ប៉ៃលិន ៖ បក្សពួកជនសង្ស័យចំនួន៤នាក់ត្រូវបាននគរបាលស្នងការខេត្តប៉ៃលិនតាមស្រាវជ្រាវតាមចាប់បានជាបន្តបន្ទាប់ ខណៈក្រុមចោរទាំងនោះប្លន់ផ្ទះវិងយីហោ”ហេង រចនា” រួចគេចខ្លួនបានមួយរយៈ ។ រហូតដល់ព្រឹកថ្ងៃទី៨ ខែកុម្ភៈនេះនៅស្នងការដ្ឋាននគរបាលខេត្តប៉ៃលិនបានរៀបចំបង្ហាញមុខក្រុមចោរប្លន់ទាំងនោះ។
បើតាមសម្តីស្នងការនគរបាលខេត្តប៉ៃលិន លោកឧត្តមសេនីយ៍ត្រី ជា ចាន់ឌិន បានអោយដឹងថាបន្ទាប់ពីមានករណីក្រុមចោរកាំភ្លើង AK-47 និងពូថៅ ២នាក់ដែលជិះម៉ូតូមួយគ្រឿង បានចូលទៅប្លន់ផ្ទះផ្ទេរប្រាក់ Wing នៅក្រុងប៉ៃលិននោះ កំលាំងរបស់លោកបានធ្វើការស្រាវជ្រាវរហូតចាប់ឃាត់ខ្លួនបានជាបន្តបន្ទាប់នៅរាជធានីភ្នំពេញចំនួន៤នាក់ ដោយមានឈ្មោះទី១.ហ៊ត វិសិដ្ឋ អាយុ២៧ឆ្នាំរស់នៅឃុំជប់ទី១ ស្រុកត្បូងឃ្មុំ ខេត្តត្បូងឃ្មុំ ទី២. ឈ្មោះ សេង ដា ភេទប្រុសអាយុ៣៥ឆ្នាំ រស់នៅស្រុកអួររាំងឳខេត្តកំពង់ចាមទី៣ឈ្មោះប៊ុនហេងហៅប៉ូគី ភេទប្រុសអាយុ៣៦ឆ្នាំនៅស្រុកបាទីខេត្តតាកែវនិងម្នាក់ទៀតឈ្មោះសនដនធីតាភេទស្រីអាយុ២៦ឆ្នាំនៅស្រុកត្បូងឃ្មុំខេត្តត្បូងឃ្មុំ។លោកស្នងការបានបញ្ជាក់ទៀតថាតាមចម្លើយសារភាពរបស់ក្រុមចោរទាំងនោះបានឆ្លើយថាគេធ្លាប់ធ្វើសកម្មភាព៤ខេត្តមកហើយ ជាពិសេសគឺខេត្តបាត់ដំបង ខេត្តប៉ៃលិននិងធ្លាប់មានដីការពីតុលាការខេត្តត្បូងឃ្មុំតាមចាប់ពាក់ព័ន្ធនឹងការប្លន់នៅខេត្តត្បូងឃ្មុំផងដែរ ។ ហើយក្រុមចោរទាំងនោះមានមេខ្លោងធំជាច្រើនទៀតតែវាមិនបានសារភាពថាជានរណានោះទេគឺវាធ្វើសកម្មភាពបែងចែកជាក្រុមដើរប្លន់ចំនួន៤ខេត្ត ។
លោកស្នងការខេត្តប៉ៃលិនសន្យានឹងតាមស្រាវជ្រាវចែកគ្នារកមុខសញ្ញាក្រុមចោរទាំងអស់នោះឲ្យបានដើម្បីធានាសុខសុវត្ថិភាពជូនដល់ពលរដ្ឋ លោកក៍បានអំពាវនាវដល់អាជីវករទាំងអស់ពិសឹសកន្លែងវេរលុយវិង និងAMK និងកន្លែងលក់មាសប្តូរលុយជាដើម ត្រូវតែប្រុងប្រយ័ត្នខ្ពស់និងរាយការណ៍បន្ទាន់បើមានសភាពការមិនប្រក្រតី។
សូមបញ្ជាក់ថា ក្រុមចោរទាំងនោះបានធ្វើសកម្មភាពប្លន់ផ្ទះវិងវេរលុយយីហោ ឈ្មោះ “ហេង រចនា” ស្ថិតនៅក្នុងភូមិ ប៉ាងរលឹម សង្កាត់អូតាវ៉ៅ ក្រុងប៉ៃលិន នៅវេលាម៉ោង៤ និង៤០នាទី រសៀលថ្ងៃទី២១ ខែមករា ឆ្នាំ២០១៦ ត្រូវក្រុមចោរប្រដា ប់អាវុធកាំភ្លើងAK និងពូថៅ ចូលប្លន់ ដោយយកអស់លុយប្រមាណ១ម៉ឺនដុល្លារ ហើយជនរងគ្រោះមានគ្នា២នាក់ជាម្ចាស់ផ្ទះ អាយុ៦០ឆ្នាំរងរបួសធ្ងន់ និងកូនប្រុសម្នាក់ ព្រមទាំងចៅស្រីតូចផងដែរ ។ បច្ចុប្បន្នជនសង្ស័យទាំងអស់ខាងលើត្រូវបានសមត្ថកិច្ចរៀបចំសំនុំរឿងបញ្ជូន ទៅអយ្យការអមសាលាដំបូងខេត្តរងចាំកាត់ទោសនាពេលក្រោយ ៕
