ខេត្តបន្ទាយមានជ័យ៖.គណៈប្រតិភូគណៈកម្មការទី២នៃរដ្ឋសភាដឹកនាំ ដោយឯកឧត្តម បណ្ឌិតរដ្ឋ ជាម យៀប ប្រធានគណៈកម្មការ សេដ្ឋកិច្ចហិរញវត្ថុ ធនាគារនិងសវនកម្មនៃរដ្ឋសភានិងសមាជិក-សមាជិកាគណៈកម្មការ បានអញ្ជើញចុះបំពេញបេសកកម្មការងារនៅខេត្តបន្ទាយមានជ័យ ក្នុងដំណើរបំពេញបេសកកម្មនេះ រដ្ឋបាលថ្នាក់ក្រោមជាតិគឺជាផ្នែកសំខាន់ ក្នុងការអនុវត្តគោលនយោបាយកែទម្រង់របស់រាជរដ្ឋាភិបាលនាព្រឹកថ្ងៃទី២៤ ខែកុម្ភៈ ឆ្នាំ២០១៦។
ឯកឧត្តម បណ្ឌិតរដ្ឋ ជាម យៀប ប្រធានគណៈកម្មការបានជម្រាបជូនដល់ឯកឧត្តម អភិបាលនៃគណៈអភិបាលខេត្តបន្ទាយមានជ័យពីគោលបំណងរបស់គណៈប្រតិភូ គណៈកម្មការ សេដ្ឋកិច្ចហិរញវត្ថុ ធនាគារនិងសវនកម្មនៃរដ្ឋសភាដែលចុះមកនាពេលនេះគឺដើម្បីស្វែងយល់ ពីផលប៉ះពាល់និងបញ្ហាប្រឈមក្នុងវិស័យសេដ្ឋកិច្ចហិរញវត្ថុ ធនាគារនិងសវនកម្មក្នុងការអនុវត្តកិច្ចការរដ្ឋបាលថ្នាក់ក្រោមជាតិ ព្រមទាំងសេចក្តីណែនាំឬលិខិតបទដ្ឋានថ្មីៗ របស់រាជរដ្ឋាភិបាលដោយផ្តោតទៅលើការអនុវត្តន៍ប្រមូលពន្ឋ ការផ្តល់សេវាសាធារណៈ ជូនប្រជាពលរដ្ឋនិងការគ្រប់គ្រងជនអន្តោប្រវេសន៍ជាដើម ក្នុងឱកាសនោះលោក សួន បវរ បានធ្វើសេចក្តីរាយការណ៍ជូនគណៈប្រតិភូពីការរីកចម្រើននិងលក្ខណៈ ភូមិសាស្ត្រនៃការគ្រប់គ្រងសន្តិសុខសណ្តាប់ធ្នាប់សាធារណៈនិង សុវត្ថិភាពសង្គមនៅក្នុងខេត្ត ពិសេសខេត្តបានពង្រឹងថែរក្សាការពារសន្តិសុខ ស្ថិរភាពសង្គមបានល្អជូនប្រជាពលរដ្ឋរស់នៅដោយសុខសន្តិភាព ទទួលបានផលនៃការអភិវឌ្ឍរបស់រដ្ឋាភិបាលស្របតាមយុទ្ធសាស្ត្រចតុកោណ និងកម្មវិធីគោលនយោបាយរបស់រដ្ឋាភិបាល ដែលមានសម្តេចតេជោ ហ៊ុន សែន នាយករដ្ឋមន្ត្រីជាប្រមុខដឹកនាំ ទន្ទឹមនឹងនេះខេត្តបានស្ថាបនា សាងសង់ប្រព័ន្ធហេដ្ឋារចនាសម្ព័ន្ធរូបវ័ន្តនិងគម្រោងផ្សេងៗជាច្រើន ទៀត ដើម្បីបម្រើដល់វិស័យទេសចរណ៍នៅក្នុងខេត្ត ។
ឯកឧត្តម បណ្ឌិតរដ្ឋ ជាម យៀប ប្រធានគណៈកម្មការទី២ បានលើកទ្បើងថា អាជ្ញាធរមូលដ្ឋានគឺជាផ្នែកមួយសំខាន់ណាស់ក្នុងការអនុវត្តគោលនយោបាយ កំណែទម្រង់ស៊ីជម្រៅ របស់រាជរដ្ឋាភិបាលអាណត្តិទី៥នេះ តាមយុទ្ធសាស្ត្រចតុកោណដំណាក់កាលទី៣ ឯកឧត្តម បណ្ឌិតរដ្ឋ បញ្ជាក់ថារាជរដ្ឋាភិបាលកំពុងខិតខំបន្តពង្រឹងពង្រីកនូវអភិបាលកិច្ច ល្អនិងការប្តេជ្ញាចិត្តយ៉ាងមោះមុតក្នុងការដឹកនាំប្រទេសជាតិដើម្បី ឆ្លើយតបទៅនឹងសំណូមពរនិងសេចក្តីត្រូវការទាំងទ្បាយរបស់ប្រជាពលរដ្ឋ ៕
