កណ្តាល ៖ ជនសង្ស័យប្រុសស្រី ២ នាក់ត្រូវបានកម្លាំងនគរបាលស្រុកកៀនស្វាយ សហការជាមួយកម្លាំងនគរបាលខេត្តពោធិ៍សាត់ ធ្វើការឃាត់ខ្លួនតាមដីកាបង្គាប់ឲ្យនាំខ្លួនរបស់តុលាការខេត្តពោធិ៍សាត់ពីបទឆរបោក
ហេតុការណ៍ឃាត់ខ្លួនជនសង្យ័យទាំង២នាក់នេះធ្វើឡើង កាលពីវេលាម៉ោង៧និង០០នាទីព្រឹកថ្ងៃទី២៨ ខែកុម្ភៈ ឆ្នាំ២០១៦ នៅចំណុចភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្តាល ដែលមានជនសង្ស័យទី១ ឈ្មោះ សូរ ឡាសុភក្ត្រា ភេទស្រីអាយុ៣២ឆ្នាំជនជាតិខ្មែរមានស្រុកកំណើតនៅភូមិកណ្តាល ឃុំអន្លង់ត្នោត ស្រុកក្រគរ ខេត្តពោសាត់ ទី២ ឈ្មោះ ហង្ស អង្គារ ភេទប្រុស អាយុ៣១ឆ្នាំ ជនជាតិខ្មែរ មានទីលំនៅជាមួយគ្នា ។ បច្ចុប្បន្ន រត់គេចមកសម្ងំស្នាក់នៅក្នុងឃុំសំរោងធំ ស្រុកកៀនស្វាយ ។
លោកវរសេនីយ៍ឯក ប៉ា សំអិត អធិការនគរបាលស្រុកកៀនស្វាយបានឲ្យដឹងថា ក្រោយមានការសូមសហការពីកម្លាំងនគរបាលនៃស្នងការដ្ធានខេត្តពោសាត់ ដឹកនាំដោយលោកវរសេនីយ៍ត្រី សន ធារ៉ានាយរងការិយាល័យនគរបាលព្រហ្មទណ្ឌកំរិតស្រាល ខេត្តពោធិ៍សាត់ និងមានការសម្រូបសម្រួល ពីលោក ហេង ផេង ព្រះរាជអាជ្ញារងអមសាលាដំបូងខេត្តកណ្តាល កម្លាំងបានធ្វើការស្រាវជ្រាវចុះអនុវត្តចាប់ឃាត់ខ្លួនជនសង្ស័យទាំង ២ នាក់ខាងលើ តាមដីកាបង្គាប់ឲ្យនាំខ្លួនរបស់លោក ពេជ្រ ចិន្តា ចៅក្រមស៊ើបសួរសាលាដំបូងខេត្តពោធិ៍សាត់លេខ ៨១៩ ចុះថ្ងៃទី០៧ ខែកញ្ញា ឆ្នាំ២០១៥ ពីបទ ឆបោក ប្រព្រឹត្តកាលពីអំឡុង ឆ្នាំ២០១៤ នៅភូមិកណ្តាល ឃុំអន្លង់ត្នោត ស្រុកក្រគរ ខេត្តពោធិ៍សាត់ ហើយបានរត់គេចមកសម្ងំលាក់ខ្លួន នៅក្នុងទឹកដីស្រុកកៀនស្វាយ ។ បន្ទាប់ពីធ្វើការឃាត់ខ្លួនបាន ជនសង្ស័យទាំង ២ នាក់ក៏កសាងសំណុំរឿងប្រគល់ជូនកម្លាំងនគរបាលខេត្តពោធិ៍សាត់ ចាត់ការបន្តតាមនីតិវិធី ៕
ស៊ឹម សាន់
