មណ្ឌលគិរី ៖ យុវជន៣នាក់បានរងរបួសធ្ងន់ស្រាល ក្នុងគ្រោះថ្នាក់ចរាចរណ៍ដោយសារពួកគេជិះម៉ូតូបញ្ច្រាសទិសគ្នា ក្នុងល្បឿនយ៉ាងលឿន ហើយបុកគ្នាពេញទំហឹង ។ ហេតុការណ៍នេះបានកើតឡើងនៅចំណុច ផ្លូវ ពូរ៉ាដែត ភូមិស្រែ (អំពូម)ឃុំប៊ូស្រា ស្រុកពេជ្រាដា ខេត្តមណ្ឌលគិរី ។
លោក យឹម ចិន្តា ប៉ូលិសចរាចរណ៍បានឲ្យដឹងថា ជុំវិញករណីគ្រោះថ្នាក់ចរាចរណ៍នេះដែរ គឺកើតឡើងនៅវេលាម៉ោង៧យប់ ថ្ងៃទី២៣ កុម្ភៈ ឆ្នាំ ២០១៦ ដោយសារម៉ូតូ ២ គ្រឿងបើកបញ្ច្រាស់ទិសគ្នា ហើយបុកចំពីមុខយ៉ាងពេញទំហឹង ធ្វើអោយបុរស ៣ នាក់បានរងរបួសយ៉ាងធ្ងន់ ។
លោកបានបន្តទៀតថា ម៉ូតូដែលបុកគ្នាឥឡូវត្រូវបានប៉ូលិសដឹកជញ្ជូនទៅរក្សាទុក នៅប៉ុស្តិ៍នគរបាលភូមិស្រែអំពូម ចំណែកឯជនរងគ្រោះ ត្រូវបានអ្នកសារព័ត៌មាន និងប្រជាពលរដ្ឋ និងក្រុមគ្រួសារដឹកជញ្ជូនយកមកសង្គ្រោះបន្ទាន់ នៅមន្ទីរពេទ្យបង្អែកខេត្តមណ្ឌលគិរី។
មូលហេតុគ្រោះថ្នាក់ចរាចរណ៍នេះ បង្កឡើងដោយបុរស ៣ នាក់បានជិះម៉ូតូ ២ គ្រឿង ដោយម៉ូតូ ១ គ្រឿងម៉ាក វេវ ពណ៌ខ្មៅ និងមួយគ្រឿងទៀត ម៉ាកស៊ីរ៉ូស ពណ៌ខ្មៅ បុកគ្នា ព្រោះតែមួយម៉ូតូម៉ាកវេវ ជិះគ្នាពីរនាក់បើកបរបញ្ច្រាស់ទិស ។ ហើយជនរងគ្រោះទាំងបីនោះ មានឈ្មោះ សឿន ម៉េងសៃ អាយុ ១៦ ឆ្នាំ សញ្ជាត្តិខ្មែរ មុខរបរបច្ចុប្បន្នកម្មករ មានទីលំនៅភូមិ ពូរ៉ាដែត ឃុំ ស្រែអំពូម ស្រុកពេជ្រាដា ខេត្តមណ្ឌលគិរី ឈ្មោះ ហ៊ួរ ម៉ៅ ភេទប្រុស អាយុ ១៨ ឆ្នាំ សញ្ជាត្តិខ្មែរ មុខរបរ កម្មករ មានទីលំនៅដូចខាងលើនេះ ឈ្មោះ ង៉ែត ប្រុស ភេទ ប្រុស អាយុ32ឆ្នាំ សញ្ជាត្តិខ្មែរមានទីលំ នៅស្នាក់នៅភូមិខាងលើ ។
ករណីនេះ សមត្ថកិច្ចបញ្ជាក់ថា មន្ត្រីជំនាញបានធ្វើការវ៉ាស់វែងរួចហើយ រង់ចាំម្ចាស់ម៉ូតូទាំងពីរ ជាសះស្បើយនឹងធ្វើការដោះស្រាយនៅពេលក្រោយ ៕
គឹម ចំរើន ហេង ចាន់ណុប
