កាលពីថ្ងៃទី ០៣ ខែកុម្ភៈ ឆ្នាំ២០១៦ ឯកឧត្តម អភិបាលខេត្ត ច័ន្ទ សុផល និងសហការីព្រមទាំងអ្នកសារព័ត៌មាន មួយចំនួនបានទៅចូលរួមរំលែកទុក្ខជាមួយគ្រួសារសពអ្នកកាសែតម្នាក់ ដែលស្លាប់នៅគេហដ្ឋានរបស់គ្រួសារសពនៅភូមិ អូរតាគាំ ១ សង្កាត់ទួលតាឯក ក្រុងបាត់ដំបង និងសាកសួរសុខទុក្ខអ្នកកាសែតម្នាក់ទៀត ដែលរបួសធ្ងន់សម្រាកនៅមន្ទីរ ពេទ្យដោយសារតែគ្រោះថ្នាក់ចរាចរណ៍នៅស្រុកបវេល ។
កាលពីរសៀលថ្ងៃទី ០២ ខែកុម្ភៈ មានអ្នកកាសែតម្នាក់បានស្លាប់នៅនឹងកន្លែង និងម្នាក់ទៀតរងរបួសធ្ងន់ដោយសារ ពួកគេជិះម៉ូតូមកពីយកព័ត៌មាននៅស្រុកកំរៀង ហើយវិលត្រឡប់មកផ្ទះវិញ ក៏ជួបនឹងគ្រោះថ្នាក់ចរាចរណ៍ ត្រង់ផ្លូវកោងស្ថិត នៅក្នុងភូមិដង្គត់ ឃុំក្តុលតាហែន ស្រុកបវេល បណ្តាលឱ្យស្លាប់ និងរបួសធ្ងន់ ។
ឯកឧត្តម ច័ន្ទ សុផល អភិបាលខេត្តបានចូលរួមរំលែកទុក្ខជាមួយគ្រួសារសព និងចូលរួមសោកស្តាយចំពោះការបាត់ បង់អ្នកសារព័ត៌មានម្នាក់ដោយគ្រោះថ្នាក់ចរាចរដែលជាការបាត់បង់ធនធានមនុស្សម្នាក់ ដែលរដ្ឋ និងសារព័ត៌មានស្តីអំពីក្តី កង្វល់ និងការប្រឈមរបស់ប្រជាពលរដ្ឋជូនរាជរដ្ឋាភិបាលឱ្យបានជ្រាប ។
ក្នុងឱកាសនោះដែរ ឯកឧត្តម ច័ន្ទ សុផល អភិបាលខេត្តបានចូលបុណ្យសពអ្នកកាសែតកម្ពុជាអភិវឌ្ឍន៍ឈ្មោះ សុខ ចាន់ថន អាយុ ៥៦ឆ្នាំ ចំនួន ១លានរៀល និងអ្នកកាសែតគតិជាតិខ្មែរឈ្មោះ មាស ប៊ុនធឿន ដែលកំពុងសម្រាកព្យាបាលក្នុង មន្ទីរពេទ្យចំនួន ១០០ដុល្លារ ។ ដោយឡែកអ្នកសារព័ត៌មានក្នុងខេត្ត និងក្រៅខេត្តចូលបុណ្យសពជាង ៣០ម៉ឺនរៀល និងអ្នក របួសជាង ២០ម៉ឺនរៀល ។
សារព័ត៌មានកម្ពុជាអភិវឌ្ឍន៍ និងអ្នកកាសែតទាំងអស់ដែលនៅក្នុងខេត្តបាត់ដំបង សូមអរគុណយ៉ាងជ្រាលជ្រៅ ដល់ ឯកឧត្តម ច័ន្ទ សុផល អភិបាលខេត្តបាត់ដំបង សូមជួបនូវពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាត ឡើយ ៕
