(ខេត្តកំពត)៖ ពលរដ្ឋខ្មែររស់នៅក្រុងកំពត ទើបត្រឡប់មកពីធ្វើជាពលករនៅប្រទេសថៃ បានលើកឡើងថា ពួកគេនឹងខិតខំព្យាយាមរកការងារធ្វើនៅក្នុងស្រុក មិនត្រឡប់ទៅប្រទេសថៃវិញទេ និងបានអំពាវដល់ថ្នាក់ដឹកនាំខេត្តកំពត សប្បុរសជន ឱ្យជួយឧបត្ថម្ភគាំទ្រដល់ក្រុមគ្រួសារពលករខ្វះខាត់ទាំងអស់ នៅក្នុងអំឡុងពេលរស់នៅដាច់ដោយឡែករយៈពេល១៤ថ្ងៃផង។
លោកស្រី កាល់ កូរី រស់នៅភូមិតាដិប សង្កាត់អណ្តូងខ្មែរ ក្រុងកំពត បានប្រាប់ឱ្យដឹងថា ក្រុមគ្រួសារលោកស្រីមានសមាជិក៥នាក់ កូនពីរនាក់ នឹងម្តាយចាស់ម្នាក់។ លោកស្រី ប្តីនិងក្មួយប្រុសម្នាក់ បានទៅធ្វើការជាជាងផ្សារដែកធ្វើទ្រុងមាន់នៅប្រទេសថៃជាច្រើនឆ្នាំ។ ប្រាក់ចំណូលបានមកសមរម្យដែរ ជារៀងរាល់ខែ លោកស្រីតែងតែផ្ញើមកផ្ទះដើម្បីឧបត្ថម្ភម្តាយចាស់ និងកូនពីរនាក់រៀនសូត្រ។ប៉ុន្តែថវិការដែលផ្ញើមកបានប្រមាណ ២០០០បាត (គិតលុយខ្មែរ ប្រមាណជិត៣០ម៉ឺនរៀលប៉ុណ្ណោះ)។
លោកស្រីបានបន្តថា ការវិលឡប់មកមាតុភូមិវិញនាពេលនេះ ព្រោះក្តីបារម្ភខ្លាចឆ្លងជំងឺដល់ខ្លួននៅប្រទេសថៃ និងម្យ៉ាងភ័យព្រួយខ្លាចជំងឺឆ្លងដល់ម្តាយ និងកូនតូចៗនៅស្រុកកំណើត។ បច្ចុប្បន្នពួកគេកំពុងរស់នៅដាច់ដោយឡែក គោរពតាមការណែនាំរបស់ប្រមុខរាជរដ្ឋាភិបាល ក៏ដូចជាអាជ្ញាធរណែនាំ មិនហ៊ានប៉ះពាល់កូន និងម្តាយនោះឡើយ បើទោះពួកគេមិនមានអាការរោគ សង្ស័យណាមួយក៏ដោយ ។ លោកស្រីបានបញ្ជាក់ថា លោកស្រី និងគ្រួសារមិនត្រឡប់ទៅថៃវិញទេ ព្រោះចង់រស់នៅក្បែរម្តាយ និងកូនៗ។
លោកស្រីបានអំពាវដល់ថ្នាក់ដឹកនាំខេត្ត សម្បុរសជន សូមចូលរួមលើកទឹកចិត្តដល់ពលករខ្វះខាត់ទាំងអស់ និងសូមជួយឧបត្ថម្ភជាសម្ភារៈ ឬអ្វីក៏បាន ដើម្បីជួយទ្រទ្រង់ជីវភាពគ្រួសារ និងការខ្វះខាត់នៅក្នុងអំឡុងពេលឃុំខ្លួន១៤ថ្ងៃនៅក្នុងផ្ទះតាមការណែនាំរបស់ប្រមុខរាជរដ្ឋភិបាល។
លោកចៅសង្កាត់អណ្តូងខ្មែរក៏បានប្រាប់ឱ្យដឹងដែរថា អាជ្ញាធរសង្កាត់យកចិត្តទុកដាក់ណាស់ចំពោះពលរដ្ឋដែលត្រឡប់មកពីប្រទេសថៃ និងបានចុះអប់រំផ្សព្វផ្សាយ ពន្យល់ណៃនាំឲ្យរស់នៅដាច់ដោយឡែករយៈ១៤ថ្ងៃ។
សូមជម្រាបថា តាមរបាយការណ៍របស់ស្នងការខេត្តកំពត គិតមកដល់ថ្ងៃទី ២៧ ខែមីនា ឆ្នាំ ២០២០ មានពលរដ្ឋត្រឡប់មកពីធ្វើការជាពលករនៅស្រុកថៃ មកដល់ស្រុកកំណើរចំនួន៥០០នាក់៕ សេង ណារិទ្ធ
