មណ្ឌលគិរី ៖ នៅយប់ថ្ងៃទី២៧ កុម្ភៈ ២០១៦ វេលាម៉ោង៩និង១០នាទីយប់ កងកម្លាំងអាវុធហត្ថស្រុកអូររាំង សហការណ៍ជាមួយកម្លាំងអាវុធហត្ថខេត្តបានធ្វើការចុះបង្ក្រាបរថយន្តដឹកឈើខុសច្បាប់១គ្រឿង ការធ្វើប្រតិបត្ដិការបង្ក្រាបនេះស្ថិតត្រង់ចំណុចភូមិអណ្តូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី។
លោក សូ សំអាត មេបញ្ជាការមូលដ្ឋានអាវុធហត្ថស្រុកអូររាំង បានប្រាប់ឲ្យដឹងថា រូបលោកនិងកងកម្លាំង បានធ្វើការបង្ក្រាបបានរថយន្តដឹកឈើ១គ្រឿង ដែលមានម៉ាក់Toyota WINDOMពណ៌ខ្មៅចង្កូតស្ដាំ មានពាក់ស្លាកលេខ ភ្នំពេញ2E-6009ដឹកឈើចំនួន០៧ដុំ ដែលជាប្រភេទឈើបេង ។
លោកបានបន្ដទៀតថា ចំណែកម្ចាស់រថយន្ដនឹងអ្នកបើកបរបានដឹងខ្លួនមុន ក៏រត់គេចខ្លួនចូលព្រៃបាត់ស្រមោលតែម្ដង ។
បច្ចុប្បន្នរថយន្តនឹងឈើត្រូវបាននាំយកទៅរក្សាទុកនៅឯមូលដ្ឋានកងរាជអាវុធហត្ថស្រុកអូររាំង ដើម្បីធ្វើការប្រគល់អោយខាងជំនាញរដ្ឋបាលព្រៃឈើចាត់វិធានការបន្ដទៀត ៕
ដោយ គឹម ចំរើន
