(ខេត្តកែប)៖ កាលពីថ្ងៃទី១១ ខែឧសភា ឆ្នាំ២០២០ ក្រសួងផែនការ សហការជាមួយ រដ្ឋបាលខេត្តកែប បានបើកវគ្គបណ្តុះបណ្តល ស្តីពី នីតិវិធីអត្តសញ្ញាណកម្មគ្រួសារក្រីក្រតាមការស្នើសុំ ក្នុងអំឡុងពេលប្រយុទ្ធនឹងជំងឺកូវីដ ១៩ ក្រោមអធីបតីភាព លោកកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ និងមានការអញ្ជើញចូលរួម លោក កែន សត្ថា អភិបាលខេត្តកែប និង លោក សំ សារីន ប្រធានក្រុមប្រឹក្សាខេត្ត លោក លោកស្រី អភិបាលរងខេត្ត និងមន្ត្រីរាជការដែលអញ្ជើញមកពីមន្ទីរផែនការចំនួន ៦ខេត្តរួមមាន៖ ខេត្តកែប កំពត ព្រះសីហនុ កោះកុង តាកែវ និងកណ្តាល ។
ក្នុងឨកាសនោះ លោក កែន សត្ថា អភិបាលនៃគណៈអភិបាលខេត្តកែប បានរាយការណ៍អំពីស្ថានភាពភូមិសាស្ត្រក្នុងខេត្តកែប ដោយបានគូសបញ្ជាក់ថា រដ្ឋបាលខេត្តកែប បានចុះអប់រំ និងផ្សព្វផ្សាយប្រជាពលរដ្ឋអំពីការទប់ស្កាត់ការឆ្លងជំងឺ កូវីដ-១៩ តាមគ្រប់មធ្យោបាយ។ ចំពោះពលករដែលទៅរកការងារធ្វើនៅក្រៅប្រទេសហើយវិលចូលមកស្រុកកំណើតវិញត្រូវធ្វើចត្តាឡីស័ក ដាក់ឱ្យនៅ ដាច់ដោយឡែករយៈពេល ១៤ថ្ងៃ ចំពោះករណីជំងឺកូវីដ១៩ ទាំង៤ករណីនៅខេត្តកែប ជាករណីឆ្លងពីខាងក្រៅ មិនឆ្លងក្នុងហសគមន៍នោះទេ ហើយពេលនេះ បានព្យាបាលជាសះស្បើយជាស្ថាពរ និងពុំមានករណីឆ្លងថ្មីទៀតឡើយ ។
ជាមួយនេះ លោកអភិបាលខេត្ត បានសំណូមពរដល់សិក្ខាកាមទាំងអស់ត្រូវយកចិត្តទុកដាក់ តាមដានវគ្គបណ្តុះបណ្តាលនេះឱ្យមានប្រសិទ្ធិភាព ដើម្បីជាមូលដ្ឋានក្នុងការអនុវត្ត លើការងារអត្តសញ្ញាណកម្មគ្រួសារក្រីក្រជូនប្រជាពលរដ្ឋ ឱ្យទទួលបានជោជ័យ។
លោកកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ មានប្រសាសន៍ថា ចាប់ពីដើមឆ្នាំ២០២០នេះ ប្រទេសស្ទើរតែទាំងអស់នៅទូទាំងពិភពលោក បូករួមទាំងកម្ពុជាយើងផង បាននឹងកំពុងរងផលប៉ះពាល់យ៉ាងខ្លាំងដោយសារការឆ្លងរាលដាលនៃជំងឺកូវីដ ១៩ ហើយរាជរដ្ឋាភិបាលកម្ពុជា កំពុងពិនិត្យនិងជួយអន្តរាគមន៍បន្ទាន់ដល់ប្រជាជនកម្ពុជា ដែលកំពុងរងផលប៉ះពាល់ពិសេសគ្រួសារក្រីក្រ និងគ្រួសារទទួលរងប៉ះពាល់ខ្លាំងជាងគេ តាមរយៈការប្រើប្រាស់ទិន្នន័យគ្រួសារក្រីក្ររបស់ក្រសួងផែនការជាគោល។
លោកបានបន្ថែមទៀតថា ដើម្បីជួយសម្រួលដល់ជីវភាពរស់នៅរបស់ប្រជាពលរដ្ឋ និងកាត់បន្ថយផលប៉ះពាល់ដោយសារការរីករាលដាលជំងឺកូវីដ-១៩នេះ រាជរដ្ឋាភិបាលបានសម្រេចជួយ ឧបត្ថម្ភជាសាច់ប្រាក់ជូនគ្រួសារក្រីក្រ ដែលមានប័ណ្ណសមធម៌ ដោយឡែកគ្រួសារក្រីក្រមួយចំនួន ដែលអវត្តមានអំឡុងពេលប្រមូលទិន្នន័យ និងគ្រួសារខ្លះទៀតទើបទទួលរង ផលប៉ះពាល់ បាត់បង់ចំណូលដោយជំងឺកូវីដ-១៩ រាជរដ្ឋាភិបាលកំណត់ឱ្យក្រសួងផែនការ ធ្វើបច្ចុប្បន្នភាពលើកការកំណត់ អត្តសញ្ញាណគ្រួសារក្រីក្រតាមការស្នើសុំ ដើម្បីបញ្ចូលគ្រួសារក្រីក្រដែលនៅខ្វះចន្លោះ។
លោកបានបញ្ជាក់ផងដែរថា ក្រសួងផែនការត្រូវការមន្ត្រីដែលមាន សមត្ថភាព និងលះបង់ពេលវេលាសម្រាប់ធ្វើជាគ្រូបង្គោល ទទួលខុសត្រូវនៅតាម ក្រុង ស្រុក ឃុំ សង្កាត់ ដើម្បីដោះស្រាយបញ្ហានានាដែលកើតឡើងនៅពេលអនុវត្តន៍ការងារ ដើម្បីឆ្លើយតបទៅនឹងការប្រយុទ្ធប្រឆាំងនឹងជំងឺកូវីដ-១៩ តាមរយៈការផ្តល់ការគាំពារ រក្សាលំនឹងជីវភាពប្រជាពលរដ្ឋក្រីក្រ និងប្រជាពលរដ្ឋងាយរងគ្រោះបំផុត៕ សេង ណារិទ្ធ
