ខេត្តកំពត ៖ ប្រភពព័ត៌មានពីប្រជាពលរដ្ឋដែលរស់នៅក្នុងស្រុកបន្ទាយមាស បានឱ្យដឹងថា ច្រករបៀងមួយឈ្មោះ ច្រកព្រែកអន្សា ស្ថិតនៅក្នុងឃុំព្រែកទន្លេ ស្រុកបន្ទាយមាស ខេត្តកំពត ត្រូវលោកអភិបាលស្រុកបន្ទាយមាស បើកសម្រាប់ ដឹកទំនិញគ្មានពន្ធពីប្រទេសវៀតណាម ចូលមកស្រុកខ្មែរ និងដឹកស្រូវខ្មែរចេញទៅលក់នៅវៀតណាម ដើម្បីប្រមូលុកលុយ ដាក់ហោប៉ៅ ។
ប្រភពព័ត៌មានបន្តឱ្យដឹងទៀតថា សម្រាប់ប្រជាពលរដ្ឋខ្មែរដែលដឹកស្រូវទៅលក់ឱ្យជនជាតិវៀតណាមតាមច្រកខាង លើ ក្រុមសមត្ថកិច្ចជាច្រើនស្ថាប័ន បានបង្ខំឱ្យជនជាតិវៀតណាមបង់លុយឱ្យ ពួកគេក្នុងមួយទូកមិនក្រោមពី ១លានរៀល នោះទេ ។ សមត្ថកិច្ចច្រើនស្ថាប័នរួមមាន មន្ត្រីនគរបាលសេដ្ឋកិច្ចខេត្តកំពត មន្ត្រីយោធាជើងទឹកខេត្តកំពត គយចល័ត មន្ត្រីសាលាស្រុកបន្ទាយមាស និងមន្ត្រីពាក់ព័ន្ធមួយចំនួនទៀត ក្នុងខេត្តកំពតបានដេកចាំយកលុយក្នុង១ថ្ងៃៗរាប់រយលាន រៀល យកមកចែកគ្នាចាយវាយយ៉ាងត្រជាក់ចិត្តជាទីបំផុត ។
ក្រុមឈ្មួញជនជាតិវៀតណាម បានឱ្យដឹងថា ពួកគាត់ចូលទិញស្រូវបងប្អូនខ្មែរបាន គឺត្រូវបង់លុយឱ្យក្រុមសមត្ថកិច្ចគ្រប់ស្ថាប័នពាក់ព័ន្ធទាំងអស់ ច្រើនណាស់ ដូច្នេះពួកគាត់មិនហ៊ានទិញស្រូវពលរដ្ឋខ្មែរទៀតនោះទេ បើទិញទាល់តែតម្លៃថោក ។
ក្រុមឈ្មួញទាំងនេះបន្តទៀតថា បើចង់ឱ្យស្រូវពលរដ្ឋខ្មែរឡើងថ្លៃនោះ សូមកុំឱ្យសមត្ថកិច្ចយកលុយពីពួកគេច្រើនពេក បើយកគួរកុំយកច្រើនពេក ១ទូក ១លាន ច្រើនណាស់ ។
លោកអភិបាលស្រុកបន្ទាយមាសបានឱ្យដឹងថា លោកទទួលស្គាល់ថា ច្រករបៀងខាងលើ គឺជាច្រកបើកដោយខុស ច្បាប់មែន ។ លោកបន្តទៀតថា ចំពោះស្រូវដែលប្រជាពលរដ្ឋខ្មែរដឹកលក់ឱ្យក្រុមឈ្មួញវៀតណាម លោកបានទៅប្រជុំផ្សព្វ ផ្សាយរួចហើយ កុំឱ្យសមត្ថកិច្ចទាំងនោះយកលុយឱ្យសោះ ព្រោះវាប៉ះពាល់ដល់តម្លៃស្រូវប្រជាពលរដ្ឋខ្មែរ ។
លោកអភិបាលបានបន្តទៀតថា លោកនឹងរាយការណ៍រឿងនេះទៅឯកឧត្តម អភិបាលខេត្តកំពត ដើម្បីចាត់វិធានការ ជាបន្ទាន់ដល់កងកម្លាំងសមត្ថកិច្ចទាំងនោះ ព្រោះសមត្ថកិច្ចទាំងនោះមានតួនាទីធំហួសពីសមត្ថកិច្ចរបស់ឯកឧត្តម ៕
