ភ្នំពេញ ៖ នាព្រឹកថ្ងៃសៅរ៍ ទី ០១ ខែ សីហា ឆ្នាំ ២០២០នេះ នៅសាលាខណ្ឌដូនពេញ ក្រុមការងារអនុសាខាកាកបាទក្រហមកម្ពុជាខណ្ឌ ដឹកនាំដោយ លោក សុខ ពេញវុធ ប្រធានកិត្តិយសអនុសាខា បានរៀបចំពិធីជួបសាកសួរសុខទុក្ខ និងចែកអំណោយមនុស្សធម៌ ជូនដល់ចាស់ជរាចំនួន៣១គ្រួសារ ពិការចំនួន៦គ្រួសារ និងអ្នកផ្ទុកមេរោគអេដស៍ចំនួន៤គ្រួសារ សរុបចំនួន៤១គ្រួសារ ដែលជ្រើសរើសមកពីសង្កាត់ទាំង១១ ក្នុងខណ្ឌ ។
នាឱកាសនោះ លោកប្រធានកិត្តិយសអនុសាខា បានលើកឡើងពីការយកចិត្តទុកដាក់គិតគូខ្ពស់ជាប់ជានិច្ចពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចំពោះសុខទុក្ខប្រជាពលរដ្ឋយើងទូទាំងព្រះរាជាណាចក្រកម្ពុជា ជាពិសេសជនរងគ្រោះ និងងាយរងគ្រោះគ្រប់ប្រភេទ ដោយមិនប្រកាន់ពីនិន្នាការនយោបាយ ជាតិសាសន៍ សាសនា វណ្ណៈ ពណ៌សម្បុរអ្វីទាំងអស់ ពោល “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល“ ។
អំណោយមនុស្សធម៌ដែលបានចែកជូនក្នុង១គ្រួសារៗទទួលបាន៖ អង្ករ២៥គីឡូក្រាម ទឹកត្រី១យួរ ទឹកស៊ីអ៊ីវ១យួរ មី១កេស ថ្នាំដុសធ្មេញ១ដុំ និងថវិកាចំនួន២ម៉ឺនរៀល។
ឆ្លៀតក្នុងឱកាសនេះដែរ លោកប្រធានកិត្តិសយអនុសាខាក៏បានផ្តាំផ្ញើការសាកសួរសុខទុក្ខ ពីសំណាក់សម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហម និងឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ហើយលោកក៏សូមអំពាវនាវដល់បងប្អូនប្រជាពលរដ្ឋ បន្តយកចិត្តទុកដាក់ការពារ និងរក្សាអនាម័យជានិច្ចតាមការណែនាំរបស់ក្រសួងសុខាភិបាល ដើម្បីចូលរួមទប់ស្កាត់បង្ការហានិភ័យពីការឆ្លងជំងឺកូវីដ១៩ ទាំងអស់គ្នា ដោយផ្តើមចេញពីខ្លួនយើង ៕
