ខេត្ដរតនគិរី ៖ ម្ចាស់រថយន្ដតូចធំ ដែលប្រកបរបរស៊ីឈ្នួលដឹកដំឡូងចេញពីទឹកដីខេត្ដរតនគិរីបានកើតក្ដីមិន សប្បាយចិត្ដចំពោះមន្ដ្រីត្រួតពិនិត្យ ជញ្ជីងថ្លឹងរថយន្ដមួយកន្លែង ដែលទើប បង្កើតថ្មី ដោយចោទថាមិនតម្លាភាព ថ្លឹងតែរថយន្ដពួកគាត់ ឯរថយន្ដមួយ ចំនួនទៀត ព្រោះតែខ្សែបក្ខពួក គ្រាន់តែ យកលុយមិនចាំបាច់ថ្លឹងឡើយ ។
បើតាមក្រុមអ្នកបើករថយន្ដទាំងនោះ បានរៀបរាប់ថា ជញ្ជីងថ្លឹងរថយន្ដមួយ កន្លែងនោះ ស្ថិតនៅតាមបណ្ដោយផ្លូវ ជាតិលេខ៧៨ ឃុំត្រញំងក្រហម ស្រុក កូនមុំ មានលោក ឃឹម រមុន្នី ជាប្រធាន គ្រប់គ្រង ។ ពួកគាត់បន្ដថា ចាប់តាំងពីជញ្ជីង ថ្លឹងរថយន្ដថ្មីនោះចាប់ផ្ដើមដំណើរការ គេសង្កេតឃើញថា មានរថយន្ដខ្លះត្រូវ ចូលថ្លឹង ឯរថយន្ដខ្លះទៀតដែលមានសែ សន្ដានមិនបានចូលថ្លឹងទេ គឺគ្រាន់តែ ឈប់បង់លុយតែប៉ុណ្ណោះ ។ សកម្មភាព បែបនេះពិតជាធ្វើឱ្យពួកគាត់មិនសប្បាយចិត្ដទេ ពីព្រោះមិនស្មើភាពគ្នា ។លោក ឃឹម រមុន្នី បាននិយាយថា លោកសូមបដិសេធការចោទប្រកាន់ របស់ពួកគេព្រោះថា បើទោះជារថយន្ដ នោះជាសែអ្នកធំណាមកអន្ដរាគមន៍ ក៏ដោយក៏លោកមិនព្រមជាដាច់ខាត គឺ អនុវត្ដតាមផ្លូវច្បាប់ ។ សព្វថ្ងៃនេះលោក បានថ្លឹងរថយន្ដដែលដឹកកសិផលពីខេត្ដ រតនគិរីបាន៨០ទៅ៩០ភាគរយហើយ ស្ទើរតែខូចជញ្ជីងទៅហើយ ។ បើទោះយ៉ាងនេះក្ដីគេសង្កេតឃើញ ថា រថយន្ដដឹកទំនិញលើសទម្ងន់មិន ឃើញតម្រូវឱ្យទម្លាក់នោះទេ ពោលគឺ មានការឃុបឃិតគ្នាឱ្យរថយន្ដដឹកទំនិញលើសទម្ងន់ធ្វើដំណើរទៅមុខជាថ្នូរនឹង ប្រាក់ ។ ក្រុមអ្នកថ្លឹងរថយន្ដនៅឃុំត្រពាំង ក្រហមសប្បាយចិត្ដនឹងការផាកពិន័យ ដោយមិនគិតអំពីស្ថានភាពផ្លូវដែលខូចនោះឡើយ ។
គេមិនដឹងថា គោលការណ៍របស់ ក្រសួងសាធារណការមានវិធានការ យ៉ាងណាចំពោះបញ្ហាជញ្ជីងថ្លឹងរថយន្ដ កាន់តែច្រើននៅតាមបណ្ដាផ្លូវជាតិ ប៉ុន្ដែ ផ្លូវកាន់តែខូចច្រើន ។ ក្រសួងសាធារណការ និងដឹកជញ្ជូនមានមោទនភាពចំពោះ ការផាកពិន័យរថយន្ដដឹកទំនិញលើស ទម្ងន់ ព្រោះបានលុយច្រើន ។ ប៉ុន្ដែភ្លេច គិតថាស្ថានភាពបែបនេះគឺផ្លូវរងការ ខូចខាតនិងច្បាប់ចរាចរណ៍មិនត្រូវបានអនុវត្ដ ៕
