីឡូម៉ែត្រពីទីរួមខេត្ត បើត្រូវយកឡានដឹកទឹកទៅប្រើ ក៏គ្មានផ្លូវសម្រាប់បើកឡាន ដឹកទឹកចូលដែរ។ ចំណែកបញ្ហាមួយទៀតត្រូវបានប្រភពបញ្ជាក់ថា គឺគ្មានប្រភពទឹក នៅទីនោះ សុទ្ឋតែព្រៃភ្នំ នឹងជារដូវប្រាំង អូរត្រពាំងនានារីងហួតទឹកអស់ ។
យ៉ាងណាក៏ដោយ ប្រជាពលរដ្ឋបានដាក់ចំងល់ថា នៅក្នុងក្រុមហ៊ុនខាងលើគឺមានមន្ត្រីកម្លាំងប្រដាប់អាវុធចម្រុះយាមកាម ចុះម្តេចបានជាភ្លើងឆេះឈើរាប់ពាន់ម៉ែត្រគូប មិនដឹងពីមូលហេតុ ព្រោះបើមានករណីភ្លើងឆេះ ព្រៃរាលដាលមែន ក៏គេអាចដឹងមុនដែរ ព្រោះភ្លើងមិនមែនចេះឆេះស្ងាត់ៗនោះទេ។
សូមបញ្ជាក់ថា គណៈកម្មការចម្រុះថ្នាក់ជាតិដែលដឹកនាំដោយលោកឧត្តមសេនីយ៏ឯក វង្ស ពិសេន បានចុះត្រួតពិនិត្យក្រុមហ៊ុនមួយឈ្មោះក្រុមហ៊ុនយូនីហ្គ្រីនដែលមានទីតាំងនៅស្រុកកោះញែក កាលពីរសៀលថ្ងៃទី២៧ មករា ២០១៦ ហើយបានរកឃើញឈើមានច្បាប់នឹងមិនទាន់ បង់ពន្ឋជាង១ពាន់ម៉ែត្រគូប ក្នុងបរិវេណដីក្រុមហ៊ុន នឹងឈើគ្មានម្ចាស់ចំនួនជាង៧០កំណាត់ ដែលលាក់ទុកក្បែរស្នាក់ការក្រុមហ៊ុន។
មន្ត្រីព្រៃឈើម្នាក់បានឲ្យដឹងថា គណៈកម្មការចម្រុះ ថ្នាក់ជាតិបានរកឃើញថា ឈើក្នុងក្រុមហ៊ុនដីសម្បទានសេដ្ឋកិច្ចយូនីហ្គ្រីន ស្ថិតនៅភូមិសាស្ត្រឃុំរយ៉ មានចំនួន៥០០ម៉ែត្រគូប បានវាយត្រាបង់ពន្ឋចូលរដ្ឋរួចហើយ ចំណែកឈើនៅក្នុងឃ្លាំងដែល មានទីតាំងនៅភូមិក្រោល ឃុំស្រែសង្គម មានចម្ងាយពីដីក្រុមហ៊ុនប្រមាណជាង៣០គីឡូម៉ែត្រ សម្រាប់ស្តុបឈើមានចំនួន២០០ម៉ែត្រគូប(អារជ្រៀករួច)ក៏បានបង់ពន្ឋរួចរាល់ដែល។
មន្ត្រីព្រៃឈើដដែលបានបន្តថា ក្រៅពីឈើដែលមានច្បាប់ ក្រុមមន្ត្រីជំនាញបានបង្ក្រាបឈើ ប្រភេទសុក្រំ ចំនួន៧០កំណាត់(អាចមានចំនួន២០ទៅ៣០ម៉ែត្រគូប) ដែលក្រុមឈ្មួញដឹកយក ទៅលាក់ទុកនៅក្រោយកម្ពោតព្រៃក្បែរស្នាក់ការក្រុមហ៊ុន។ ប្រភពពីមន្ត្រីដែលបានចូលរួមក្នុង សកម្មភាពត្រួតពិនិត្យឈើក្រុមហ៊ុនយូនីហ្គ្រីនបាននិយាយថា ក្នុងដីក្រុមហ៊ុនក្រៅពីឈើ ដែលមានច្បាប់ គេនៅឃើញមានឈើដែលមិនទាន់ បង់ពន្ឋចំនួន៥០០ម៉ែត្រគូបទៀត សុទ្ឋសឹងប្រភេទឈើមូលធំៗ ដែលបានដាក់បន្លំជាមួយឈើមានច្បាប់ ៕
គឹម ចំរើន
