(ខេត្តកំពត)៖ អនុរដ្ឋលេខាធិការក្រសួងបរិស្ថាន និងជាអនុប្រធានក្រុមការងាររាជរដ្ឋាភិបាល ចុះមូលដ្ឋានក្រុងកំពត ខេត្តកំពត បានដឹកនាំមន្ត្រីអាជ្ញាធរ ក្រុង សង្កាត់ និងអ្នកពាក់ព័ន្ធ ដើម្បីចុះជួបសួរសុខទុក្ខសំណេះសំណាល និងធ្វើការអប់រំផ្សព្វផ្សាយណែនាំអំពីវិធានការកាពារទប់ស្កាត់ការឆ្លងរីករាលដាលនៃជំងឺកូវីដ១៩ ដល់ប្រជាពលរដ្ឋនៅតាមខ្នងផ្ទះ។
ការអនុវត្តឆ្លើយតប នឹងការអំពាវនាវណែនាំ របស់ប្រមុខរាជរដ្ឋាភិបាល ក៏ដូចក្រសួងសុខាភិបាលក្នុងការជំរុញយកចិត្តទុកដាក់ លើការងារឃោសនា អប់រំផ្សព្វផ្សាយអំពីវិធានការការពារទប់ស្កាត់ការឆ្លងរីករាលដាលជំងកូវីដ ១៩ នៅព្រឹកថ្ងៃទី២៧ ខែមីនា ឆ្នាំ២០២០នេះ លោក សូត យា អនុរដ្ឋលេខាធិការក្រសួងបរិស្ថាន និងជាអនុប្រធានក្រុមការងាររាជរដ្ឋាភិបាលចុះមូលដ្ឋានក្រុងកំពត និងមន្ត្រីថ្នាក់ដឹកនាំជំនាញ និងពាក់ព័ន្ធក្នុងខេត្តចុះតាមខ្នងផ្ទះរបស់ប្រជាពលរដ្ឋក្រីក្រ ចាស់ជរា និងក្រុមគ្រួសារជាច្រើនទៀតនៅក្នុងសង្កាត់ក្រាំងអំពីល ក្រុងកំពត។
លោក សូត យា បានលើកឡើងថា បញ្ហាការជំងឺឆ្លងវីរុសកូវីដ១៩ គឺជាបញ្ហាសកល ដែលពិភពលោកក៏ដូចជារាជរដ្ឋាភិបាលកម្ពុជា បាននិងកំពុងយកចិត្តទុកដាក់ រួមគ្នាប្រយុទ្ធទប់ស្កាត់ជំងឺ ដ៏កាចសាហាវនេះ។ លោកបានបន្តថា ប្រជាពលរដ្ឋម្នាក់ៗ ត្រូវតែមានស្មារតីទទួលខុសត្រូវខ្ពស់ ប្រុងប្រយ័ត្ន និងយកចិត្តទុកដាក់ ចូលរួមអនុវត្ត តាមវិធានណែនាំរបស់ក្រសួងសុខាភិបាល។
ជាមួយនេះដើម្បីការពារការឆ្លងមេរោគផ្សេងៗ ពិសេសវីរុសកូរ៉ូណា លោកក៏បានស្នើឱ្យប្រជាពលរដ្ឋចូលរួមអនុវត្តនូវវិធានការ៦ចំណុច សំខាន់ឱ្យបានល្អរួមមានគឺ ទី១-ឧស្សាហ៍លាងសម្អាតដៃជាមួយសាប៊ូ ឬទឹកអាកុលលាងដៃ ឬអាកុលជែលឱ្យបានញឹកញាប់, ទី២-ខ្ទប់មាត់ និងច្រមុះនៅពេលក្អក ឬកណ្ដាស់ដោយប្រើកន្សែងដៃ ក្រម៉ា ឬ ក្រដាសអនាម័យ រួចបោះចោលក្នុងធុងសំរាមឱ្យបានត្រឹមត្រូវ ទី៣-ជៀសវាងប៉ះពាល់ជិតស្និទ្ធជាមួយអ្នកដែលមានគ្រុនក្ដៅ ក្អកឬ ផ្ដាសាយ, ទី ៤-ជៀសវាងប៉ះពាល់ភ្នែកច្រមុះឬ មាត់, ទី ៥-បរិភោគអាហារដែលចម្អិនបានឆ្អិនល្អ និងទី ៦-ស្វាគមន៍ដោយសំពះជំនួសការចាប់ដៃ។
លោក សូត យា ក៏បានបន្តអំពាវនាវអប់រំណែនាំ ដល់បងប្អូនប្រជាពលរដ្ឋថា ក្នុងដំណាក់កាលនេះ បើពុំមានការចាំបាច់ទេ សូមបងប្អូនរក្សាខ្លួននៅក្នុងផ្ទះ កុំចេញដើរទៅណាឆ្ងាយពីផ្ទះ ឬក៏ចូលរួមជួបជុំ ក្នុងកម្មវិធីផ្សេងៗ ដែលមានមនុស្សច្រើន ហើយពិសេសបើសិនក្រុមគ្រួសារណាដែលមានសមាជិកទើបមកពីក្រៅប្រទេស សូមប្រុងប្រយ័ត្នកុំប្រញាប់ការរស់នៅស្និទ្ធស្នាលជាមួយសមាជិកក្នុងគ្រួសារ នឹងត្រូវរស់នៅដាច់ដោយឡែកពីសមាជិកផ្ទះឲ្យបានរយៈពេល ១៤ថ្ងៃសិន ហើយជាការចាំបាច់ថែមទៀតនោះ ត្រូវប្រើម៉ាស់ឬកន្សែងនៅពេលកណ្ដាស់ឬ ក្អកត្រូវខ្ទប់មាត់និងច្រមុះ ក្នុងករណីសង្ស័យពាក់ព័ន្ធនឹងជំងឺកូវីដ សូមប្រញាប់ទៅមណ្ឌលសុខភាពដែលនៅជិតផ្ទះរបស់បងប្អូនដើម្បីឲ្យមន្ត្រីសុខាភិបាលពិនិត្យនិងព្យាបាលបន្ទាន់។
ក្នុងឱកាសនោះក្រុមការងារក៏បាននាំយកក្រមាចំនួន២០០ចែកជូនដល់ប្រជាពលរដ្ឋ ប្រើប្រាស់ក្នុងការបង្ការទប់ស្កាត់ ជំងឺឆ្លងកូវីដ១៩ជំនួសម៉ាស់ផងដែរ៕ សេង ណារិទ្ធ
