ខេត្តរតនគិរី ៖ ប្រជាពលរដ្ឋចំនួន៥ភូមិ និងមួយមណ្ឌល នៅឃុំតាវែងលើ ស្រុកតាវែង ខេត្តរតនគិរី មានការខឹងសម្បារជាខ្លាំងបន្ទាប់ក្រុមឈ្មួញបាននាំជនជាតិវៀតណាមប្រមាណជាង៥០នាក់ចូលមកកាប់ឈើប្រណិតប្រភេទធ្នង់ និងនាំគ្រឿងចក្រមកឈួសឆាយផ្លូវនាពេលថ្មីៗនេះ។ ប្រជាពលរដ្ឋចំនួន៥ភូមិ រួមមានភូមិបាងកិត ភូមិភ្លឺតូច ភូមិកិកួង ភូមិរាងវិញ ភូមិអូរតាបូក និងមណ្ឌលយ័ន។
តាមប្រភពពីអ្នកភូមិបានអោយដឹងថា រយៈពេលជាង ២ ទៅ ៣ ខែ ហើយដែលក្រុមឈ្មួញនាំកម្លាំងចូលទៅកាប់បំផ្លាញនៅតំបន់នោះ ដោយប្រើកម្មករជនជាតិវៀតណាមប្រមាណជាង៥០នាក់ ហើយចំណុចដែលចូលលួចនោះគឺស្ថិតនៅភូមិសាស្ត្រឧទ្យានជាតិវរៈជ័យ ចំណុចបង្គោលកំណត់ឧទ្យានជាតិលេខ៤១ ចុងអូរកាផា បន្ទាប់ពីមានការផិតភ័យពីគណកម្មាការបង្ក្រាបបទល្មើសព្រៃឈើថ្នាក់ជាតិបានចុះមកនោះពួកគេបានដឹកជញ្ជូនកម្មករវៀតណាមត្រឡប់ទៅប្រទេសវិញតាមច្រករបៀងភូមិចង ឃុំញ៉ាង ស្រុកអណ្តូងមាស។ សល់តែកំណាត់ឈើដែលលើដាក់លើរថយន្តកែច្នៃរួចស្រាច់ចំនួន៤គ្រឿង និងគំនរឈើជាច្រើនពាន់ម៉ែត្រគូបទៀត និងបន្សល់គ្រឿងចក្រថ្មីមួយដែលគេនាំចូលប្រទេសវៀតណាមប្រភេទ អាបុល ឈួសដី និងប្រេងជាច្រើនធុង ហើយឥឡូវនេះត្រូវបានគេលាក់ទុកយ៉ាងស្ងាមស្ងាត់ក្នុងព្រៃខាងលើ។ ដោយតាមផ្លូវមានការកាប់ឈើជាច្រើនដើមដាក់រាលរាំងផ្លូវមិនអោយអ្នកដទៃផ្សេងៗចូលទៅដល់គោលដៅ។
លោក ម៉ោង សិត ប្រធានស្នាក់ការឧទ្យានជាតិវរៈជ័យប្រចាំស្រុកតាវែងមិនអាចសុំការបំភ្លឺបានទេ ព្រោះទូរស័ព្ទតេចូលមានអ្នកលើកជំនួសថាម្ចាស់ទូរស័ព្ទមិននៅ ។
គួរបញ្ជាក់ថា ក្រុមឈ្មួញដែលចូលកាប់បំផ្លាញឈើប្រណិតនៅឧទ្យានជាតិវរៈជ័យមានជាច្រើនកន្លែងដូចជាភ្នំសេវ៉ា វាលអណ្តែង បង្គោលកំណត់ព្រំឧទ្យានជាតិលេខ៤២,៤៣ផងដែរ បើតាមសេចក្តីរាយការណ៍ពីប្រជាពលរដ្ឋជនជាតិដើមភាគតិចនៅក្បែរតំបន់នោះ។
មជ្ឈដ្ឋានទូរទៅបានរិះគន់ថាជុំវិញការកាប់បំផ្លាញឈើប្រណិត និងឈើសុក្រំនៅតំបន់ឧទ្យានជាតិវរៈជ័យនេះគឺដោយសារមានការបើកដៃពីសំណាក់អាជ្ញាធរនឹងសមត្ថកិច្ចជំនាញ ព្រមទាំងនាយកដែនជម្រកផងដែរ ហើយឈើប្រណិត សុក្រំទាំងអស់នោះត្រូវបានគេធ្វើផ្លូវនាំចេញទៅកាន់ប្រទេសវៀតណាមតាមច្រករបៀងភូមិចម ភូមិតាង៉ា និងពាមអូរសេដ្ឋី ដែលគ្រប់គ្រងដោយលោកបុត ពិលី មេបញ្ជាការនគរបាលការពារព្រំដែនគោកលេខ២០៣ប្រចាំការនៅទីនោះ ហើយឈើទាំងអស់នេះសេសសល់ពីការនាំចេញទៅកាន់ប្រទេសវៀតណាមរយៈពេលជិត៣ខែមកហើយ ៕
សន ចាន់ឌី
