(ខេត្តកំពត)៖ នៅរសៀលថ្ងៃទី២៩ ខែឧសភា ឆ្នាំ២០២០ លោក ប៉ិល កុសល អភិបាលរងខេត្តកំពត ទទួលបន្ទុកដោះស្រាយវិវាទដីរដ្ឋថ្នាក់ខេត្ត បានដឹកនាំក្រុមករងារចម្រុះចុះវាស់វែង និងបោះបង្គោលកំណត់ព្រំ ដី ជូនភាគីទំនាស់រវាងប្រជាពលរដ្ឋចំនួន១៨គ្រួសារ និងលោក ប៊ុន សុផាត ដែលមានទីតាំងនៅភូមិទទឹងថ្ងៃ ឃុំបឹងទូក ស្រុកទឹកឈូ ខេត្តកំពត។
យោងតាមប្រភពជាច្រើនបានបញ្ជាក់អះអាងថា ការបង្កើតគណៈកម្មការចម្រុះក្នុងការវាស់វែងដីចំណុចនេះ បន្ទាប់ពីមានប្រជាពលរដ្ឋចំនួន១៨គ្រួសារ បានប្តឹងទៅអាជ្ញាធរខេត្ត ខណៈ លោក ប៊ុន សុផាត និងលោក តាន់ ម៉េង បានទិញដីពីអ្នកផ្សេងតែមករំលោភចូលលើដីរបស់ពួកគាត់ដែលមានសាលាកបត្រត្រឹមត្រូវ ទើបលោកអភិបាលខេត្តកំពត ចាត់ឱ្យ លោក ប៉ិល កុសល ដែលទទួលបន្ទុកដោះស្រាយដីទំនាស់ថ្នាក់ខេត្ត ដឹកនាំក្រុមការងារចម្រុះ ចុះទៅត្រួតពិនិត្យវាស់វែងផ្ទៀងផ្ទាត់ និងបោះបង្គោលកំណត់ព្រំដីឱ្យបានជាក់លាក់ដើម្បីបញ្ចប់ការវិវាទតែម្តង។
ប្រភពដដែលបានបន្តថា ករណីទំនាស់នេះផ្តើមឡើងដោយសារ លោក ប៊ុន សុផាត ដែលមានទីលំនៅក្នុងភូមិសុវណ្ណសាគរ សង្កាត់កំពង់កណ្តាល ក្រុងកំពត និង លោក តាន់ ម៉េង រស់នៅរាជធានីភ្នំពេញ ដោយគាត់បានទិញដីពីអ្នកផ្សេងដែលមានទីតាំងជាប់គ្នារវាងភាគីម្ខាង ហើយបានវាតទីរំលោភចូលទៅដីប្រជាពលរដ្ឋទាំង១៨គ្រួសារ។ចំពោះការវាតទន្ទ្រាននេះគ្រួសារដែលបាត់បង់ដីច្រើនជាងគេក្នុងចំណោម១៨គ្រួសារខាងលើ មានឈ្មោះ កៅ សីហា និង ឈ្មោះ កៅ ចាន់ណា។
ជុំវិញករណីនេះ លោក ប៉ិល កុសល អនុប្រធានគណៈកម្មាធិការដោះស្រាយដីធ្លីថ្នាក់ខេត្ត បានមានប្រសាសន៍ថា លោកមកនេះក្នុងគោលបំណងត្រួតពិនិត្យ ដោយតម្រូវឲ្យខាងជំនាញវាស់វែង និងបោះបង្គោលកំណត់ព្រំដីឲ្យបានជាក់លាក់ជូនភាគីទាំងពីរដើម្បីបញ្ចប់ទំនាស់។ លោក ប៉ិល កុសល បានលើកឡើងថា ក្នុងដំណោះស្រាយនេះ លោកសំណូមពរដល់ភាគីពាក់ព័ន្ធត្រូវយកឯកសារមកបង្ហាញដើម្បីពិនិត្យងាយស្រួលដោះស្រាយ ហើយប្រសិនជាការវាស់វែងទៅឃើញថា ពុំមានជាន់គ្នាទេគឺអាចបោះបង្គោលកំណត់ព្រំបានដោយគ្មានការជំទាស់តវ៉ាទៀតឡើយ៕ សេង ណារិទ្ធ
