បាត់ដំបង ៖ មនុស្សស្លាប់ ៣ ករណីផ្សេងគ្នាក្នុងថ្ងៃតែមួយ នៅស្រុកមោងឬស្សី និងស្រុកភ្នំព្រឹក ។ ករណីទី ១ បុរសម្នាក់ញៀនថ្នាំ មកផ្ទះជួយភ្ជួរស្រែឪពុកម្តាយ មុតឬស្សី រយៈពេល២ខែ ព្យាបាលមិនជា បានសម្រេចចិត្តយកក្រម៉ាចងកលើដើមស្វាយ សម្លាប់ខ្លួន កាល ពីវេលាម៉ោង ១៤ រសៀល ថ្ងៃទី១៦ ខែវិច្ឆិកា ឆ្នាំ២០១៤ នៅចំណុចវាលស្រែខាងលិចភូមិ ភូមិរំចេក ឃុំ ព្រៃស្វាយ ស្រុកមោងឫស្សី ខេត្តបាត់ដំបង ។ ករណីទី ២ កុមារា ម្នាក់បានលូនចូលដីចំការអ្នកភូមិ ស្ទូចសត្វកង្កែបរអិលជើងចូលស្រះទឹក បណ្តាលអោយលង់ទឹកស្លាប់ កាលពីម៉ោង១៦រសៀល ថ្ងៃទី១៦ ខែវិច្ឆិកា ឆ្នាំ២០១៤ នៅចំណុចភូមិកកោះ ឃុំកកោះ ស្រុកមោងឫស្សី ខេត្តបាត់ដំបង ។ ករណីទី៣ យុវជនម្នាក់យកខ្សែ នីឡុងចងក លើដើមព្រីង សម្លាប់ខ្លួន ពេលទទួលដំណឹងសង្សារគ្រោះថ្នាក់ចរាចរណ៍នៅភ្នំពេញស្លាប់ កាលពីម៉ោង២និង៣០នាទី យប់ថ្ងៃទី១៦ ខែវិច្ឆិកា ឆ្នាំ២០១៤ នៅភូមិឆ្កែស្គម ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ។
នគរបាលប៉ុស្តិ៍ ព្រៃស្វាយ ស្រុកមោងឬស្សីបានឱ្យដឹងថា បុរសរងគ្រោះ ដែលបាន ចងសម្លាប់ខ្លួន មានឈ្មោះ ម៉ុន សុភា អាយុ ២៥ឆ្នាំ មុខរបរកម្មករ រស់នៅភូមិ ឃុំកើត ហេតុខាងលើ ។ វត្ថុតាងក្រម៉ាពណ៌ខៀវជាប់និងកជនរងគ្រោះ លើដើមស្វាយ ។
នគរបាលប៉ុស្តិ៍ ព្រៃស្វាយបានបញ្ជាក់ថា បុរសរងគ្រោះពីមុនធ្លាប់ប្រើប្រាស់គ្រឿងញៀន និងទៅធ្វើកម្មករនៅខេត្តបន្ទាយមានជ័យ ពេលដល់រដូវភ្ញួររាស់ ឪពុកម្តាយបានហៅមកជួយភ្ជួរដីស្រែ នៅពេលភ្ជួរ ជនរងគ្រោះបានមុតឬស្សី ហើយអោយគ្រូពេទ្យព្យាបាល ២ ខែហើយនៅមិនជា ។ ជនរងគ្រោះទៅណាមកណា រំកិលគូថ ហើយត្អូញថាចង់តែស្លាប់ លុះនៅថ្ងៃកើតហេតុ ក៏ប្រទះឃើញជនរងគ្រោះចងកស្លាប់តែម្តង ។
នគរបាលប៉ុស្តិ៍កកោះ បានអោយដឹងថា កុមារាដែលលង់ទឹកស្រះស្លាប់ មានឈ្មោះ កែវ រស់ អាយុ១១ឆ្នាំភូមិកកោះ ឃុំកកោះ ស្រុកមោងឫស្សី ខេត្តបាត់ដំបង ។ វត្ថុតាង មានដងសន្ទូចនៅក្បែរស្រះទឹក ទំហំ ៦ គុណ ៩ ម៉ែត្រ ជម្រៅ ៤ ម៉ែត្រ ។
ប្រភពពីក្មេងក្នុងភូមិបានអោយដឹងថា មុនពេលកើតហេតុគេឃើញកុមារារងគ្រោះកាន់ដងសន្ទូចចេញពីផ្ទះ ក្រោយមកសាច់ញាតិដើររកជនរងគ្រោះតាមស្រះ ក៏ឃើញដងសន្ទូចនៅក្នុងដីចំការមួយកន្លែង ដែលម្ចាស់ធ្វើរបង ហើយឃើញសពកូននៅក្នុងស្រះតែម្តង ។
នគរបាលបានបញ្ជាក់ថា កុមារារងគ្រោះសង្ស័យតែរអិលជើងធ្លាក់ចូលស្រះ ហែលមិនរួច ទើបស្លាប់ ។
លោក សារ៉េត វិសេដ្ឋ អធិការរងស្រុកភ្នំព្រឹកបានអោយដឹងថា យុវជនចងកស្លាប់មានឈ្មោះ ហាប់ ង៉ា អាយុ២១ឆ្នាំរបរកម្មករ មានទីលំនៅភូមិចក ឃុំរហាត់ទឹក ស្រុកមង្គលបូរី ខេត្តបន្ទាយមានជ័យ មកស្នាក់បណ្តោះអាសន្ន នៅភូមិកើតហេតុ ។ វត្ថុតាងលើសពមានខ្សែនីឡុងពណ៌ខ្មៅប្រវែងជាង១ម៉ែត្រ ចងជាប់កជនរងគ្រោះ និងដើមព្រីងក្រោយផ្ទះ ។
ឈ្មោះ ចាន់ ហាប់ អាយុ៥២ ជាឪពុកនិងឈ្មោះ អែម ធី អាយុ៤៨ឆ្នាំជាម្តាយជនរងគ្រោះបានបញ្ជាក់ថា កូនប្រុសពួកខ្លួន ខូចចិត្តពេលទទួលដំណឹងសង្សារនៅភ្នំពេញស្លាប់ចោល ក៏សម្រេចចិត្តចងកស្លាប់ទៅតាមនាងតែម្តង ។
មន្ត្រីនគរបាលកោសវិច័យ បានបញ្ជាក់ថា សពជនរងគ្រោះទាំង ៣ ករណី ក្រោយពិនិត្យ និងធ្វើ កោសលវិច័យរួច មិនឃើញមានស្នាមវាយឬឃាតកម្មអ្វីផ្សេងទេ ហើយបានប្រគល់អោយក្រុមគ្រួសារ យកទៅធ្វើបុណ្យតាមប្រពៃណី ៕
