សៀមរាប ៖ ដើម្បីអនុវត្តឲ្យកាន់តែមានប្រសិទ្ធិភាព នូវគោលនយោបាយភូមិឃុំមានសុវត្ថិភាព នូវសន្តិសុខ សុវត្ថិភាពជូនប្រជាពលរដ្ឋ ភ្ញៀវទេសចរណ៍ជាតិអន្តរជាតិ មកស្នាក់នៅទស្សនាកម្សាន្តខេត្តសៀមរាប និង ការយកចិត្តទុកដាក់ខ្ពស់របស់ឯ.ឧឃឹម ប៊ុនសុង អភិបាលខេត្តសៀមរាប បានដាក់នូវបទបញ្ជាដល់កងកម្លាំងសមត្ថកិច្ចអាវុធហត្ថខេត្ត និង ស្នងការនគរបាលខេត្ត កាលពី រាត្រីថ្ងៃទី ២៨ ខែ កុម្ភះ ឆ្នាំ២០១៦ ក្នុងការបង្ក្រាប ទីតាំងកាស៊ីណូខុសច្បាប់មួយកន្លែង ជ្រោកក្រោម ភោជនីយដ្ឋាន ដែលមានយីហោ សាន់ស៊ាំង ស្ថិតនៅក្នុងបុរីប្រឹមប្រីយ៍ ក្នុងភូមិត្រពាំងសេះ សង្កាត់គោកចក ក្រុង ខេត្តសៀមរាប ។
កិច្ចប្រតិបត្តិការបង្ក្រាប់ទីតាំងកាស៊ីណូនេះ បានប្រព្រឹត្តធ្វើទៅកាលពីវេលាម៉ោង១៩ និង៣០នាទី ក្រោម ការដឹកនាំបញ្ជាផ្ទាល់របស់លោកវរៈសេនីយ៍ឯក ស្រី យូរ៉ា មេបញ្ជាការរងកងរាជ អាវុធហត្ថខេត្ត និង លោក ឧអ៊ុំ អមរ៉ា ស្នងការរងនគរបាលខេត្ត ដោយមានអាជ្ញាធរក្រុង រួមសហការគ្នាដឹកនាំកម្លាំង បានធ្វើការឃាត់ខ្លួននៅ នឹងទីតាំងលេងល្បែងផ្ទាល់បាន ចំនួន ១៤នាក់ មានស្រី ០៥នាក់ ដែលជាបុគ្គលិក ជាអ្នកគ្រប់គ្រង និង សន្តិសុខកាស៊ីណូ ព្រមទាំងអ្នកដែលបានចូលមកលេងល្បែងផងដែរ ។
តាមការបញ្ជាក់របស់លោកថា ដាលុច ប្រធានមន្ទីរយុត្តិធម៌ កងរាជអាវុធហត្ថខេត្ត បានចុះធ្វើការបង្ក្រាបករណីនេះ បានឲ្យដឹងថា ទីតាំងកាស៊ីណូដែលជ្រកក្រោមភោជនីយដ្ឋាន យីហោ សាន់ ស៊ាំង នេះ ត្រូវបានកម្លាំងសមត្ថកិច្ចយើង បានធ្វើការតាមដានជាយូមកហើយ ។ តែនៅថ្ងៃទី ២៧ កុម្ភះ ឆ្នាំ២០១៦ កម្លាំងយើង បានឃើញទីតាំងនេះ បានដឹកនូវសម្ភារៈចូលមកកាន់ភោជនីយដ្ឋាននេះ ដែលសុទ្ធសឹងជាឧបករណ៍អេឡិចត្រូនិច (ទូហ្គេម) ហើយទីតាំងនេះគឺបានបើកលេងទៅដោយភាពស្ងៀមស្ងាត ។ លុះនៅយប់ទី២៨ កុម្ភះ ២០១៦នេះ ដោយបានកំណត់នឹងក្តាប់បាននូវទីតាំងច្បាស់លាស់ និង ទទួលបាននូវបទបញ្ជាពីគណៈបញ្ជាការឯកភាពខេត្ត កម្លាំងអាវុធហត្ថខេត្ត បានសហការជាមួយកម្លាំងសមត្ថកិច្ចនគរបាលខេត្ត បានចុះធ្វើការបង្ក្រាប ដោយឃាត់ខ្លួនមនុស្សបាន ១៤នាក់ ។
ក្នុងនោះដែរ វត្ថុតាងដែលជាឧបករណ៍ សម្រាប់បម្រើការលេងល្បែង រួមមាន ទូហ្គេមបាញ់ត្រី ០៣គ្រឿង ទូហ្គេមបញ្ឈរ ២៨គ្រឿង , រ៉ូឡិច ០១គ្រឿង , តាបលេងបៀ ចំនួន ០៤ , កុំព្យូទ័រ ០២គ្រឿង , បៀរ ១០កេស កាម៉ារ៉ាសុវត្ថិភាព ០៥គ្រឿង និង សម្ភារៈ តុ កៅអី ជាច្រើន ត្រូវបានកម្លាំងសមត្ថកិច្ច ធ្វើការដកហូតជាវត្ថុតាង ដឹកជញ្ជូនយកមករក្សាទុកនៅទីបញ្ជាការដ្ឋានកងរាជអាវុធហត្ថខេត្តផងដែរ ។
ចំពោះម្ចាស់ទីតាំងនេះ សមត្ថកិច្ចយើងនៅមិនទាន់បានបញ្ជាក់របស់បុគ្គលណាម្នាក់ឡើយ ជាជនជាតិអ្វីនៅឡើយ គឺមានតែអ្នកគ្រប់គ្រង ដែលសមត្ថកិច្ចបានកំពុងសួរនាំ ។
ក្នុងនោះដែរ យើងក៏បានសង្កេតឃើញមានវត្តមានរបស់លោកស្នងការនគរបាលខេត្ត និង មន្ត្រីតុលាការខេត្ត បានអញ្ជើញទៅដល់ទីតាំងកាស៊ីណូ ក្រោយពេលដែលកម្លាំងសមត្ថកិច្ច ធ្វើការចាប់បញ្ជូនក្រុមអ្នកល្បែង ទៅកាន់ ទីបញ្ជាការដ្ឋានកងរាជអាវុធហត្ថខេត្ត ៕
ដោយ ៖ លុច ណាម
