(ខេត្តកំពត)៖ អំណោយមនុស្សធម៌ រួមមានថវិកា សម្ភារៈប្រើប្រាស់ គ្រឿងឧបភោគបរិភោគ ដែលទទួលបានពីសប្បុរសជន នៅព្រឹកថ្ងៃទី២៥ ខែមីនាឆ្នាំ ២០២០ ត្រូវបានធ្វើពិធី ប្រគល់នឹងទទួល ក្រោមអធិបតីភាព លោក ជាវ តាយ ប្រធានគណៈកម្មាធិការសាខាកាកបាទក្រហមខេត្តកំពត និងមានវត្តមានចូលរួមពីសំណាក់លោកស្រី លាង ហៃ អនុប្រធានអចិន្ត្រៃយ៍សាខាកាកបាទក្រហមកម្ពុជាខេត្ត ព្រមទាំងសមាជិក សមាជិកាគណៈកម្មាធិការសាខា និងសមាជិកកិត្តិយសសាខាផងដែរ។
អំណោយទាំងនោះ រួមមាន មី ២៦ កេស ត្រីខ ១០០កំប៉ុង ទឹកអាកុលលាងដៃ ចំនួន ៥០០ដបតូច និងថវិកាចំនួន១២លានរៀល និង១,៨០០ដុល្លារ។
មានប្រសាសន៍ សំណេះសំណាលក្នុងឱកាសនោះ លោក ជាវ តាយ ប្រធានគណៈកម្មាធិការសាខាកាកបាទក្រហមខេត្ត បានថ្លែងអំណរគុណ កោតសរសើរ ដល់សប្បុរសជន និងបានចាត់ទុកអំណោយ ដែលបាននាំមកប្រគល់ជូនសាខាកាកបាទក្រហមកម្ពុជាខេត្តកំពតនាពេលនេះ គឺពិតជា កាយវិការនូវទឹកចិត្តសប្បុរសធម៌មួយរួមចំណែកក្នុងវិស័យមនុស្សធម៌ ជាមួយកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធានដឹកនាំក៏ ដូចជាការរួមចំណែកជាមួយរាជរដ្ឋាភិបាល ដើម្បីជួយដល់ប្រជាពលរដ្ឋជួបប្រទះការខ្វះខាតឬជួបប្រទះនូវឧប្បត្តិវហេតុផ្សេងៗ និងបញ្ហាប្រឈមនានា ក្នុងការឆ្លើយតបបានទាន់ពេលវេលាផងដែរ។
ពិសេសជាងនេះ អំណោយរបស់សប្បុរសជនដែលបានផ្ដល់ជូនសាខាកាកបាទក្រហម នាពេលនេះក៏ជាការរួមចំណែក ដើម្បីឆ្លើយតប ក្នុងការជួយដល់សុខភាព និងបញ្ហាប្រឈមខ្វះខាតសម្រាប់ប្រជាពលរដ្ឋ ក៏ដូចជាសុខភាពសាធារណៈ ឱ្យបានទាន់ពេលវេលា និងមានប្រសិទ្ធភាព ក្នុងកាលៈទេសៈនាបច្ចុប្បន្ន ដែលរាជរដ្ឋាភិបាលកម្ពុជាយើងបាននិងកំពុងយកចិត្តទុកដាក់ខ្ពស់ អំពាវនាវណែនាំដល់គ្រប់ស្ថាប័នរដ្ឋ វិស័យឯកជន អង្គការជាតិ អន្តរជាតិ រួមនឹងប្រជាពលរដ្ឋយើង រួមគ្នាប្រយុទ្ធនឹងជំងឺឆ្លង កូវីដ ១៩ ដែលជាជម្ងឺរាតត្បាត ជាសកលក្នុងពិភពលោក។
លោក ជាវ តាយ ក៏បានសន្យា និងធ្វើការចាត់ចែងអំណោយទាំងនេះ ឱ្យបានស្របទៅនឹងទឹកចិត្តសប្បុរសធម៌ម្ចាស់អំណោយ ពិសេសឱ្យបានចំគោលដៅ នៃគោលការណ៍ ក្នុងវិស័យមនុស្សធម៌របស់កាកបាទក្រហមកម្ពុជា ដែលជាស្ថាប័នឈានមុខ ក្នុងការជួយសង្គ្រោះនិង ជួយសម្រាលការលំបាកនូវបញ្ហាប្រឈមនានាសម្រាប់ជនងាយរងគ្រោះដែលបានជួបប្រទះនៅក្នុងមូលដ្ឋាន។
ជាមួយឱកាសនោះពាក់ព័ន្ធនឹងជំងឺឆ្លងកូវីដ១៩ លោក ជាវ តាយ អភិបាលខេត្ត ក៏បានបញ្ជាក់ថា បច្ចុប្បន្ននេះសម្រាប់ខេត្តកំពត ពុំទាន់មានការ រាតត្បាតធ្ងន់ធ្ងរទៅលើប្រជាពលរដ្ឋក្នុងខេត្តនៅឡើយទេ ហើយរហូតដល់ពេលនេះ ទើបតែមានឆ្លងចំនួន២ នាក់ប៉ុណ្ណោះ ដែលកំពុងសម្រាកព្យាបាលនៅខេត្តផ្សេង ដែលអនុវត្តទៅតាមគោលការណ៍ណែនាំរបស់ក្រសួងសុខាភិបាល ហើយដោយឡែក មានការឆ្លងជំងឺកូវីដ១៩ចំនួន២នាក់ផ្សេងទៀតដែរនោះក្នុងខេត្ត ដែលនាំចូលពីក្រៅប្រទេសលើជនជាតិម៉ាឡេស៊ី ដែលកំពុងសម្រាកព្យាបាលនៅមន្ទីរពេទ្យបង្អែកខេត្តកំពត។
ក្នុងឱកាសនោះ លោក ជាវ តាយ ក៏បានធ្វើពិធីប្រគល់និងទទួលអំណោយសម្ភារៈថវិកាព្រមទាំងប្រគល់នូវ ប័ណ្ណនិងលិខិតសរសើរជូនដល់សប្បុរសជនចំនួន ១៧ នាក់ ដែលជាម្ចាស់អំណោយផងដែរ៕ សេង ណារិទ្ធ
